دبئی : سابق صدر پرویز مشرف کا کہنا ہے کہ کچھ لوگ سمجھ رہے ہیں میں نے سیاست چھوڑ دی ہے، میں نے سیاست نہیں چھوڑی ہے، نوازشریف کی طرح میرا نام بھی ای سی ایل میں نہ ڈالا جائے۔
تفصیلات کے مطابق سابق صدر پرویز مشرف نے پارٹی سربراہی سے مستعفی ہونے کے بعد ویڈیو پیغام میں کہا کہ لوگ سمجھ رہے ہیں، میں نےسیاست نہیں چھوڑی دی تو سیاست سے کنارہ کش نہیں ہوا، پارٹی چیئرمین شپ سے استعفیٰ قانونی مشاورت پر دیا ہے، ڈاکٹرامجد پارٹی چیئرمین اور مہرین ملک آدم سیکرٹری جنرل ہوں گے۔
پرویزمشرف کا کہنا تھا کہ ارادہ تھا وطن واپس آکر الیکشن لڑوں اور عدالتوں کا سامنا کروں لیکن وطن واپسی کے ارادے کی تکمیل کی راہ میں رکاوٹیں ہیں۔
سابق صدر نے کہا کہ مجھے انتخابات میں حصہ لینے کی اجازت دی جائے، خواجہ آصف کی طرح میرے کیس میں بھی فیصلہ معطل ہونا چاہیے، نوازشریف کی طرح میرانام بھی ای سی ایل میں نہ ڈالاجائے اور نوازشریف کی طرح جلسوں سے خطاب کی اجازت دی جائے۔
ان کا کہنا تھا کہ میرامطالبہ تھاوطن واپسی پرمجھے گرفتار نہ کیا جائے، یہ ساری باتیں میرےارادے کی راہ میں رکاوٹ تھیں۔
گذشتہ روز پرویزمشرف اے پی ایم ایل کی سربراہی سے مستعفیٰ ہوگئے تھے اور الیکشن کمیشن کو اپنا استعفیٰ بھجوا دیا تھا ، جس کے بعد الیکشن کمیشن نے پرویز مشرف کا نام پارٹی صدارت سے ہٹانے کا فیصلہ کیا۔
پرویزمشرف کی نااہلی پارٹی رجسٹریشن کی راہ میں رکاوٹ تھی، نااہلی کے باعث پرویزمشرف پارٹی کے سربراہ نہیں رہ سکتے۔
مزید پڑھیں : پرویزمشرف نے پارٹی سربراہی سے استعفیٰ دے دیا، ذرائع
یاد رہے کہ سپریم کورٹ نے حکم جاری کیا تھا اور پرویز مشرف کو مہلت دیتے ہوئے کہا تھا کہ اگر وہ عدالت میں پیش ہوجاتے ہیں تو انہیں گرفتار نہیں کیا جائے گا اور الیکشن کمیشن میں ان کی نامزدگی کے کاغذات وصول کر لیے جائیں گے۔
جسٹس ثاقب نثار نے ریمارکس دیئے تھے کہ مشرف کمانڈو ہیں تو پاکستان آکر دکھائیں اور سیاستدانوں کی طرح میں آرہا ہوں کی گردان مت کریں، مشرف نہ آئے تو کاغذات کی جانچ پڑتال نہیں ہونے دیں گے۔
جس کے بعد سپریم کورٹ نے 14 جون کو عدم حاضری پر پرویز مشرف کے کاغذات نامزدگی جمع کرانے کا عبوری حکم واپس لیتے ہوئے سماعت غیر معینہ مدت تک کے لیے ملتوی کردی تھی۔
واضح رہے کہ پشاور ہائیکورٹ پرویز مشرف کو تاحیات نا اہل قرار دے چکی ہے۔
