نئی دہلی: بھارتی فوج میں جاری ظلم و کرپشن کے خلاف ایک اور بھارتی فوج اٹھ کھڑا ہوا اور ویڈیو بنا کر سوشل میڈیا پر اپ لوڈ کردی اور کہا کہ اگر میں فوجی نہ ہوتا تو خود کشی کرلیتا۔

تفصیلات کے مطابق بھارتی فوجی تیج بہادر کی ویڈیو سوشل میڈیا پر وائرل ہونے کے بعد ایک اور فوجی اہلکار نے بھارتی فوجی افسران کے مظالم کا ذکر چھیڑ دیا، اسے ویڈیو میں شکوے کرتے ہوئے دیکھا جاسکتا ہے۔

بھارتی سیکورٹی فورسز کے اہلکاربڑے دعوے کرنے والی مودی سرکار کی پول کھولنے میں مصروف ہیں۔ سیکورٹی اہلکاروں کا کہنا ہے سینئر افسران جوتے پالش کراتے ہیں اورشکایت کرنے پر دھمکاتے ہیں۔

بھارتی سینا کے اہلکاروں نے اپنی ہی سرکار کی قلعی کھول دی۔ بھارتی فوج کی حقیقت بے نقاب کرتی ایک بعد ایک ویڈیوز سامنے آنے لگیں۔ ایک اورسیکورٹی اہلکارنے مودی سرکار اورسینئر فوجی افسروں کیخلاف شکایتوں کا انبارلگا دیا۔

اہلکارکا کہنا ہے کہ افسروں کے جوتے پالش کرانے کی شکایت کی توکورٹ مارشل کا خطرہ ہوگیا۔ اہلکار کے مطابق سینئرافسران اتنا دباؤ ڈال رہے ہیں کہ فورسزمیں نہ ہوتا تو خودکشی کرلیتا۔

اس سے قبل سی آر پی ایف کے ایک اہلکار جیت سنگھ نے بھی اپنے افسران کے مظالم کیخلاف آواز اٹھاتے ہوئے اپنی ویڈیو میں کہا تھا کہ اہلکاروں کو بیس سال سروس کے بعد بھی پنشن نہیں ملتی، ایکس سروس مین کوٹہ میں بھی حصہ نہیں ، سب سہولتیں فوجی اہلکاروں کیلئے ہیں۔

بھارتی فورسز کے سیکیورٹی اہلکار پچھلے کچھ دنوں سے اپنے ساتھ ناروا سلوک اورناکافی سہولیات کی فریاد سوشل میڈیا پرویڈیوزاپ لوڈ کرکے کررہے ہیں۔ بھارتی فوج اور مودی سرکار کی سبکی پر ٹوئٹر پر بھی انہیں شدید تنقید کا سامنا ہے۔

مزید پڑھیں: بھارتی آرمی چیف نے فوجیوں کے لیے سوشل میڈیا کوممنوع قرار دے دیا

واضح رہے کہ بھارتی آرمی چیف بھارتی فوج کے اہلکاروں کی شکایتوں سے پریشان ہوگئے ہیں، خوراک میں خرد برد کے الزامات پر بھارتی آرمی چیف کو پریس کانفرنس کرنا پڑ گئی۔

بھارتی آرمی چیف نے کہا کہ جوان شکایات سامنے لانے کے لئے سوشل میڈیا کے استعمال سے گریز کریں، کسی قسم کی شکایت کے لئےاعلیٰ قیادت سے رابطہ کریں.

مزید پڑھیں: بھارتی فوجی نے ویڈیو جاری کرکے اپنی فوج کو بے نقاب کردیا

آرمی چیف کا کہنا تھا سرحدوں پرچیلجنز کا سامنا ہے،جوانوں کی شکایت کے لئے شکایتی باکس قائم کردیا ہے۔

نئی دہلی : بھارتی فوجیوں کو کھانے کے لالے پڑ گئے،فوجیوں کو ملنے والے راشن میں اعلیٰ افسران کی خوردبرد کا انکشاف ہوا ہے۔ ایک حاضر سروس فوجی اہلکار نے بھارتی فوج میں کرپشن کا بھانڈا پھوڑ دیا، سرحد پر تعینات ایک اہلکار نے ایسی ویڈیو جاری کر دی ہے جس نے بھارتی حکومت اور بھارتی فوج کو دنیا بھر میں شرمندہ کر کے رکھ دیاہے۔

تفصیلات کے مطابق بھارتی فوجی اہلکار تیج بہادریادیو نے سوشل میڈیا پر ایک ویڈیو جاری کی ہے جس میں بھارتی فوجی اہلکاروں کے ساتھ ہونے والے ناروا سلوک کا پردہ فاش کردیا۔

بھارتی فوجی تیج بہادر جس کا تعلق پی ایس ایف 29 ویں بٹالین سے ہے، اس کا اپنی ویڈیو میں کہنا تھا کہ ہمیں ملنے والا کھانا افسران کھا جاتے ہیں یا پھر بازار میں بیچ دیا جاتا ہے۔

سوشل میڈیا پر جاری ویڈیو میں بھارتی فوجی کا مزید کہنا تھا کہ ناشتے میں پتلا پراٹھا اور تھوڑی سی چائے ملتی ہے، بعض اوقات رات کو کھانا نہ ہونے کے باعث تو بھوکا بھی سونا پڑتا ہے کیا اس طرح ہم ڈیوٹی دے سکتے ہیں؟

اس نے کہا کہ صبح چھ بجے سے شام پانچ بجے تک مسلسل کھڑے ہو کر ڈیوٹی دیتے ہیں لیکن کھانے میں ہمیں ایسی دال دی جاتی ہے جس میں صرف ہلدی اور نمک ڈالا جاتا ہے اور نہ اس میں پیاز ہوتا ہے نہ گھی اور نہ ہی لہسن۔’’

اس نے کہا کہ مجھے نہیں معلوم کہ اس ویڈیو کے بعد میرے ساتھ کیا سلوک کیا جائے گا، لیکن میں اپنے ہم وطنوں کو اپنی اور اپنے ساتھیوں کی بری حالت کے بارے میں بتانا چاہتا ہوں۔