آپ نے یہ تو سنا ہوگا کہ خدا جب دینے پر آتا ہے تو چھپر پھاڑ کر دیتا ہے، کچھ اسی طرح کا منظر امریکہ کے شہر کیلیفورنیا کے مکینوں نے بھی دیکھا۔
انہوں نے دیکھا کہ ایک مصروف شاہراہ پر ہزاروں ڈالرز اس طرح بکھرے ہوئے کہ جیسے ابھی ڈالرز کی برسات ہوئی ہو۔ ہوا کچھ یوں تھا کہ کیلیفورنیا فری وے پر بینک سے کرنسی لے کر جانے والے ایک بکتربند ٹرک سے چلتے چلتے بڑی تعداد میں ڈالر سڑک پر بکھر گئے۔
یہ صورتحال دیکھ کر وہاں افراتفری کا منظر پیدا ہوگیا اور لوگوں نے مفت میں نوٹ اٹھانے کے لیے سڑک پر ہی اپنی گاڑیاں روک دیں۔
غیر ملکی خبر رساں ایجنسی کے مطابق گاڑیوں سے اُتر کر لوگوں نے جب نوٹوں سے اپنی جیبیں بھرنا شروع کیں تو پولیس نے موقع پر پہنچ کر حالات کو قابو میں کیا۔
ڈالر لوٹنے کے خواہش مند ان افراد کو پولیس نے اس غیر متوقع انعام کا شکر ادا کرنے کا موقع ہی نہیں دیا اور اس سے قبل ہی کریک ڈاؤن کرکے دو افراد کو گرفتار کرلیا۔
کیلیفورنیا ہائی وے پیٹرول سارجنٹ کرٹِس مارٹن نے نیوز کانفرنس کے دوران بتایا کہ ’لوگوں کی جانب سے فری وے پر رقم لُوٹنے کی کئی ایک ویڈیوز کے ثبوت موجود ہیں۔
انہوں نے کہا کہ ’یہ ہزاروں ڈالر ایک بینک کی ملکیت ہیں جو کہ مختلف افراد کی جانب سے جمع کرائے گئے تھے اور لوگوں کو یہ رقم تھانے میں لازمی واپس کرانا ہوگی۔
یہ واقعہ نقد رقم لے جانے والے بکتربند ٹرک کا دروازہ انٹرسٹیٹ فائیو پر سین ڈیاگو کے قریب فری وے پر کھلنے سے پیش آیا جو کہ کیلی فورنیا میکسیکو سرحد سے کینیڈا تک جاتا ہے۔
سوشل میڈیا پر پوسٹ کی گئی ویڈیو میں لوگوں کو سڑک کے گرد گھومتے، نوٹ اُٹھاتے اور خوشی سے مٹھی بھر کر ہوا میں اُچھالتے ہوئے دیکھا جاسکتا ہے۔
پولیس نے خبردار کیا ہے کہ یہ ویڈیو اُن افراد کو پکڑنے کے لیے استعمال کی جائےگی جو فوری طور پر فری وے سے اٹھائی گئی رقم واپس نہیں کریں گے۔
لوگوں کے لیے بہتر یہ ہی ہے کہ وہ دیانت داری سے اٹھائی گئی رقم پولیس کےحوالے کردیں بصورت دیگر ہمارا انتظار کریں تاکہ ہم انہیں پکڑنے کے لیے ان کے دروازے تک پہنچ جائیں۔
اس واقعے کے بعد پولیس نے دو افراد کو اس وقت گرفتار کیا جب ایک مرد اور ایک عورت جو نقد رقم اُٹھانے کی دوڑ میں شامل ہوئے تھے کی کار غلطی سے لاک ہوگئی جس سے وہاں گاڑیوں کی ایک لمبی قطار لگ گئی اور وہ موقع سے نکلنے میں کامیاب نہ ہوسکے۔
