ARYNews.tv | Urdu – Har Lamha Bakhabar

Tag: Urdu news

  • غزہ پر بمباری: حماس کی قید میں موجود 7 اسرائیلی قیدی ہلاک

    غزہ پر بمباری: حماس کی قید میں موجود 7 اسرائیلی قیدی ہلاک

    غزہ میں اسرائیلی بربریت کا سلسلہ تھمنے کا نام نہیں لے رہا، اسرائیل نے بمباری کرکے حماس کی قید میں موجود اپنے ہی 7 قیدیوں کو موت کے گھاٹ اُتار دیا۔

    غیر ملکی ذرائع ابلاغ کے مطابق فلسطینی مزاحمتی تنظیم حماس کی جانب سے جاری بیان میں کہا گیا ہے کہ اسرائیل نے غزہ پر بمباری کرکے اپنے ہی 7 قیدیوں کی جان لے لی ہے۔

    حماس کے جاری بیان کے مطابق اسرائیلی بمباری کے نتیجے میں ہلاک ہونے والے ان قیدیوں کی ہلاکت کا اعلان چند ہفتوں سے جاری تحقیقات کے بعد کیا گیا ہے۔

    دوسری جانب اسرائیل کا کہنا ہے کہ جب تک حماس زندہ قیدیوں کی فہرست نہیں دیتا تب تک جنگ بندی کی مزید بات چیت نہیں ہوگی۔

    اسرائیل نے ثالث مصر اور قطر سے کہا ہے کہ وہ اس وقت تک جنگ بندی کے مذاکرات کو آگے نہیں بڑھائے گا جب تک کہ حماس اسے غزہ میں زندہ رہنے والے اسرائیلی قیدیوں کی فہرست نہیں بھیجتا۔

    ’اسرائیل کو مزید ہزاروں فوجیوں کی ضرورت پڑ گئی‘

    یہ بات اسرائیل کی واللا نیوز سائٹ نے ایک سینئر اسرائیلی اہلکار کے حوالے سے رپورٹ کی ہے۔

    اہلکار نے کہا کہ اسرائیل حماس سے فلسطینی قیدیوں کی تعداد کے بارے میں ”سنجیدہ جواب”بھی مانگ رہا ہے جس کی وہ ممکنہ معاہدے کے حصے کے طور پر رہائی کی درخواست کر رہا ہے۔

  • رمضان المبارک پر سعودی عرب کا پاکستان کو 100 ٹن کھجوروں کا تحفہ

    رمضان المبارک پر سعودی عرب کا پاکستان کو 100 ٹن کھجوروں کا تحفہ

    سعودی عرب کی جانب سے رمضان المبارک کی آمد سے قبل پاکستان کے عوام کو 100 ٹن کھجوروں کا تحفہ بھجوایا گیا ہے۔

    بین الاقوامی خبر رساں ادارے کی رپورٹ کے مطابق کھجوروں کا تحفہ پاکستان میں سعودی عرب کے سفیر نواف بن سعید المالکی اور کنگ سلمان ہیومینٹیرین سینٹر کے ڈائریکٹر عبداللہ البقمی نے پاکستانی حکومت کی کابینہ ڈویژن کے ڈائریکٹر جنرل بریگیڈئر عبیداللہ انور کے حوالے کیا۔

    واضح رہے کہ پاکستانی عوام کے لئے کھجوروں کا یہ تحفہ سالانہ روایات کے مطابق خادم الحرمین شریفین کی ہدایات پر بھجوایا گیا ہے۔

    سعودی سفیر نواف بن سعید المالکی نے اس موقع پر تقریب سے خطاب کرتے ہوئے کہا کہ رمضان المبارک میں کھجوروں کی فراہمی کنگ سلمان ریلیف سینٹر کا ایک منصوبہ ہے۔

    موسم سرما میں کھجور کے حیران کن فائدے

    انہوں نے کہا کہ اس کے علاوہ بھی کنگ سلمان ریلیف سینٹر کے کئی منصوبے پاکستان میں امور کی انجام دہی میں مصروف عمل ہیں، جن میں فوڈ پروگرام کا اہم منصوبہ بھی شامل ہے۔

  • قائدآباد پل کے قریب ڈکیتی مزاحمت پرفائرنگ سے شہری زخمی، شہریوں کا احتجاج

    قائدآباد پل کے قریب ڈکیتی مزاحمت پرفائرنگ سے شہری زخمی، شہریوں کا احتجاج

    کراچی: قائدآباد پل کے قریب ڈکیتی مزاحمت پرفائرنگ سے شہری شدید زخمی ہوگیا، جس کے بعد شہریوں کی جانب سے احتجاج شروع کردیا گیا۔

    اے آر وائی نیوز کے مطابق فائرنگ کے نتیجے میں شہری کے زخمی ہونے کے بعد شہریوں کی بڑی تعداد نے احتجاج شروع کردیا، شہریوں کے احتجاج کی وجہ سے ٹریفک کی آمدروفت معطل ہوگئی۔

    پولیس ذرائع کے مطابق جرائم پیشہ عناصر نے کچھ دیر پہلے شہری کو گولی ماری تھی، جس سے وہ زخمی ہوگیا تھا، مظاہرین سے احتجاج ختم کرانے کے لئے مذاکرات کئے جارہے ہیں۔

    دوسری جانب ڈیفنس فیز ایٹ میں سی ویو کے قریب ہوائی فائرنگ میں کالج طلبا ملوث نکلے، پولیس نے چھ طلبا کو گرفتار کرلیا جبکہ 11 مفرور ہیں۔

    تفصیلات کے مطابق کراچی میں ڈیفنس فیز8 سی ویو کے قریب ہوائی فائرنگ ملوث چھ کالج طلبا کو گرفتار کرلیا گیا جبکہ 11 مزید ملزمان کی پولیس کو تلاش ہے۔

    ڈی آئی جی ساؤتھ اسد رضا نے بتایا ہے کہ گرفتار ملزمان میں بلال اخوند جبار اور شاہیر خان عرف سونو شامل ہیں، گرفتار ملزم جبار گروپ کا ایڈمن تھا تاہم مفرور ملزمان کی گرفتاری کے لیے رات بھر گھروں پر چھاپے مارے گئے۔

    اسد رضا کا کہنا تھا کہ مفرور ملزمان میں نواب زادہ شکراللہ اور یوسف رضوان،شیخ عثمان، ودود حسنی، عطا بلوچ بھی مفرور ملزمان میں شامل ہیں جبکہ سردار شیگان خان اور سعد سلطان بھی مفرور ہونے والوں میں بھی شامل ہیں۔

    ملک کے بالائی علاقوں میں بارش، پہاڑوں پر برفباری، سیاح پھنس گئے

    فائرنگ کی ویڈیوز مبینہ طور پر گروپ کی ہی لڑکی نے وائرل کی، ویڈیوز وائرل ہونے کے بعد فائرنگ کرنے والے عناصر میں کھلبلی مچ گئی۔

  • کراچی میں بارش، پاک فوج کے نکاسی آب کیلئے اہم اقدامات

    کراچی میں بارش، پاک فوج کے نکاسی آب کیلئے اہم اقدامات

    پاک فوج کی جانب سے شہر قائد کے مختلف علاقوں میں بارش کے پانی کی نکاسی کیلئے اہم اقدامات کئے گئے، پاک فوج نے محکمہ موسمیات کی پیشگوئی کے مطابق ایڈوانس حکمت عملی تیار کر رکھی تھی۔

    اے آر وائی نیوز کے مطابق کراچی میں ہونیوالی بارش کے نتیجے میں صورتحال مکمل کنٹرول میں رہی، جبکہ پاک فوج کی ٹیموں نے ڈرینج سسٹمز، پمپنگ کے ذریعے پانی کی نکاسی مسلسل جاری رکھی۔

    پاک فوج کی بروقت حکمت عملی کے باعث شہریوں کو پریشانی کا سامنا نہیں کرنا پڑا، پاک فوج کے جوان شہر کے مختلف علاقوں میں ریسکیو ٹیموں کے ہمراہ اب بھی موجود ہیں۔

    دوسری جانب شہر قائد میں گزشتہ روز ہونے والی بارش کے بعد سردی کی شدت میں اضافہ ہوگیا ہے، ہوامیں نمی کا تناسب 53 فیصد ہے۔

    محکمہ موسمیات کا کہنا ہے کہ کراچی کا موجودہ درجہ حرارت 15 ڈگری ریکارڈ کیا جا رہا ہے جبکہ آج زیادہ سے زیادہ درجہ حرارت 21 ڈگری تک جانیکا امکان ہے۔

    محکمہ موسمیات کے مطابق شہر میں اس وقت ہوا میں نمی کا تناسب 53 فیصد ہے،صبح کے وقت 16 کلو میٹر فی گھنٹہ کی رفتار سے ہوائیں چل رہی ہیں۔

    محکمہ موسمیات کا کہنا ہے کہ کراچی میں موسلادھار بارش کاسلسلہ اب ختم ہوچکا ہے، آج سے کوئٹہ کی سرد ہوائیں شہر کو لپیٹ میں لیں گی، جس سے موسم سرد ہوجائے گا۔

    ہواؤں کی رفتار 30 سے 40 کلومیٹر فی گھنٹے تک جاسکتی ہے، سردی کی لہر اگلے 48 سے 72 گھنٹے تک شہر کو لپیٹ میں لئے رکھے گی۔

    ملک کے بالائی علاقوں میں بارش، پہاڑوں پر برفباری، سیاح پھنس گئے

    ائیر کوالٹی انڈکس کے مطابق بارش کے بعدفضائی آلودگی میں انتہائی کمی واقع ہوئی ہے، ائیرکوالٹی انڈکس 58 پر ٹیکیولیٹ میٹرز ریکارڈ کیا گیا جبکہ دنیاکے آلودہ ترین شہروں کی فہرست میں کراچی آج 56 ویں نمبر پر آگیا۔

  • کراچی میں موسلا دھار بارش کا کوئی امکان نہیں، چیف میٹرولوجسٹ

    کراچی میں موسلا دھار بارش کا کوئی امکان نہیں، چیف میٹرولوجسٹ

    چیف میٹرولوجسٹ سردار سرفراز نے کہا ہے کہ کراچی میں موسلا دھار بارش کا کوئی امکان نہیں ہے جبکہ شہر میں ہلکی اور تیز بارش کا سلسلہ جاری رہیگا۔

    اے آر وائی نیوز کے مطابق چیف میٹرولوجسٹ سردار سرفراز کا کہنا تھا کہ بارش برسانیوالے سسٹم کے اثرات آج رات کراچی سے نکل جائیں گے۔

    واضح رہے کہ کراچی کے مختلف علاقوں میں ہلکی و درمیانی بارش کا سلسلہ شروع ہو گیا ہے، شاہراہ فیصل پر پھسلن کے باعث متعدد موٹر سائیکل سوار گر کر زخمی ہوگئے۔

    اے آر وائی نیوز کے مطابق کراچی کے مختلف علاقوں میں ہلکی اور تیز بارش کا سلسلہ شروع ہو گیا ہے۔ گڈاپ، سرجانی ٹاؤن، تیسر ٹاؤن، صدر کے علاقے میں کہیں ہلکی، درمیانی اور کہیں بوندا باندی کا سلسلہ جاری ہے۔

    گوادر آفت زدہ قرار ، بارش تھم جانے کی دعائیں اور مسجدوں میں اذانیں

    محکمہ موسمیات کی پیشگوئی کے بعد وزیر اعلیٰ سندھ سید مراد علی شاہ نے صوبے میں رین ایمرجنسی نافذ کرتے ہوئے تمام بلدیاتی اداروں، انتظامیہ اور اسپتالوں کو پہلے ہی ہائی الرٹ کر دیا ہے۔

  • 8 فروری کا الیکشن خاموش انقلاب تھا، ملک عامر ڈوگر

    8 فروری کا الیکشن خاموش انقلاب تھا، ملک عامر ڈوگر

    پی ٹی آئی کے حمایت یافتہ رکن قومی اسمبلی ملک عامر ڈوگر نے کہا ہے کہ 8 فروری کا الیکشن خاموش انقلاب تھا۔

    اے آر وائی نیوز کے مطابق قومی اسمبلی کے اجلاس کے موقع پر بات کرتے ہوئے ملک عامر ڈوگر کا کہنا تھا کہ میں سردار ایاز صادق کو تیسری بار اسپیکر منتخب ہونے پر مبارکباد پیش کرتا ہوں، انہوں نے کہا کہ ہم نے خصوصی نشستوں کے بغیر احتجاج کیساتھ الیکشن لڑا۔

    ملک عامر ڈوگر کا کہنا تھا کہ فارم 45 کے مطابق نتیجہ آتا تو میرے ووٹ آج 225 ہوتے، میرے 91 ووٹ نکلے آپ کے 191 ووٹ، انہوں نے کہا کہ میں سنگل پارٹی ہوں اور آپ سات جماعتیں ہیں۔

    انہوں نے کہا کہ ہم سے 80 نشستیں چھینی گئیں، ہم سے نشستیں نہ چھینی جاتیں تو پی ٹی آئی سب سے لارجسٹ پارٹی ہے، فارم 45 کے مطابق میں 225 سیٹوں کیساتھ آج ایوان میں کھڑا ہوں۔

    ملک عامر ڈوگر نے مزید کہا کہ 94 سیٹوں کا ہمیں کوٹہ دیا گیا ایک شخص لوٹا بن گیا، صبح تک ہمارے لوگوں پر دباؤ تھا، اپنے ممبرز کا شکر گزار ہوں کہ ہمارے 91 ووٹ پورے نکلے۔

    ملک عامر ڈوگر نے کہا کہ اس ملک میں ووٹ ڈالنے والوں کا نہ لحاظ نہ احترام کیا گیا، انہوں نے کہا کہ ہمارا اس ایوان میں کوئی ایسا ممبر نہیں جس پر کم از کم 10 مقدمے نہ ہوں۔

    ایاز صادق قومی اسمبلی کے اسپیکر منتخب

    ملک عامر ڈوگر کا اسپیکر قومی اسمبلی سردار ایاز صادق کو مخاطب کرتے ہوئے کہنا تھا کہ یہی ڈرامہ کرنا تھا تو اس قوم کے 50 ارب روپے خرچ کرنے کی کیا ضرورت تھی، یہ الیکشن نہیں تھا بلکہ سلیکشن تھی۔

  • غزہ میں امداد کے منتظر فلسطینیوں پر حملے، اقوام متحدہ کا تحقیقات کا مطالبہ

    غزہ میں امداد کے منتظر فلسطینیوں پر حملے، اقوام متحدہ کا تحقیقات کا مطالبہ

    اقوام متحدہ کے سیکرٹری جنرل انتونیو گوتریس کی جانب سے امداد کے منتظر فلسطینیوں پر اسرائیلی حملے کے نتیجے میں 100 سے زائد شہادتوں کی تحقیقات کا مطالبہ کیا گیا ہے۔

    غیر ملکی ذرائع ابلاغ کے مطابق یورپی خارجہ پالیسی کے سربراہ جوزف بوریل کی جانب سے بھی نہتے فلسطینیوں کا قتل عام ناقابل قبول قرار دے دیا۔

    واضح رہے کہ گزشتہ روز غزہ میں بھوک کے ستائے نہتے شہریوں پر امداد لینے کے دوران اسرائیلی فورسز نے گولیاں برسادیں۔

    فلسطینی وزارت صحت کے مطابق غزہ شہر کے جنوب میں اسرائیلی حملے کے نتیجے میں کم از کم 104 فلسطینی شہید اور 700 سے زائد زخمی ہو گئے۔

    کھانے کو ترستے بھوکے پیاسے فلسطینیوں کو اسرائیلی فوج نے امدادی ٹرکوں کے درمیان خون میں نہلا دیا۔ درجنوں ممالک اور عالمی اداروں کے مسلسل وارننگ کے باوجود اسرائیل نے ظلم و ستم کے نئے پہاڑ توڑ دیے۔

    اسرائیلی میڈیا نے فوجی اہلکار کے حوالے سے بتایا فوجیوں نے غزہ شہر میں فلسطینی امداد کے متلاشیوں کے ایک گروپ پر فائرنگ کر دی جو ”خطرناک طریقے سے”ان کے قریب پہنچے۔

    نیوزی لینڈ نے حماس کو دہشت گرد تنظیم نامزد کردیا

    ٹائمز آف اسرائیل کے حوالے سے ایک فوجی اہلکار نے کہا کہ ہجوم کے کچھ ارکان نے اسرائیلی فورسز کی طرف بڑھنا شروع کیا جو امداد کی ترسیل کی نگرانی کر رہے تھے کہ اس دوران انہیں خطرہ محسوس اور فوجیوں نے فائرنگ کر دی۔

  • نیوزی لینڈ نے حماس کو دہشت گرد تنظیم نامزد کردیا

    نیوزی لینڈ نے حماس کو دہشت گرد تنظیم نامزد کردیا

    نیوزی لینڈ بھی حماس کو دہشت گرد تنظیم قرار دینے والے ممالک کی فہرست میں شامل ہوگیا ہے۔

    غیر ملکی ذرائع ابلاغ کے مطابق نیوزی لینڈ کے حکام کا اس حوالے سے کہنا ہے کہ سات اکتوبر کے حملوں نے اس تصوّر کو توڑ دیا ہے کہ اس کے سیاسی اور عسکری ونگز الگ کیے جا سکتے ہیں۔

    نیوزی لینڈ کی حکومت کا کہنا ہے کہ مجموعی طور پر تنظیم ان خوفناک دہشتگرد حملوں کی ذمہ داری قبول کرتی ہے۔

    نیوزی لینڈ کی جانب سے اپنے ملک میں حماس کے اثاثوں کو منجمد کرنے اور اسے کسی قسم کی معاونت فراہم کرنے پر پابندی لگانے کا فیصلہ کیا ہے۔

    دوسری جانب غزہ میں اسرائیلی فوج کی بربریت تھمنے کا نام نہیں لے رہی، ایک اور افسوسناک واقعے میں اسرائیلی فوج نے مزید 77 فلسطینیوں کو شہید کردیا۔

    غزہ کے وزارت صحت کا اس حوالے سے کہنا ہے کہ غزہ کے جنوب مغربی علاقے میں امداد کے منتظر فلسطینیوں پر اسرائیلی فوج نے فائرنگ کی جس کے باعث 77 فلسطینی جام شہادت نوش کرگئے۔

    ڈھاکا: 7 منزلہ عمارت میں خوفناک آگ بھڑک اُٹھی، 43 افراد ہلاک

    وزارت صحت کے بیان میں کہا گیا ہے کہ غزہ میں پیش آنے والے افسوسناک سانحے میں شہید ہونے والے فلسطینیوں کی تعداد 100 سے زائد ہوسکتی ہے۔

  • چور کی انوکھے انداز میں پوسٹ آفس سے رقم چرانے کی کوشش، ویڈیو وائرل

    چور کی انوکھے انداز میں پوسٹ آفس سے رقم چرانے کی کوشش، ویڈیو وائرل

    ناٹنگھم: معذور چور نے لمبے دھاتی چمچے کے ذریعے پوسٹ آفس سے نقد رقم چرانے کی کوشش کی جس کی ویڈیو سوشل میڈیا پر وائرل ہورہی ہے۔

    غیر ملکی ذرائع ابلاغ کے مطابق وائرل ہونے والی ویڈیو میں دیکھا جاسکتا ہے کہ نشے کا عادی چور دوران واردات اپنا ڈیبٹ کارڈ جائے وقوعہ پر بھول کر فرار ہوجاتا ہے، جسے بعد میں پولیس نے گرفتار کرلیا۔

    اطلاعات کے مطابق ایک نشے کے عادی چور نے ڈاک خانے کی سیکیورٹی اسکرین کے نیچے سے بڑی نقد رقم چرانے کی کوشش کی تھی، اس مقصد کے لئے اس نے لمبے چمچے کا سہارا لیا۔

     

    View this post on Instagram

     

    A post shared by Nottinghamshire Police (@nottspolice)

    سی سی ٹی وی میں دیکھا جاسکتا ہے کہ ایک 36 سالہ شخص نے ایک بڑے دھاتی چمچ کو شیشے کے نیچے سے اندر ڈالا اور رقم نکالنے کی کوشش کرنے لگا۔

    دوسری کھڑکی پر موجود ایک الرٹ کاؤنٹر اسسٹنٹ نے اس معاملے کو دیکھا تو الارم بجا دیا جس نے سیکورٹی کے دھوئیں کے نظام کو متحرک کردیا۔

    جیسے ہی پوسٹ آفس میں دھواں بھرنے لگا چور جائے وقوعہ سے فرار ہوگیا، مذکورہ معاملہ دیکھ کر سوشل میڈیا صارفین بھی حیران رہ گئے۔

    پولیس ذرائع کا کہنا ہے کہ ملزم نے نقدی چوری کرنے کی کوشش کرنے کا اعتراف کرلیا ہے اور افسران کو بتایا ہے کہ وہ ذہنی صحت کے مسائل کا شکار ہے۔

    اس نے یہ بھی کہا کہ اس نے پوسٹ آفس میں داخل ہونے سے کچھ دیر پہلے کوکین اور ہیروئن لے لی تھی۔پولیس کی جانب سے مزید کارروائی کا آغاز کردیا گیا ہے۔

  • اننت امبانی نے چند ماہ میں 108 کلو وزن کیسے کم کیا؟

    اننت امبانی نے چند ماہ میں 108 کلو وزن کیسے کم کیا؟

    بھارت کی امیر ترین شخصیت مکیش امبانی کے بیٹے اننت امبانی کی شادی کی تیاریاں زورشور سے جاری ہیں جبکہ دنیا بھر سے مہمانوں کی آمد کا سلسلہ بھی جاری ہے۔

    غیر ملکی ذرائع ابلاغ کے مطابق اننت امبانی کی والدہ نیتا امبانی نے 2017 میں ایک انٹرویو میں بتایا تھا کہ اننت امبانی دمے کی بیماری کا شکار تھے جس کے باعث انہیں بہت زیادہ سٹیر وائڈز لینا پڑتے تھے۔

    اننت امبانی کی والدہ نیتا امبانی کے مطابق دمے کے بیماری کے لیے استعمال کی جانے والی ادویات کے باعث اننت امبانی کا وزن بہت تیزی سے بڑھ گیا تھا۔

    بیماری کے باعث اننت امبانی کا وزن 208 کلو تک پہنچ گیا تھا، تاہم اُن کے فٹنس کوچ ونود چنا کی جانب سے انہیں وزن کم کرنے کے لئے پوری معاوت فراہم کی گئی، جس کے نتیجے میں انہوں نے صرف 18 ماہ میں 108 کلو وزن کم کر لیا۔

    انٹرویو میں فٹنس کوچ ونود چنا کا کہنا تھا کہ اننت امبانی کے لیے ڈائیٹ پلان تیار کیا تھا جس کے مطابق وہ صحت مند کھانا کھانے لگے تھے۔

    اننت امبانی اس ڈائٹ پلان کے تحت ایک دن میں 1200 سے 1500 کیلوریز استعمال کرتے تھے، اس کے علاوہ اُن کے کوچ نے سخت ورزش کا پلان بھی تیار کیا جس میں یوگا اور کارڈیو جیسی ورزشوں کو شامل کیا گیا تھا۔

    اننت امبانی ایک دن میں 21 کلومیٹر تک واک کرتے تھے، اس کے علاوہ وہ ہر روز چھ گھنٹوں تک ورزش کرتے جس سے اُن کے جسم کی چربی کم ہوتی اور بڑی مقدار میں کیلوریز جلتی تھیں۔

    مکیش امبانی کے چھوٹے بیٹے کی شادی، ڈھائی ہزار پکوانوں کا مینیو تیار

    اس سارے فٹنس پلان پر مکمل عمل کر کے اننت امبانی نے 18 ماہ کے دوران 108 کلو وزن قدرتی طریقے سے کم کرلیا تھا۔