واشنگٹن: امریکی انتظامیہ کی جانب سے اسرائیلی فوج پر ممکنہ پابندیوں کے خدشے کے پیش نظر اسرائیل بوکھلاہٹ کا شکار ہو گیا ہے۔
بی بی سی کے مطابق امریکا مقبوضہ مغربی کنارے میں انسانی حقوق کی مبینہ خلاف ورزیوں پر اسرائیل کی نیتزہ یہودا بٹالین کو نشانہ بنائے گا۔
گزشتہ ہفتے امریکی سیکریٹری خارجہ انٹونی بلنکن سے جب پوچھا گیا کہ مقبوضہ مغربی کنارے میں انسانی حقوق کی خلاف ورزیوں پر اسرائیلی ڈیفنس فورسز کی یونٹوں کے لیے امریکی فوجی امداد میں کٹوتی کی جا سکتی ہے؟ تو انھوں نے جواب تھا کہ آئندہ دنوں میں ایسی کسی کٹوتی کی امید کی جا سکتی ہے۔
اسرائیل کے ملٹری انٹیلیجنس چیف 7 اکتوبر کے حملے کی ناکامی پر مستعفی
اسرائیلی وزیر اعظم نیتن یاہو نے واشنگٹن کو خبردار کیا ہے کہ وہ ملک کی فوج پر عائد کسی بھی قسم کی پابندیوں کو مسترد کر دیں گے، اگر کوئی یہ سمجھتا ہے کہ وہ اسرائیلی فوج کی ایک یونٹ پر پابندیاں لگا سکتا ہے تو میں اپنی پوری طاقت سے اس کا مقابلہ کروں گا۔
میڈیا رپوٹس کے مطابق مغربی کنارے میں اسرائیلی فوج کی جانب سے انسانی حقوق کی پامالی پر امریکی انتظامیہ نے نیتزہ یہودا بٹالین پر پابندی پر کا امکان ظاہر کیا ہے، واضح رہے کہ اسرائیل کے اہم اتحادی واشنگٹن نے اس سے قبل کبھی بھی آئی ڈی ایف یونٹ کی امداد معطل نہیں کی ہے۔
ادھر اسرائیلی فوج کا کہنا ہے کہ نیتزہ یہودا بٹالین بین الاقوامی قوانین کے مطابق کام کر رہی ہے، اسرائیل کے وزیر دفاع یوو گیلنٹ نے امریکا سے مطالبہ کیا کہ وہ نیتزہ یہودا پر پابندی کا اپنا ارادہ واپس لے۔
