Tag: usman dar

اسلام آباد: وزیر اعظم عمران خان نے نیشنل یوتھ کونسل میں نوجوانوں کی تعداد میں اضافے کا فیصلہ کر لیا ہے۔

اے آر وائی نیوز کے مطابق نوجوانوں کو عالمی سطح پر ملکی نمائندگی کا موقع دینے کے لیے حکومت نے نوجوانوں سے یوتھ کونسل میں شمولیت کے لیے کوائف طلب کر لیے ہیں۔

اس سلسلے میں وزیر اعظم کے معاون خصوصی عثمان ڈار نے نوجوانوں کے نام ایک ویڈیو پیغام جاری کیا ہے۔

ویڈیو پیغام میں عثمان ڈار نے کہا کہ وزیر اعظم نے یوتھ کونسل میں نوجوانوں کی تعداد بڑھانے کا فیصلہ کیا ہے، ملکی نوجوان اب عالمی سطح پر پاکستان کی نمائندگی کر سکیں گے، نوجوانوں کو عالمی پلیٹ فارمز پر مسائل کے حق میں وکالت کا موقع دیا جائے گا۔

انھوں نے کہا نوجوان نیشنل یوتھ کونسل کے پلیٹ فارم سے آگے بڑھیں، پاکستان کا مثبت تشخص دنیا کے سامنے لانے کی ضرورت ہے، کونسل کو نوجوانوں کی ترقی کے لیے پالیسی سازی میں شامل کیا جائے گا۔

عثمان ڈار کا کہنا تھا کہ حکومت نے آن لائن نوجوانوں سے کوائف مانگے ہیں، نوجوان اپنے کوائف کا اندراج کر کے نیشنل یوتھ کونسل کا حصہ بنیں۔

انھوں نے کہا یوتھ کونسل ممبران کا انتخاب میرٹ، شفافیت کے مطابق کیا جائے گا۔

واضح رہے کہ گزشتہ روز وفاقی وزیر برائے منصوبہ بندی ترقی اسد عمر کی زیر صدارت وزیر اعظم کامیاب جوان پروگرام سے متعلق جائزہ اجلاس ہوا تھا جس میں معاونِ خصوصی برائے امورِ نوجوانان عثمان ڈار نے نیشنل یوتھ کونسل، اسکلز فار آل، یوتھ انٹرپرنیور شپ (کاروباروں قرضوں کا پروگرام) اور ٹائیگر فورس کی کارکردگی سے متعلق بریفنگ دی۔

معاونِ خصوصی نے بتایا کہ ملک بھر کے نوجوانوں کو کامیاب جوان پروگرام کے تحت کاروبار کے لیے 100 ارب روپے کی خطیر رقم مختص کی گئی ہے جس کے تحت ملک بھر سے پڑھے لکھے نوجوانوں کو چھوٹے کاروبار کے لیے قرضہ جات کی ادائیگی کامیابی سے جاری ہے، جب کہ 50 ہزار نوجوانوں کو روزگار کے ساتھ ساتھ تکنیکی تربیت بھی فراہم کی جا رہی ہے۔

گجرات: وزیر اعظم کے معاون خصوصی عثمان ڈار نے کہا ہے کہ 10 لاکھ نوجوانوں کو 100 ارب روپے قرض دیا جائے گا، یہ قرض ذاتی ضمانت اور 4 فی صد سود پر دیا جائے گا۔

اے آر وائی نیوز کے مطابق آج گجرات میں کامیاب جوان پروگرام کے تحت چیک تقسیم کرنے کی تقریب میں عثمان ڈار نے کہا کہ ایک لاکھ سے 10 لاکھ تک ذاتی ضمانت پر نوجوان کو قرض ملے گا، جب کہ 10 لاکھ سے ایک کروڑ قرض 4 فی صد مارک اپ پر دیا جائے گا۔

انھوں نے کہا پہلے فیز میں ڈیڑھ لاکھ نوجوانوں کو قرضے دیں گے، تاحال 3 لاکھ درخواستیں موصول ہو چکی ہیں، گجرات کے مزید 10 ہزار 500 نوجوانوں نے قرض کی درخواست دی ہے۔

عثمان ڈار نے کہا ’ہم گولڈن ٹرائی اینگل گجرات، گوجرانوالہ اور سیالکوٹ کی صنعت کے مسائل حل کریں گے، کاٹیج اندسٹری اور چھوٹے کاروبار کامیاب جوان پروگرام کا ہدف ہے، پہلے تین تھے اب پروگرام میں 18 نئے بینک شامل ہو چکے ہیں۔‘

معاون خصوصی کا کہنا تھا گجرات چیمبر آف کامرس میں کامیاب جوان پروگرام کا ڈیسک بنایا جا سکتا ہے، چیمبر آف کامرس کے ارکان کو قرض کے لیے ترجیح دی جائے گی۔

انھوں نے کہا ایس ایم ای سیکٹر ہی ملازمت پیدا کر سکتے ہیں، ہم اس سلسلے میں ایک لاکھ جوانوں کو فنی تعلیم دے رہے ہیں، ٹائیگر فورس اپنے علاقوں میں مسائل کی نشان دہی کر رہی ہے، ہم اس طرح نوجوانوں کو پالیسی سازی میں حصہ دار بنا رہے ہیں۔