Tag: Vegetable prices

لاہور: پنجاب کے شہر لاہور میں عیدالاضحیٰ کے بعد سبزیوں کی قیمتیں کم ہونا شروع ہو گئیں۔

تفصیلات کے مطابق عید قربان پر لاہور کے سبزی فروشوں نے بھی شہریوں کی جیبوں سے خوب قربانی لی، تاہم عید سیزن میں کمائی کے بعد سبزیوں کی قیمتیں کم کر دی گئی ہیں۔

ٹماٹر 200 روپے سے 150 روپے فی کلو پر آ گئے ہیں، دوسری طرف سبزی فروشوں نے عید پر مہنگائی کا ملبہ افغانستان سے آنے والی فصل پر ڈال دیا ہے، ان کا کہنا ہے کہ مقامی فصل نہیں آ رہی ہے، اور کابل کا ٹماٹر مہنگا ہے۔

ادھر تہوار آئے یا جائے کراچی کے ڈیری فارمرز پر کوئی اثر نہیں پڑتا، دودھ کی قیمت 210 سے بڑھا کر 230 روپے لیٹر کر دی، شہری دہائی دے رہے ہیں کہ اب چائے کیسے بنائیں، اور بچوں کو کیا پلائیں؟ آخر ہم شہری جائیں کہاں؟

کراچی میں دودھ کے سرکاری نرخ 180 روپے ہیں، تاہم انتظامیہ اس پر عمل درآمد میں مکمل ناکام ہے، اور من مانی کرنے والے ڈیری فارمرز نے انتظامیہ کے اندازوں کو ذمہ دار ٹہرا دیا ہے، ان کا کہنا ہے کہ دودھ کی پیداواری لاگت کا تخمینہ 222 روپے لیٹر لگایا گیا ہے جو دراصل 242 روپے لیٹرتھا، مسئلہ جو بھی ہے پِس غریب عوام رہے ہیں۔