کابل : طالبان نے چند ہفتوں کےاندر متعدد افغان پائلٹوں کو ٹارگٹ کرکے قتل کرڈالا ، ترجمان طالبان نے کہا ہے کہ یہ پائلٹ اپنے ہی لوگوں پر بم گراتے ہیں اس لیےمار رہے ہیں۔
تفصیلات کے مطابق افغانستان سے امریکی فوج کے انخلا کے بعد طالبان نےافغان پائلٹوں کی ٹارگٹ کلنگ شروع کردی ہے ، طالبان نے تصدیق کی ہے کہ چند ہفتوں کےاندر کئی پائلٹ ٹارگٹ کرکے قتل کئے ہیں۔
ترجمان طالبان نےبیان میں کہا ہے یہ پائلٹ اپنے ہی لوگوں پر بم گراتے ہیں اس لیے مار رہے ہیں۔
خبر رساں ایجنسی رائٹرز نے دعویٰ کیا ہے کہ امریکی حکام بھی افغان پائلٹوں کی ٹارگٹ کلنگ سے آگاہ ہیں، پائلٹوں کو جنگ سے زیادہ چھٹی کے دنوں میں جان کا خطرہ رہتا ہے۔
دوسری جانب افغانستان میں طالبان اورافغان فورسز کے درمیان جھڑپیں جاری ہیں ، ترجمان طالبان کا کہنا ہے طا لبان نےصوبے پروان کے ایک اور ضلع پر قبضہ کرلیا ۔
افغان فورسز نے دعوی کیا ہے کہ انہوں نے طالبان سے قنندوز ،ہرا ت اور قندھار کے مخلتف اضلاع کا کنٹرول واپس لے لیا ہے جبکہ مختلف صوبوں میں آپریشن کےدوران سترسے زائدطالبان مارے گئے۔
اس حوالے سے ترجمان طالبان کا کہنا ہے ہرات کے کچھ اضلاع اب بھی ہمارے کنٹرول میں ہیں۔
اس سے قبل امریکا نے روس اور چین پر آرمز کنٹرول معاہدے سے دستبرداری کی امریکی دھمکیوں کے باوجود جوہری منصوبوں سے مکمل طور پر آگاہ نہیں کرنے کا الزام عائد کرتے ہوئے مزید شفافیت کا مطالبہ کیا تھا۔