Tag: ventilator

کراچی: آغا خان یونی ورسٹی اسپتال نے بریف کیس سائز کا بیٹری سے چلنے والا وینٹی لیٹر تیار کر لیا ہے جس کی مدد سے وقت ضایع کیے بغیر مریض کو فوری طور پر طبی امداد فراہم کی جا سکتی ہے۔

تفصیلات کے مطابق پاکستانی انجینئرز نے چھوٹے سائز کا ایک حیرت انگیز بیٹری سے چلنے والا وینٹی لیٹر ڈیزائن کر لیا ہے، اس کی تفصیلات اور استعمال کے حوالے سے بائیو میڈیکل انجینئر اریبا نے اے آر وائی نیوز کے پروگرام باخبر سویرا میں گفتگو کرتے ہوئے کہا یہ کم لاگت والا پورٹیبل وینٹی لیٹر بہت جلد لوگوں کے لیے دستیاب ہوگا۔

خیال رہے کہ وینٹی لیٹر اس وقت دنیا بھر میں ایک مسئلہ بنا ہوا ہے، کرونا وبا کے دوران اس کی اہمیت دوچند ہو گئی ہے اور اس کی طلب میں بے پناہ اضافہ ہوا۔

اس حوالے سے بائیو میڈیکل انجینئر اریبا کا کہنا ہے کہ جب کو وِڈ 19 کی وبا پھیل گئی تو لوگوں کو بتایا گیا کہ تشویش ناک مریضوں کو وینٹی لیٹر کی بہت ضرورت ہوتی ہے، اور اس وقت پاکستان میں وینٹی لیٹر بھی اتنے نہیں تھے، پھر ایسی جگہیں تھیں جہاں پر اس طرح کی پیچیدہ مشینیں فراہم نہیں کی جا سکتی تھیں، جہاں ان کو آپریٹ کرنے والا بھی کوئی نہ ہو۔

اریبا نے بتایا ہم نے سوچا کہ ایسی ڈیوائس ڈیزائن کی جائے جس کا میکنیزم بہت سادہ ہو اور اسے ڈاکٹرز اور نرسنگ اسٹاف کے علاوہ لوگ بھی آسانی سے استعمال کر سکیں۔ اس مشین کا مقصد یہ ہے کہ مریض کو سانس لینے میں مدد فراہم کی جا سکے، کرونا وبا کے دوران ہمیں اندازہ ہوا کہ اس مشین کو کرونا انفیکشن کے علاوہ سانس کی دیگر بیماریوں میں بھی استعمال کیا جا سکتا ہے۔

واضح رہے کہ وفاقی وزیر سائنس و ٹیکنالوجی فواد چوہدری نے باخبر سویرا میں کہا تھا کہ اگر کوئی وینٹی لیٹرز جیسے منصوبے سامنے لے کر آتے ہیں تو ہم ان کے لیے انویسٹمنٹ کا بندوبست کریں گے، اس حوالے سے اریبا نے بتایا کہ اس سلسلے میں ابھی تک انھیں اور ڈاکٹر اکبر کو کوئی سپورٹ نہیں ملا، ہمیں صرف آغا خان کی طرف سے تعاون ملا، فنڈنگ نہ ہم نے مانگی ہے نہ لی ہے، ہمارا بنیادی ہدف یہ تھا کہ ایک سستی مشین بنائی جا سکے۔

انھوں نے بتایا کہ اس وینٹی لیٹر کی قیمت 30 ہزار تک ہے، یہ پورٹیبل وینٹی لیٹر ہے، بڑے شہروں میں تو وینٹی لیٹرز موجود ہیں لیکن چھوٹے شہروں اور دیہات میں اس کی سہولت دستیاب نہیں، ہم نے سوچا کہ ان علاقوں کے لیے پورٹیبل وینٹی لیٹر ہو، اس کے علاوہ اسے ایمبولنس میں بھی استعمال کیا جا سکتا ہے۔

اکثر ایسا ہوتا ہے کہ دور دراز کے علاقوں سے مریضوں کو جب شہر کے اسپتال لایا جاتا ہے تو وہ راستے ہی میں انتقال کر جاتے ہیں کیوں کہ انھیں راستے میں وینٹی لیٹر دستیاب نہیں ہوتا، اریبا نے بتایا کہ وہ پورے ملک کے علاقوں کو فوکس کر رہے ہیں جہاں اس وینٹی لیٹر کی ضرورت ہے۔

لاہور: سرکاری اسپتالوں میں وینٹی لیٹرز کی کمی سے متعلق کیس کی سماعت کے دوران چیف جسٹس نے وینٹی لیٹرز منگوانے کے لیے 4 ماہ کا وقت دے دیا۔

تفصیلات کے مطابق سپریم کورٹ لاہور رجسٹری میں سرکاری اسپتالوں میں وینٹی لیٹرز کی کمی سے متعلق کیس کی سماعت ہوئی۔ صوبائی وزیر صحت یاسمین راشد عدالت میں پیش ہوئیں۔

چیف جسٹس میاں ثاقب نثار نے اسپتالوں میں وینٹی لیٹرز کی کمی پر برہمی کا اظہار کیا۔

یاسیمن راشد نے کہا کہ وینٹی لیٹر کی خریداری سے متعلق سمری وزیر اعلیٰ کے پاس پڑی ہے۔ چیف جسٹس نے پوچھا کہ کتنی سمریاں وزیر اعلیٰ کے پاس التوا میں ہیں؟ وینٹی لیٹرز کو مذاق سمجھا ہوا ہے۔

چیف جسٹس نے کہا کہ وزیر اعلیٰ کو سمری سمیت بلا لیتے ہیں، یہیں بٹھا کر منظوری کرواتے ہیں۔ یاسمین راشد نے کہا کہ پچھلی حکومت کے وزیر نے سمری پر دستخط نہیں کیے۔ موجودہ وزیر پیپرا رولز کے تحت دستخط نہیں کر سکتی۔

چیف جسٹس نے کہا کہ پرانا وزیر کہتا ہے وہ پرانی تاریخ میں دستخط نہیں کرے گا۔ بدقسمتی ہے امیر کو وینٹی لیٹر لگانے کے لیے غریب کا اتار دیا جاتا ہے۔ نجی اسپتال آئی سی یو کے بیڈ کا 23 ہزار اور وینٹی لیٹر کا 5000 بل لیتے ہیں، صحت کی سہولیات مفت دینا حکومت کی ذمہ داری ہے۔

ڈاکٹر یاسمین راشد نے کہا کہ میں خود ذاتی طور پر معاملے کو دیکھوں گی۔ 10 دن میں سمری منظور کروا لیں گے۔

چیف جسٹس نے کہا کہ 279 وینٹی لیٹرز منگوانے کے لیے 4 ماہ کا وقت دے رہے ہیں۔ کیس کی مزید سماعت ملتوی کردی گئی۔