اسلام آباد: وزیر خارجہ شاہ محمود قریشی کا کہنا ہے کہ افغانستان پر پاکستان اور ازبکستان دونوں کا مؤقف یکساں ہے۔ پاکستان اور ازبکستان کا مؤقف ہے افغان مسئلے کا فوجی حل نہیں۔
تفصیلات کے مطابق وزیر خارجہ شاہ محمود قریشی اور ان کے ازبک ہم منصب عبد العزیز کاملوف نے ملاقات اور وفود کی سطح پر مذاکرات کے بعد مشترکہ پریس کانفرنس کی۔
وزیر خارجہ شاہ محمود قریشی کا کہنا تھا کہ پاکستان اور ازبکستان کے درمیان قریبی تعاون کے بے پناہ مواقع ہیں۔ افغانستان پر دونوں ملکوں کا مؤقف یکساں ہے۔
انہوں نے کہا کہ پاکستان اور ازبکستان کا مؤقف ہے افغان مسئلے کا فوجی حل نہیں۔
ازبک وزیر خارجہ عبد العزیز کاملوف کا کہنا تھا کہ دورے کی دعوت پر شاہ محمود قریشی کا شکر گزار ہوں۔ شاہ محمود سے اقتصادی و دیگر شعبوں میں تعاون پر بات ہوئی۔ مواصلاتی رابطوں اور باہمی دلچسپی کے امور پر گفتگو ہوئی۔
اننہوں نے کہا کہ پاکستان سے علاقائی سلامتی اور مشترکہ چیلنجز پر بھی بات ہوئی۔ پاکستان سے مثبت بات چیت قریبی دوستانہ تعلقات کی عکاس ہے۔
ازبک وزیر خارجہ کا مزید کہنا تھا کہ شاہ محمود کو جلد ازبکستان کے دورے کی دعوت دی ہے، پائیدار امن و استحکام کے لیے پاکستان سے مل کر کام کرنا چاہتے ہیں۔ ’پاکستان کے ساتھ قریبی تعلقات اور تعاون ہمارا ایجنڈا ہے‘۔
