Tag: UOK

کراچی: وزیر اعلیٰ سندھ سید مراد علی شاہ نے جامعہ کراچی سے متعلق اجلاس کے دوران جامعہ کے معیار تعلیم کو بہتر بنانے کی ہدایت کردی۔

تفصیلات کے مطابق وزیر اعلیٰ سندھ سید مراد علی شاہ کی زیر صدارت جامعہ کراچی سے متعلق اجلاس ہوا، اجلاس میں وائس چانسلر اجمل خان، سیکریٹری یونیورسٹی اینڈ بورڈ ریاض الدین، وزیر اعلیٰ کے پرنسپل سیکریٹری ساجد جمال ابڑو اور دیگرحکام شریک ہوئے۔

وزیر اعلیٰ سندھ کا کہنا تھا کہ جامعہ کراچی معیار تعلیم کی وجہ سے مشہور تھی، وہ معیار چاہیئے۔ انہوں نے دریافت کیا کہ قومی ادارہ احتساب (نیب) نے معیار تعلیم اور جامعہ میں گورننس بہتر بنانے پر 37 ہدایات دیں نا پر کتناعمل ہوا؟

وائس چانسلر نے بتایا کہ 37 میں سے 25 ہدایات پر عمل ہوچکا ہے، باقی پر عمل جاری ہے۔

وزیر اعلیٰ نے جامعہ کے معیار تعلیم کو بہتر بنانے کی ہدایت کرتے ہوئے کہا کہ حکومت سندھ معیار تعلیم بہتر کرنے کے لیے ہر قسم کی مدد کرتی رہے گی۔

انہوں نے ہدایت کی کہ جامعہ کے مسائل پر انہی وقتاً فوقتاً رپورٹ کی جاتی رہے۔ وزیر اعلیٰ نے بے نظیر بھٹو چیئر کے لیے چیئرمین کی اسامی جلد پر کرنے پر بھی ہدایت کی۔

وزیر اعلیٰ نے ہدایت کی کہ یونیورسٹی کی مختلف چیئرز اپنے اپنے شعبوں میں تحقیق کر کے پبلک اور پرائیویٹ سیکٹر کی رہنمائی کرتے رہیں۔

خیال رہے کہ ایک روز قبل وزیر اعلیٰ سندھ نے زرعی پائیدارترقی کانفرنس سے خطاب کرتے ہوئے کہا تھا کہ دنیا کو غربت، سماجی ترقی، موسمی تبدیلی، ماحولیاتی مسائل کا سامنا ہے۔

انہوں نے کہا تھا کہ غربت کے خاتمے کے لیے 2008 میں بے نظیر انکم سپورٹ پروگرام شروع کیا، آج تک لاکھوں لوگ اس پروگرام سے مستفید ہوچکے ہیں۔

وزیر اعلیٰ کا مزید کہنا تھا کہ سندھ حکومت عوام کو بہترین سہولیات مہیا کرنے پر کام کر رہی ہے، سندھ حکومت نے پائیدار ترقی کے مقاصد کے لیے سپورٹ یونٹ قائم کیا، زرعی شعبے کی ترقی کے لیے انٹر پرائز ڈیولپمنٹ فنڈ قائم کیا۔