کان کا میل وہ مواد ہے جو کان کے اندر موجود غدود میں پیدا ہوتا ہے اور اس کے کئی اہم کردار ہیں، یہ میل ہمارے لیے کتنا کارآمد اور مفید ہے اس کا اندازہ آپ کو اس رپورٹ سے ہوجائے گا۔
کانوں کے میل کو عمومی طور پر ایک گندی چیز سمجھا جاتا ہے جس کا صاف کیا جانا ضروری ہے لیکن حقیقت یہ ہے کانوں کا میل بھی ایک حد تک ہمارے لیے فائدہ مند ہے۔
کان کے میل کا کام کیا ہوتا ہے؟
یہ کان میں خشکی ہونے سے روکتا ہے، یہ کان کو دھول کے ذرات سے محفوظ رکھتا ہے اور اس سے انفیکشن کو روکنے میں بھی مدد ملتی ہے۔
کانوں کی صفائی اچھی بات ہے لیکن کانوں کو بالکل ہی صاف کردینا یہ صحت کے لیے مضر بھی ثابت ہوسکتا ہے۔ کانوں کا میل جسے انگریزی میں
ایئرویکس کہتے ہیں، قدرت کا عطا کردہ عجیب مدافعتی نظام ہے۔
اس کی سطح چپکدار ہوتی ہے اور یہی چپ چپاہٹ ہم کو کئی بیماریوں سے محفوظ رکھتی ہے، یہ چپکدار مادہ باہر سے داخل ہونے والے جراثیم ، گردوغبار، فنگس یا کیڑے مکوڑوں کو اندر داخل ہونے سے روکتا ہے۔ ضرر رساں مادے اس پر چپک جاتے ہیں اور اندر تک نہیں پہنچ پاتے۔
کانوں کے میل میں ایک انتہائی اہم خامرہ موجود ہوتا ہے جسے لائزوزوم کہا جاتا ہے، یہ ایک ایسا حیاتیاتی سالمہ ہوتا ہے جو کیمیائی تعامل کے ذریعے خوردبینی حیاتیات کے خلیوں کو توڑ دیتا ہے۔
لائزوزوم جراثیم اور فنگس وغیرہ کو 2 مرحلوں میں ختم کرتا ہے، اوّل جب کوئی جراثیم داخل ہوتا ہے تو میل کی چپکدار سطح اُسے اپنے ساتھ چپکا لیتی ہے۔
اس سے جراثیم کی حرکت رُک جاتی ہے۔ دوسرے مرحلے میں کمیمیائی عمل کے ذریعے اس جراثیم کے خلیات کو توڑ دیا جاتا ہے جس سے مضر صحت مادہ وہیں ختم ہوجاتا ہے۔
