اسلام آباد : اڑی واقعے کے الزام میں بھارتی جیل میں دو پاکستانی نوجوانوں کے قید ہونے کا انکشاف ہوا ہے۔ دونوں لڑکےغلطی سے سرحد پار کرگئے تھے۔ دونوں نوجوانوں کی وطن واپسی کیلئے پاکستانی ہائی کمیشن نے کوششیں شروع کردی ہیں۔
تفصیلات کے مطابق پاکستانی حکام جان بوجھ کر سرحد پار کرنے والے بھارتی فوجی کو بھی ان کے حوالے کر دیتے ہیں، لیکن چھوٹے دل کا بھارت غلطی سے سرحد پار کرنے والے معصوم پاکستانیوں پر سنگین الزام تھوپ دیتا ہے۔
انکشاف ہوا ہے کہ بھارتی فوج نے اُڑی حملہ آوروں کے گائیڈ ہونے کا الزام لگا کر دو پاکستانی لڑکوں کو جیل میں ڈال رکھا ہے جبکہ دونوں نوجوان غلطی سے سرحد پار کر گئے تھے۔
فیصل کے بھائی نے بتایا کہ بھائی سے صرف ایک باربات ہوئی کب رہائی ملے گی اس حوالے سے کچھ نہیں پتہ ہے، دوسری جانب ذرائع کا کہنا ہے کہ پاکستانی ہائی کمیشن نے بھارتی جیل میں اڑی واقعے کے الزام میں قید 2 کمسن پاکستانی نوجوانوں کی وطن واپسی کے لیے کوششیں شروع کردی ہیں۔
حکام کا کہنا ہے کہ معاملہ حساس نوعیت کا ہے اس لیے اسے احتیاط سے دیکھ رہے ہیں۔ اڑی حملے میں پاکستانی لڑکوں کو ملوث کرنے کی سازش ناکام ہوچکی ہے۔
دوسری جانب خود بھارتی تحقیقاتی اداروں کا ماننا ہے کہ ستمبر دو ہزار سولہ میں اُڑی واقعہ پیش آیا۔ بھارتی بیس کیمپ پر حملے میں کئی فوجی مارے گئے تھے، ثبوت نہ ہونے کے باوجود بھارت نے حملے کا الزام پاکستان پر عائد کیا تھا۔
