ARYNews.tv | Urdu – Har Lamha Bakhabar

Tag: US

  • عمران خان وزیراعظم بننے کے بعد پہلے دورے پر امریکہ جائیں گے ، ذرائع

    عمران خان وزیراعظم بننے کے بعد پہلے دورے پر امریکہ جائیں گے ، ذرائع

    اسلام آباد : پاکستان تحریک انصاف کے سربراہ عمران خان وزیراعظم بننے کے بعد دورہ امریکہ کریں گے اور جنرل اسمبلی کے اجلاس سے پہلی مرتبہ خطاب کریں گے۔

    تفصیلات کے مطابق پی ٹی آئی کے چیئرمین عمران خان حلف اٹھانے کے بعد اپنے پہلے بین الاقوامی دورے پر امریکا جائیں گے، وہ ستمبر کے دوسرے ہفتے میں امریکا کا دورہ کریں گے۔

    ذرائع کا کہنا ہے کہ دورہ امریکا میں عمران خان جنرل اسمبلی کے اجلاس سے پہلی مرتبہ خطاب کریں گے اور اقوام متحدہ میں مقبوضہ کشمیرمیں بھارتی مظالم کو اجاگرکریں گے۔

    ذرائع کے مطابق دورے کے دوران عمران خان کی اعلیٰ امریکی انتظامیہ سے ملاقاتیں ہوں گی اور وہ امریکی انتظامیہ کو نئے پاکستان کے نظریے سے آگاہ کریں گے جبکہ دہشت گردی کے خلاف جنگ سمیت خارجہ پالیسی پر اعتماد میں لیں گے۔

    ملاقاتوں میں پاک امریکا خراب تعلقات کو بہتر بنانے پر تبادلہ خیال ہوگا جبکہ ایف اے ٹی ایف کی گرے لسٹ سے پاکستان کا نام ہٹانے پر اور پاکستانی معیثت میں بہتری کے لئے باہمی تعاون کے فروغ پر بھی بات ہوگی۔

    ذرائع کا کہنا ہے کہ عمران خان اجلاس کی سائیڈ لائنز پر مختلف عالمی رہنماوں سے ملاقاتیں کریں گے، عمران خان کی چینی صدر، ایرانی صدر،افغان صدر سے ملاقات متوقع ہے جبکہ سعودی ولی عہد، روسی صدر اور بھارتی وزیراعظم سے بھی ملاقات کا امکان ہے۔

    ملیحہ لودھی عمران خان کی بطور وزیراعظم پاکستان معاونت کریں گی، ملیحہ لودھی کو دوبارہ اقوام متحدہ میں مستقل پاکستانی مندوب تعینات کیا جائے گا۔

    ذرائع کے مطابق ملیحہ لودھی فی الوقت پاکستان میں اپنے عہدے سے استعفیٰ دینے آئی ہیں، آئندہ چند روزمیں ملیحہ لودھی سمیت مختلف پاکستانی سفیر مستعفی ہوں گے۔

  • امریکا ایران پر پابندیاں لگا کر پچھتائے گا: حسن روحانی

    امریکا ایران پر پابندیاں لگا کر پچھتائے گا: حسن روحانی

    تہران: ایرانی صدر حسن روحانی نے کہا ہے کہ امریکا ایران پر پابندیاں لگا کر پچھتائے گا، ڈونلڈ ٹرمپ پر کبھی اعتماد نہیں کرسکتے۔

    ان خیالات کا اظہار انہوں نے مقامی ٹی وی کو انٹرویو دیتے ہوئے کیا، حسن روحانی نے ایران پر امریکی پابندیوں کے اعلان پر سخت موقف اختیار کیا۔

    انہوں نے کہا کہ امریکا کبھی بھی قابل اعتماد نہیں ہوسکتا، امریکی صدر ڈونلڈ ٹرمپ کو ثابت کرنا ہوگا کہ وہ مذاکرات سے تنازع کا حل چاہتے ہیں، موجودہ حالات مذاکرات کے بجائے مزید تنازعات کو جنم دے رہے ہیں۔

    ایرانی صدر کا کہنا تھا کہ ایک شخص کے ہاتھ میں چوقو ہو اور وہ چاقو کے ہمراہ مذاکرات کرنا چاہے تو یہ ممکن نہیں، پہلے اسے چاقو اپنی جیب رکھنا ہوگا۔

    ان کا کہنا تھا کہ ایران اقتصادی پابندیوں میں رہتے ہوئے مذاکرات نہیں کرسکتا، ٹرمپ کی جانب سے ایران جوہری معاہدے سے دست برداری کا اعلان کیا گیا اس کے بعد سے ہی ان پر بھروسہ اور اعتماد نہیں رہا۔

    ڈونلڈ‌ ٹرمپ نے ایران پر اقتصادی پابندیاں‌ عائد کردیں

    حسن روحانی کا مزید کہنا تھا کہ ایران نے ہمیشہ مذاکرات کو ترجیح دی ہے، مگر موجودہ جو حالات ہیں ایسے میں بات چیت ممکن نہیں ہے، امریکا کو اپنے فیصلوں سے پیچھے ہٹنا ہوگا، ایران ہمیشہ سے سفارت کاری کا حامی رہا ہے۔

    خیال رہے کہ آج امریکی صدر ڈونلڈ ٹرمپ نے ایگزیکٹو آرڈر پر دستخط کردئیے ہیں، آج رات 12 بجے کے بعد اقتصادی شعبے پر پابندیوں کا اطلاق ہوجائے گا، 5 نومبر کو توانائی اور تیل کی صنعتوں پر پابندیاں لگائی جائیں گی۔

    دوسری جانب یورپی یونین کی جانب سے امریکی فیصلے کو مسترد کرتے ہوئے ایران کا ساتھ دینے کا فصیلہ کیا گیا ہے، اور اپنے کاروبار بھی ایران کے ساتھ جاری رکھنے عزم ظاہر کیا ہے۔

  • چین نے نئے ٹیکسز کے باعث امریکا کے سامنے گھٹنے ٹیکے ہیں، ڈونلڈ ٹرمپ

    چین نے نئے ٹیکسز کے باعث امریکا کے سامنے گھٹنے ٹیکے ہیں، ڈونلڈ ٹرمپ

    واشنگٹن : امریکی صدر ڈونلڈ ٹرمپ نے اپنی معاشی پالیسیوں پر تنقید کرنے والوں کو نشانہ بناتے ہوئے کہا گیا ہے کہ ’چین پر محصولات عائد کرنے سے بیجنگ مذاکرات کرنے کے لیے امریکا کے سامنے سرنگوں ہوا ہے‘۔

    تفصیلات کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر محصولات کے حوالے سے بنائی جانے والی پالیسی پر تنقید کرنے والوں کو تنقید کا نشانہ بناتے ہوئے دعویٰ کیا ہے کہ بیجنگ پر ٹیکس عائد کرنے سے چین امریکا کے ساتھ مذاکرات کرنے کے لیے تیار ہوا ہے۔

    غیر ملکی خبر رساں ادارے کا کہنا تھا کہ ٹرمپ نے ٹویٹر پر دعویٰ کیا تھا کہ چینی اشیاء پر ٹیکس عائد کرنے کے بعد کسی کو یقین نہیں تھا کہ چین مذاکرات کے لیے امریکا کے سامنے سرنگوں ہوجائے گا۔

    امریکی صدر ڈونلڈ ٹرمپ کا کہنا تھا کہ مجھے علم تھا چینی اشیاء پر محصولات عائد کرنے سے نتائج اچھے ہی آئیں گے، لیکن چند بے وقوف لوگ مجھ پر تنقید کررہے تھے اور میری معاشی پالیسیوں کا مذاق اڑا رہے تھے۔

    غیر ملکی خبر رساں ادارے کے مطابق ڈونلڈ ٹرمپ کا کہنا ہے کہ ٹیکسز کے حوالے سے امریکی پالیسی میں تبدیلی سے بہتر نتائج سامنے آئیں گے، جس کے باعث امریکی معیشت میں اضافہ ہوگا۔

    غیر ملکی خبر رساں ادارے کا کہنا تھا کہ ڈونلڈ ٹرمپ کی پالیسیوں سے مقامی تاجروں میں امید کی نئی کرن پیدا ہوئی ہے، کیوں کہ چین کی مارکیٹ میں 27 فیصد تک کمی واقع ہوئی ہے۔

    امریکی صدر ڈونلڈ ٹرمپ نے ٹویٹر پر کیے گئے ٹویٹ میں ’امریکا فرسٹ‘ کا نعرہ بھی تحریر کیا تھا۔

    غیر ملکی خبر رساں ادارے کا کہنا تھا کہ ڈونلڈ ٹرمپ نے امریکا درآمد کی جانے والی چینی مصنوعات پر 34 ارب ڈالرز کے محصولات عائد کرچکے ہیں، جبکہ مستقبل میں امریکا کی جانب سے چین پر مزید 16 ارب ڈالر کے ٹیکس عائد کیے جائیں گے۔

  • ترکی نے بھی امریکی وزراء پر پابندی عائد کردی

    ترکی نے بھی امریکی وزراء پر پابندی عائد کردی

    انقرہ : ترک صدر رجب طیب اردوگان نے امریکی پابندیوں پر رد عمل دیتے ہوئے حکومتی اراکین کو امریکی وزیر داخلہ اور وزیر انصاف کے ترکی میں موجود اثاثے منجمد کرنے کے احکامات جاری کردیئے۔

    تفصیلات کے مطابق امریکی پادری کی ترکی میں گرفتاری کے بعد امریکا کی جانب سے ترک وزراء پر پابندیاں لگانے کے بعد سے دونوں ملکوں کے درمیان تنازعہ مزید بڑھتا جارہا ہے، امریکا کے جواب میں ترک حکومت نے بھی امریکی وزیر داخلہ اور وزیر انصاف پر پابندیاں لگا دیں ہیں۔

    غیر ملکی خبر رساں ادارے کا کہنا تھا کہ ترکی نے امریکی اقدامات کے رد عمل میں امریکی وزیر انصاف اور وزیر داخلہ کے ترکی میں موجود اثاثہ جات کو منجمد کرنے کا اعلان کردیا ہے۔

    ترک میڈیا کے مطابق رجب طیب اردوگان نے بدھ کے روز حکومتی اراکین کو حکم دیا کے ترکی میں موجود امریکی وزیر داخلہ اور انصاف کے اثاثے سیل کردیئے جائیں، ان کا کہنا تھا کہ ’ہم نے امریکا کی بے جا پابندیوں کے باوجود بہت صبر کا مظاہرہ کیا‘۔

    غیر ملکی خبر رساں ادارے کا کہنا تھا کہ ترک صدر کے احکامات پر امریکی وزراء کے ترکی میں موجود اثاثوں کو منجمد کرنے کا حکم تو دیا گیا ہے تاہم تاحال یہ واضح نہیں ہے کہ ترکی میں امریکی وزراء کے اثاثے موجود بھی ہیں یا نہیں۔

    خیال رہے کہ امریکی پادری اینڈریو براؤنسن کی گرفتاری میں اہم کردار ادا کرنے والے ترک وزیر قانون و انصاف عبدالحمید گل اور وزیر داخلہ سلیمان سویلو پر امریکا نے پابندیاں عائد کردی ہیں۔

    غیر ملکی خبر رساں ادارے کا کہنا ہے کہ ترکی فورسز کی زیر حراست امریکی پادری اینڈریو براؤنسن پر سنہ 2016 کی ناکام فوجی بغاوت میں مبینہ دہشت گردی اور کالعدم سیاسی گروپ سے تعلقات کا الزام ہے۔

  • امریکی پارلیمانی انتخابات میں بھی روس مداخلت کرسکتا ہے: انٹیلی جنس

    امریکی پارلیمانی انتخابات میں بھی روس مداخلت کرسکتا ہے: انٹیلی جنس

    واشنگٹن: امریکی انٹیلی جنس نے امریکا میں ہونے والے پارلیمانی انتخابات میں بھی روسی مداخلت کا عندیہ دے دیا۔

    تفصیلات کے مطابق امریکا میں 2016 میں صدارتی انتخابات ہوئے تھے جس میں روس کی مداخلت کرنے کے شواہد سامنے آئے تھے تاہم اب 2018 کے امریکی پارلیمانی انتخابات میں بھی روسی مداخلت کا خطرہ ہے۔

    امریکی میڈیا کے مطابق امریکا کے انٹیلی جنس ڈائریکٹر ’ڈین کوٹس‘ نے روس پر امریکی پارلیمانی انتخابات اور رائے عامہ پر اثر انداز ہونے کا الزام عائد کرتے ہوئے ماسکو کو شدید تنقید کا نشانہ بنایا ہے۔

    انہوں نے کہا کہ انتخابات میں چند ماہ ہی باقی ہیں جبکہ روس مداخلت کے لیے اپنی تیاری جاری رکھے ہوئے ہے، جس کا مقصد انتخابی سرگرمیوں اور رائے عامہ پر اثر انداز ہونا ہے۔

    ڈین کوٹس کا کہنا تھا کہ اب ہم بھی وسیع پیمانے پر اقدامات کر رہے ہیں، اور روس کو کسی صورت اپنے عزائم میں کامیاب نہیں ہونے دیں گے، ان کی سازشوں پر نظر رکھی جارہی ہے۔

    ٹرمپ کا امریکی انتخابات میں روسی مداخلت کے معاملے پر تحقیقات روکنے کا مطالبہ

    ان کا مزید کہنا تھا کہ روس جیسے ہمارے حریف ممالک نہ صرف انتخابی عمل میں مداخلت کرتے ہیں بلکہ وہ امریکا کو تقسیم کرنے کے لیے کوشاں ہیں۔

    یاد رہے کہ نومبر 2016 میں ہونے والے صدارتی انتخاب سے قبل ماہ اکتوبر میں امریکی حکومت نے روس پر ڈیموکریٹک پارٹی پر سائبر حملوں کا الزام عائد کیا تھا۔

    واضح رہے کہ سابق امریکی صدر باراک اوباما بھی اس عزم کا اظہار کر چکے ہیں کہ امریکی صدارتی انتخابات میں مبینہ مداخلت کرنے پر روس کے خلاف کارروائی کی جائے گی۔

  • امریکا میں دفاعی بجٹ منظور، پاکستان کی فوجی امداد میں بڑی کٹوتی

    امریکا میں دفاعی بجٹ منظور، پاکستان کی فوجی امداد میں بڑی کٹوتی

    واشنگٹن: امریکی سینیٹ نے اربوں ڈالر کا دفاعی بجٹ منظور کرلیا، جبکہ پاکستان کی فوجی امداد میں بڑی کٹوتی کردی۔

    تفصیلات کے مطابق امریکی سینیٹ کی جانب سے 716 ارب ڈالر کا دفاعی بجٹ منظور کیا گیا ہے جبکہ پاکستان کی امداد میں کٹوتی کرکے 15 کروڑ ڈالر کردی۔

    امریکی میڈیا کے مطابق پاکستان کو امداد بارڈر سیکیورٹی کی بہتری کے لیے دی جائے گی، دفاعی بجٹ ایوان نمائندگان پہلے ہی منظور کرچکا ہے۔

    اس سے قبل پاکستان کے لیے امداد کی مد میں 75 کروڑ سے 1 ارب ڈالر مختص کیے جاتے تھے، تاہم اب امریکا کی جانب سے امداد کی مد میں بڑی کٹوتی کی گئی ہے۔

    امریکی سینیٹ نے نیشنل ڈیفنس آتھورائزیشن ایکٹ نامی ایک بل بھی دس کے مقابلے میں 87 ووٹوں سے منظور کیا، بِل میں پاکستان کے لیے فوجی امداد کی مد میں 15 کروڑ ڈالر مختص کیے گئے۔

    امریکا کی جانب سے مذکورہ امداد پاکستان کو اپنی سرحدوں کی سیکیورٹی بہتر بنانے کے لئے دی جائے گی۔

    امریکا نے پاکستان کی25کروڑ 50 لاکھ ڈالر کی فوجی امداد روک لی ، ترجمان وائٹ ہاؤس

    خیال رہے کہ گزشتہ سال امریکانے اپنے دفاعی بجٹ میں پاکستان کے لیے’’ کولیشن سپورٹ فنڈ‘‘ کی مد میں 70 کروڑ ڈالر مختص کیے تھے، مذکورہ بالا بل میں امریکی امداد طالبان کے خلاف کارروائی سے مشروط کرنے کی شق ختم کر دی گئی ہے۔

    یاد رہے کہ رواں سال جنوری میں امریکی صدر ڈونلڈ ٹرمپ نے پاکستان کی دہشت گردی کے خلاف قربانیوں کو نظر انداز کرتے ہوئے ڈومور کا مطالبہ کیا تھا، جبکہ امریکا نے پاکستان کی 25 کروڑ 50 لاکھ ڈالر کی فوجی امداد روک بھی لی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • تجارتی جنگ، چین کا امریکا کو اہم مشورہ

    تجارتی جنگ، چین کا امریکا کو اہم مشورہ

    بیجنگ: امریکی صدر ڈونلڈ ٹرمپ کی جانب سے چینی درآمدات پر اضافی محصولات کی دھمکی کی صورت میں چین نے امریکا کو اہم مشورہ دے دیا۔

    تفصیلات کے مطابق چین اور امریکا کے درمیان سخت تجارتی جنگ جاری ہے، دونوں ملکوں کی جانب سے ایک دوسرے کی مصنوعات پر مزید اضافی محصولات عائد کرنے کی دھمکی دی ہے۔

    غیر ملکی خبر رساں ادارے کے مطابق چینی وزیر خارجہ ’وانگ یی‘ نے کہا ہے کہ تجارتی جنگ کے دوران امریکا اپنے ’دماغ کو ٹھنڈا‘ رکھے اور سوچ سمجھ کر فیصلے کرے۔

    انہوں نے کہا کہ امید کرتے ہیں کہ امریکا اپنی تجارتی پالیسی مرتب کرتے ہوئے عقل مندی اور دانش مندی سے کام لے گا، اور معاملات کو بہتر سمت لے کر جائے گا۔

    چین اور امریکا کے درمیان تاریخ کی سب سے بڑی تجارتی جنگ

    چینی وزیر خارجہ کا کہنا تھا کہ امریکا کی جانب سے چین کو دبانے کے لیے جو بھی اقدامات کیے جارہے ہیں وہ کسی کام کے نہیں ہیں، چین اپنی تجارت جاری رکھے گا۔

    خیال رہے کہ چینی وزیر خارجہ وانگ یی کا یہ بیان ٹرمپ انتظامیہ کی جانب سے چینی امپورٹس پر مزید محصولات کے نفاذ کی دھمکی کے تناظر میں سامنے آیا ہے، جبکہ چین نے اپنی تجارتی پالیسی واضح رکھی ہے۔

    یاد رہے کہ امریکی حکومت نے چینی امپورٹس پر مزید 200 بلین ڈالر کی اضافی امپورٹ ڈیوٹی لگانے کا ارادہ ظاہر کیا ہے، علاوہ ازیں صدر ڈونلڈ ٹرمپ نے اپنی وزارت تجارت کو چینی مصنوعات پر محصولات کے نفاذ کا دائرہ وسیع کرنے کی ہدایت کر رکھی ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ایرانی معیشت ابتر صورتحال کا شکار، حسن روحانی پارلیمنٹ طلب

    ایرانی معیشت ابتر صورتحال کا شکار، حسن روحانی پارلیمنٹ طلب

    تہران: ایرانی پارلیمان کے ارکان نے ملکی معیشت کی ابتر صورت حال پر ایرانی صدر حسن روحانی کو جواب دہی کے لیے ایوان میں طلب کر لیا۔

    تفصیلات کے مطابق امریکا کی جانب سے ایران پر اقتصادی پابندیوں کے بعد ملک کی معیشت بری صورت حال سے گزر ہی ہے، اسی تناظر میں ایران صدر کو پارلیمنٹ میں طلب کیا گیا ہے۔

    غیر ملکی خبر رساں ادارے کے مطابق ایرانی پارلیمان کے ارکان نے مطالبہ کیا ہے کہ صدر حسن روحانی ایک ماہ کے اندر ایوان میں پیش ہوکر ملک کی روز بروز ابتر ہوتی اقتصادی صورت حال پر جواب دیں، اور حکمت عملی واضح کریں۔

    قبل ازیں اسپیکر علی لاری جانی نے سرکاری ٹی کو انٹرویو دیتے ہوئے کہا تھا کہ حسن روحانی کو ایک ماہ میں پارلیمان کے اجلاس میں شرکت کرنا ہو گی اور مختلف معاشی ایشوز کے بارے میں وضاحت کرنا ہوگی۔

    ایرانی قوم اپنی پسند کی قیادت کا انتخاب کرے، امریکی وزیر خارجہ

    پارلیمان کے ارکان ایرانی ریال کی قدر سمیت مختلف موضوعات کے بارے میں حسن روحانی سے پوچھ تاچھ کرسکتے ہیں، جب کہ رواں سال اپریل کے بعد سے ایرانی کرنسی کی قدر میں ڈالر کے مقابلے میں نصف تک کمی واقع ہوچکی ہے۔

    خیال رہے کہ ملکی معیشت کی بدترین صورت حال پر ایرانی صدر پر شدید تنقید بھی جاری ہے، جبکہ اسی سال کے اوائل سے مہنگائی، پانی کی کمی، بجلی کی کٹوتی اور مبینہ بدعنوانیوں کے خلاف مختلف شہروں میں احتجاجی مظاہرے بھی کیے گئے ہیں۔

    یاد رہے امریکی صدر ڈونلڈ ٹرمپ نے ایران جوہری معاہدے سے دست بردار ہوکر ایران پر دوبارہ عالمی اقتصادی پابندیاں عائد کردی ہیں جس کے باعث ایرانی معیشت شدید دباؤ کا شکار ہے۔

  • میکسیکو میں مسافر طیارہ حادثے کا شکار، 85 افراد زخمی

    میکسیکو میں مسافر طیارہ حادثے کا شکار، 85 افراد زخمی

    میکسیکو سٹی : براعظم امریکا کے وسط میں واقع ملک میکسیکو میں مسافر طیارہ گرکر تباہ ہوگیا جس کے نتیجے میں 85 افراد زخمی ہوگئے۔

    تفصیلات کے مطابق میکسیکو کے شہر ڈورانگو میں ایرو میکسیکو نامی فضائی کمپنی کا مسافر بردار طیارہ اے ایم 2431 رن وے سے اڑان بھرنے کے فوراً بعد 10 کلو میٹر کے فاصلے پر گر کر تباہ ہوگیا جس کے نتیجے میں 85 افراد زخمی ہوگئے۔

    غیر ملکی خبر رساں ادارے کے مطابق حادثے کا شکار ہونے والے طیارے میں97 مسافروں سمیت 101 افراد سوار تھے، جائے حادثہ سے 85 زخمیوں کو اسپتال منتقل کر دیا گیا ہے۔

    غیر ملکی خبر رساں ادارے سے گفتگو کرتے ہوئے ایرومیکسیکو کے ترجمان نے بتایا کہ جہاز اے ایم 2431 ڈورانگو شہر سے دارالحکومت میکسیکو سٹی جارہا تھا تاہم بد قسمتی سے طیارہ اڑان بھرنے کے چند لمحوں بعد ہی گر کر تباہ ہوگیا۔

    فضائی کمپنی کے ترجمان کا کہنا تھا کہ حادثے کے نتیجے میں جہاز میں آگ بھڑک گئی تھی تاہم خوش قسمتی سے کوئی بھی مسافر آگ کی لپیٹ میں نہیں آیا اور بیشتر مسافر خود جہاز سے باہر نکل آئے تھے۔

    ترجمان کے مطابق زخمیوں کو اسپتال منقل کردیا گیا ہے جہاں انہیں طبی امداد فراہم کی جارہی ہے جبکہ اس حادثے میں خوش قسمتی سے کوئی جانی نقصان نہیں ہوا، تاہم دو افراد کی حالت تشویش ناک ہے۔

    الجزائر کا مسافر طیارہ تباہ، مسافروں سمیت 116 ہلاک

    غیر ملکی خبر رساں ادارے کا کہنا تھا کہ متاثرہ فضائی کمپنی کی جانب سے طیارہ حادثے کی مزید تفصیلات جاری نہیں کی گئی ہیں۔

    دوسری جانب عینی شاہدین کا مقامی میڈیا سے گفتگو کرتے ہوئے کہنا تھا کہ حادثے کے بعد اطراف میں دھواں پھیل گیا تھا جس کے باعث علاقہ مکین کافی خوف زدہ ہوگئے تھے۔

    علاوہ ازیں حکام کا کہنا ہے کہ واقعے کی جانچ پرتال جاری ہے جبکہ لوگوں کو ہر ممکن سہولیات فراہم کرنے کے لیے بھی بھرپور اقدامات کیے جا رہے ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ترکی: دہشت گردی کا مقدمہ، امریکی پادری کی نظر بندی ختم کرنے کی اپیل مسترد

    ترکی: دہشت گردی کا مقدمہ، امریکی پادری کی نظر بندی ختم کرنے کی اپیل مسترد

    انقرہ: ترکی میں دہشت گردی کے الزامات میں قید امریکی پادری کی گھر میں نظر بندی ختم کرنے کی اپیل ترک عدالت نے مسترد کردی۔

    تفصیلات کے مطابق امریکی پادری ’اینڈریو برنسن‘ کو ترکی میں دہشت گردی اور جاسوسی کے الزامات پر مقدمے کا سامنا ہے، جس کے باعث وہ اپنے ہی گھر میں نظر بندی کی زندگی گزار رہے ہیں۔

    غیر ملکی خبر رساں ادارے کے مطابق امریکی پادری کی جانب سے عدالت سے اپیل کی گئی تھی کہ گھر میں نظر بندی ختم کی جائے جسے ترکی کی ایک عدالت نے مسترد کردی۔

    اینڈریو برنسن گذشتہ اکیس ماہ سے ترک سیکیورٹی حکام کی تحویل میں ہیں، قبل ازیں انہیں جیل میں رکھا گیا تھا اور گذشتہ ہفتے ہی انہیں گھر پر منتقل کر کے نظربند کیا گیا تھا۔

    ترکی سیکیورٹی اہلکاروں کی جانب سے مذکوہ گرفتاری پر ترک اور امریکی حکومتوں کے تعلقات میں مزید کشیدگی پیدا ہوچکی ہے، جبکہ ترک استغاثہ نے الزام عائد کر رکھا ہے کہ امریکی پادری جلا وطن مبلغ فتح اللہ گولن کے لیے کام کرتے تھے۔

    ترکی: ناکام فوجی بغاوت میں ملوث ہونے پر 6 صحافیوں کو دس سال قید کی سزا

    خیال رہے کہ ترکی میں ہونے والی ناکام فوجی بغاوت کے بعد ترک حکام کی جانب سے فتح اللہ گولن پر الزامات عائد کیے گئے ہیں کہ وہ اس بغاوت میں ملوث ہیں، جبکہ مذکورہ بغاوت میں ملوث ہونے کے شبہے میں متعدد لوگوں کو سزائیں سنائی جاچکی ہیں۔

    واضح رہے کہ 18 جولائی 2016 کو ترکی میں فوج کے باغی گروہ نے اقتدار پر قابض ہونے کی کوشش کی تھی جسے عوام نے ناکام بنادیا تھا، اس دوران عوام سڑکوں پر نکل کر آئے اور فوجی ٹینکوں کے سامنے ڈٹ گئے تھے جس کے بعد ترک فوج کے باغی ٹولے نے ہتھیار ڈال کر اپنی شکست تسلیم کی تھی اور پھر انہیں گرفتار کرلیا گیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔