Tag: us-welcomes

واشنگٹن : امریکا نے طالبان کی قید سے آسٹریلوی اور امریکی پروفیسرز کیون کنگ اور ٹموتھی وییکس کی بازیابی کا خیرمقدم کرتے ہوئے کہا امریکی شہریوں کی حفاظت صدر ٹرمپ کی اولین ترجیح ہے۔

تفصیلات کے مطابق امریکااورطالبان کےدرمیان مذاکراتی عمل میں بڑی پیشرفت سامنے آئی ، ترجمان وائٹ ہاؤس نے طالبان کی قید سے آسٹریلوی اور امریکی پروفیسرز کیون کنگ اور ٹموتھی وییکس کی بازیابی کا خیر مقدم کیا۔

ترجمان کا کہنا تھا کہ امریکی اور آسٹریلوی شہری کی بازیابی پرافغان حکومت کےشکرگزارہیں، امریکی شہریوں کی حفاظت صدر ٹرمپ کی اولین ترجیح ہے، شہریوں کی بازیابی کی ٹرمپ انتظامیہ کوششیں جاری رکھےگی اور یقینی بنایا جائے گا کہ افغان سرزمین امریکا، اتحادیوں کیخلاف استعمال نہ ہو۔

مزید پڑھیں : طالبان نے مغوی آسٹریلوی اور امریکی شہری رہا کر دیے

یاد رہے گذشتہ روز افغان طالبان نے اپنے تین رہنماؤں کی رہائی کے بدلے مغوی آسٹریلوی اور امریکی شہری رہا کردیے تھے، غیرملکی شہریوں کو اغوا کرکے افغان صوبے زابل میں رکھا گیا تھا، امریکی میڈیا نے بھی رہائی کی تصدیق کی تھی۔

خیال رہے امریکی پروفیسر کیون کنگ اور آسٹریلوی پروفیسر ٹموتھی ویکز کابل میں امریکی یونی ورسٹی کے اساتذہ تھے، 2016 میں انہیں کابل میں امریکی یونی ورسٹی کے باہر سے اغوا کیا گیا تھا۔

اس سے قبل انس حقانی سمیت طالبان کے 3سینئر رہنماؤں کو بگرام جیل سے رہا کیا گیا تھا ، بعد ازاں تینوں دوحہ منتقل کردیا گیا تھا۔