Tag: video msg

  • شاہ محمود قریشی کا پی ٹی آئی کارکنان کے لیے ویڈیو پیغام

    شاہ محمود قریشی کا پی ٹی آئی کارکنان کے لیے ویڈیو پیغام

    لاہور : توشہ خانہ کیس میں چیئرمین پی ٹی آئی کو نااہلی کی سزا اور گرفتاری سے متعلق شاہ محمود قریشی نے ویڈیو پیغام کارکنان کے نام ویڈیو پیغام جاری کیا ہے۔

    اپنے پیغام میں ان کا کہنا ہے کہ ہم نے قانون کو ہاتھ میں لینا ہے اور نہ ہی املاک کو کسی قسم کا نقصان پہنچانا ہے، اپنی حقیقی آزادی کی جدوجہد کو آگے بڑھائیں گے۔ وکلاء سے مشاورت اور کور کمیٹی کے فیصلوں کی روشنی میں آگے بڑھیں گے۔

    پاکستان تحریک انصاف کے وائس چیئرمین شاہ محمود قریشی نے کہا کہ ہم تحریک انصاف کے کارکنان اور قوم میں پائے جانے والے اضطراب سے بخوبی آگاہ ہیں، قوم میں اضطراب، غم و غصہ اور ردعمل کی کیفیت فطری عمل ہے۔

    انہوں نے کہا کہ کارکنان اور عوام اپنا احتجاج ریکارڈ کروانا چاہتے ہیں تو آئین انہیں اس کا پورا حق دیتا ہے، کارکنان اور عوام کو میسر آئینی حق سلب نہیں کیا جاسکتا۔

    پی ٹی آئی کے وائس چیئرمین کا کہنا ہے کہ ہمیں قانونی جنگ بھی لڑنی ہے اور سیاسی جدوجہد بھی جاری رکھنی ہے اور پرامن انداز میں آگے بڑھنا ہے، ہم سب نے مل کر چیئرمین تحریک انصاف کی آزادی کی جدوجہد جاری رکھنی ہے۔

    شاہ محمود قریشی نے کہا کہ چیئرمین پی ٹی آئی کی واضح ہدایات اور گائیڈ لائنز کی روشنی میں آگے بڑھنا ہے، پارٹی کے سینئر قائدین سے مشاورت ہوئی ہے، آج کور کمیٹی کا اجلاس منعقد کیا جارہا ہے، کور کمیٹی کے اجلاس میں آئندہ کے لائحہ عمل کو حتمی شکل دیں گے۔

    ان کا مزید کہنا تھا کہ آج کے عدالتی فیصلے کو عوام نے انصاف کے تقاضوں کے برعکس سمجھا ہے، دستور کے آرٹیکل 10اے کے تحت انہیں فیئر ٹرائل کا بنیادی حق میسر نہیں ہوا۔

  • میں ڈرا نہیں رہا سمجھا رہا ہوں، عمران خان کا اہم حلقوں کو پیغام

    میں ڈرا نہیں رہا سمجھا رہا ہوں، عمران خان کا اہم حلقوں کو پیغام

    لاہور : چیئرمین پی ٹی آئی عمران خان نے کہا ہے کہ 14 مئی سے پہلے اسمبلی تحلیل نہ کی گئی تو ہم پنجاب اور کے پی میں الیکشن کروا لیں گے، عوام میں شدید غصہ ہے زیادہ دیر پرامن نہیں رہیں گے، میں ڈرا نہیں رہا سمجھا رہا ہوں۔

    یہ بات انہوں نے اپنے ویڈیو پیغام میں گفتگو کرتے ہوئے کہی، عمران خان کا کہنا تھا کہ طاقتور حلقوں کو میرا پیغام ہے کہ پُرامن لوگ زیادہ دیر تک پُرامن نہیں رہیں گے، عوام کے اندر شدید غصہ پایا جارہا ہے اگر عوام کی الیکشن کی امید ختم ہوگئی تو پھر یہ سنبھالے نہیں جائیں گے، میں ڈرا نہیں رہا سمجھا رہا ہوں۔

    عمران خان نے کہا کہ الیکشن کمیشن پی ڈی ایم کا حصہ بنا ہوا ہے، اگر ملک میں جمہوریت ہے تو پھر میری تقاریر پر پابندی کیوں عائد ہے؟ میں نے ایسا کیا جرم کیا ہے کہ مجھے آزادی اظہار رائے کا حق نہیں؟

    چیئرمین پی ٹی آئی کا کہنا تھا کہ سوشل میڈیا پر آتے ہیں تو ایکٹوسٹ کو اٹھانا شروع کردیتے ہیں، اب اندازہ ہوا کہ مقبوضہ کشمیر میں لوگوں کا کیا حال ہوتا ہے۔

    عام انتخابات کی تاریخ سے متعلق ہونے والے مذاکرات پر شکوک و شبہات کا اظہار کرتے ہوئے انہوں نے کہا کہ یہ لوگ مذکرات سنجیدہ ہوکر کررہے ہیں یا محض دکھاوا ہے کیونکہ
    ایک طرف مذاکرات اور دوسری ہمارے لوگوں کو گرفتار کیا جارہا ہے۔

    عمران خان نے کہا کہ بجٹ کے بعد قومی اسمبلی تحلیل کرنے کی بات میں مجھے بدنیتی نظر آرہی ہے، انہوں نے تجویز دی کہ آپ الیکشن لڑیں، جیت گئے تو بجٹ بنالیں۔

    چیئرمین پی ٹی آئی کا کہنا تھا کہ اگر 14 مئی سے پہلے اسمبلی تحلیل کردی گئی تو ہم پورے ملک میں الیکشن کیلئے تیار ہیں،اور اگر تحلیل نہ کی گئی تو ہم پنجاب اور کے پی میں الیکشن کروالیں گے۔

    عمران خان نے بتایا کہ یکم مئی کے حوالے سے اسلام آباد، لاہور اور پشاور میں مزدورں کے لئے ریلیاں نکالی جائیں گی، لاہور کی ریلی کی قیادت میں کروں گا، اسلام آباد کی ریلی شاہ محمود اور پشاور کی ریلی پرویز خٹک لیڈ کریں گے، انہوں نے بتایا کہ میں لبرٹی مارکیٹ سے ناصر باغ تک جاؤں گا، ریلیاں نکالنے کا دوسرا مقصد آئین بچاؤ ریلی ہے۔

  • حکمرانوں کی کوشش ہے کہ خوف پھیلا کر انتخابات جیت لیں، عمران خان

    حکمرانوں کی کوشش ہے کہ خوف پھیلا کر انتخابات جیت لیں، عمران خان

    لاہور : پاکستان تحریک انصاف کے چیئرمین عمران خان نے کہا ہے کہ حکمران ٹولے کی کوشش ہے کہ اتنا خوف پھیلایا جائے کہ آئندہ الیکشن وہ جیت جائیں، شہید ظل شاہ کو تشدد کرکے مارا گیا وہ اسپیشل چائلڈ تھا۔

    یہ بات انہوں نے اپنے ویڈیو بیان میں کہی، گزشتہ روز لاہور میں کارکن کے جاں بحق ہونے کے حوالے سے ان کا کہنا تھا کہ ظل شاہ کو تشدد کرکے مارا گیا سب کو پھر بتانا چاہتا ہوں کہ وہ ایک اسپیشل چائلڈ تھا، سوشل میڈیا پر ظل شاہ کی ویڈیوز چل رہی ہیں، ظل شاہ ایسا انسان تھا جس سے سب پیار کرتے تھے، اگر برطانیہ میں ایسا واقعہ ہو تو قوم سڑکوں پر نکل آتی۔

    عمران خان نے کہا کہ شہید صحافی ارشد شریف کا کیا قصور تھا؟ پوری قوم جانتی ہے کہ وہ راہ حق پر تھا، کوئی اس کو خرید نہیں سکتا تھا اس طرح کے صحافی کے ساتھ ایسا سلوک کیا گیا۔

    ملکی معیشت پر گفتگو کرتے ہوئے چیئرمین پی ٹی آئی نے کہا کہ ملک کی معیشت تباہ ہوگئی،100ارب روپے کیے کیسز ختم کردیئے گئے، آصف زرداری ، نوازشریف، شہبازشریف 30سال سے ملک لوٹ رہے ہیں، قوم مزید غریب ہورہی ہے ان کی دولت میں اضافہ ہورہا ہے۔

    چیئرمین پی ٹی آئی نے کہا کہ یہ وقت ہے ہم سب ان کے خلاف کھڑے ہوں، ایک راستہ غلامی اور تباہی کا ہے دوسرا حقیقی آزادی کا ہے اور حقیقی آزادی کیلئے جہاد میں سب کو تیار اور شامل ہونا چاہیے۔

    عمران خان کا مزید کہنا تھا کہ الیکشن شیڈول کے بعد بھی انتخابی مہم پر پابندیاں ہیں، اب تک مجھ پر80مقدمات ہوگئے ہیں، ان کی کوشش ہے کہ اتنا خوف پھیلایا جائے کہ آئندہ الیکشن وہ جیت جائیں۔

  • تحریک انصاف کا جیل بھرو تحریک کیلئے ویڈیو پیغام جاری

    تحریک انصاف کا جیل بھرو تحریک کیلئے ویڈیو پیغام جاری

    لاہور : پاکستان تحریک انصاف کی جانب سے بدھ 22 فروری سے جیل بھرو تحریک کا اعلان کیا ہے، اس سلسلے میں عوام و کارکنان کیلئے ویڈیو پیغام جاری کیا گیا ہے۔

    سماجی رابطے کی ویب سائٹ ٹوئٹر پر جاری ویڈیو میں پی ٹی آئی کی تمام سینئر قیادت کے پیغامات شامل کیے گئے ہیں۔

    مذکورہ ویڈیو میں شاہ محمود قریشی، اسدعمر، فوادچوہدری، شیریں مزاری، اعظم سواتی، فرخ حبیب، شہباز گل, عثمان ڈار سمیت اہم رہنماؤں کے پیغامات شامل کیے گئے ہیں۔

    مزید پڑھیں : عمران خان کا بدھ سے ‘جیل بھرو تحریک’ شروع کرنے کا اعلان

    واضح رہے کہ چیئرمین پی ٹی آئی عمران خان نے گزشتہ روز 22فروری بروز بدھ سے ملک بھر میں جیل بھرو تحریک شروع کرنے کا اعلان کیا تھا۔

    زمان پارک سے ویڈیو لنک کے ذریعے خطاب کرتے ہوئے سابق وزیراعظم کا کہنا تھا کہ کارکنان تیاری کرلیں،جیل بھرو تحریک کو لاہور سے شروع کیا جائے گا اور ہرگزرتے دن کے ساتھ دیگر بڑے شہروں کی جیلیں بھریں گے۔

  • ترکیہ میں زلزلے: رجب طیب اردوان کا ویڈیو پیغام جاری

    ترکیہ میں زلزلے: رجب طیب اردوان کا ویڈیو پیغام جاری

    استنبول : ترک صدر رجب طیب اردوان نے کہا ہے کہ ہم انسانی تاریخ میں ہونے والی بڑی آفات میں سے ایک کا سامنا کر رہے ہیں۔

    یہ بات انہوں نے ایک ویڈیو پیغام میں کہی، جی ایکس ٹاک سربراہی اجلاس کے لئے بھیجے گئے ویڈیو پیغام میں انہوں نے کہا کہ زلزلے کے بعد اب تک ملبے سے زندہ نکالے گئے افراد کی تعداد 8 ہزار سے زیادہ ہے۔

    واضح رہے کہ غیرملکی خبر ایجنسی کی رپورٹ کے مطابق ترکیہ اور شام میں زلزلے سے اموات41ہزار232ہوگئیں جبکہ صرف ترکیہ میں زلزلے سے اموات35ہزارسے تجاوز کرچکی ہیں۔

    ترک صدر رجب طیب اردوان کا ویڈیو پیغام میں کہنا تھا کہ سائنس دانوں کے مطابق ان زلزلوں کے نتیجے میں خارج ہونے والی انرجی کی طاقت 500 ایٹم بموں کے برابر ہے۔

    انہوں نے کہا کہ صدی کی بڑی آفت قرار دئیے گئے اس زلزلے کے بعد جیسے جیسے ملبہ ہٹایا جا رہا ہے اموات کی تعداد میں بھی اضافہ ہو رہا ہے، حکومت کے متعلقہ اداروں کے ساتھ ساتھ سِول سوسائٹیاں اور رضاکار زلزلہ زدگان کی مدد کے لئے انتھک کوششیں کررہے ہیں۔

    ترک صدر نے مزید کہا کہ زلزلے کے بعد ریسکیو آپریشن میں مدد کرنے والے تمام ممالک کا شکریہ ادا کرتا ہوں، وہ لوگ جو زلزلہ متاثرین کیلئے امداد جمع کررہے ہیں ان کا بھی مشکور ہوں۔

  • عمران خان کی جیل بھرو تحریک کیلئے رضاکاروں سے اپیل

    عمران خان کی جیل بھرو تحریک کیلئے رضاکاروں سے اپیل

    لاہور : چیئرمین پی ٹی آئی عمران خان نے کہا ہے کہ رضاکاروں سے اپیل کرتا ہوں کہ جیل بھرو تحریک کیلئے تیار رہیں، تاریخ کا اعلان جلد کروں گا۔

    یہ بات انہوں نے اپنے تازہ ویڈیو پیغام میں کہی، انہوں نے کہا کہ سوال یہ پیدا ہوتا ہے کہ ہم اس جگہ کیوں پہنچے کہ جیل بھرو تحریک شروع کرنا پڑی، جب سے موجودہ امپورٹڈ حکومت آئی ہے آئین اور قانون کی دھجیاں اڑائی گئی ہیں۔

    پولیس بھی عدالتوں کی بات نہیں سنتی

    عمران خان نے کہا کہ ملک کا آئین فیصلہ کرتا ہے کہ جائز اور ناجائز کیا چیز ہے، حالات یہ ہیں کہ پولیس بھی عدالتوں کی بات نہیں سنتی۔

    انہوں نے کہا کہ وفاقی حکومت اسلام آباد کے بلدیاتی الیکشن سے بھاگ رہی تھی، عدالتوں نے انہیں حکم دیا اسلام آباد کے بلدیاتی الیکشن کی فوری تاریخ دیں، ایک ماہ ہوگیا اسلام آباد کے بلدیاتی الیکشن نہیں ہوئے۔

    انہوں نے کہا کہ آئین ہمارے بنیادی حقوق کی حفاظت کرتا ہے، لوگوں کو گھروں سے اٹھایا جاتا ہے، سوشل میڈیا پر ٹوئٹ کرنے پر تشدد کیا جاتا ہے۔

    چیئرمین پی ٹی آئی نے کہا کہ کون سا آئین اجازت دیتا ہے کہ ایک ٹوئٹ پراعظم سواتی پرتشدد کیا جائے، اعظم سواتی کو دوبارہ جیل میں ڈالا گیا، 30مقدمات درج کئے گئے، شیخ رشید کو عدالت نے ضمانت دی اس کے باوجود اٹھا لیا گیا۔

    انتخابات 90دن سے آگے گئے تو

    اپنے پیغام میں ان کا کہنا تھا کہ اگر انتخابات 90دن سے آگے گئے تو جیل بھرو تحریک شروع کردیں گے، عوام رجسٹریشن کرائیں اور رضاکارانہ طور پر سامنے آئیں۔

    انہوں نے کہا کہ یہ کہاں کا انصاف ہے کہ شیخ رشید پر سندھ اور بلوچستان میں مقدمے درج کرا دیئے جاتے ہیں، عدالت4مرتبہ کہتی ہے کہ آئی جی پنجاب کو کہ فواد چوہدری کو پیش کریں اس کے باوجود پولیس فواد چوہدری کو اسلام آباد لے جاتی ہے۔

    عمران خان کا کہنا تھا کہ شہبازگل پرتشدد کیا گیا اور اسے کوئی ریلیف بھی نہیں دیا گیا جو قانون کی خلاف ورزی ہے، ہمارے دور حکومت میں انہوں نے3مرتبہ دھرنے اور لانگ مارچ کیے لیکن ہم نے کوئی سختی نہیں کی۔

    قوم کا آئین و قانون پراعتماد ختم ہوتا جارہا ہے

    چیئرمین پی ٹی آئی نے کہا کہ قوم کا آئین و قانون پراعتماد ختم ہوتا جارہا ہے، آئین میں واضح ہے کہ 90دن میں الیکشن کرانا ہوں گے، ہم نے پنجاب اور کے پی میں اپنی حکومتیں ختم کیں، ہم نے اسی وقت واضح بتایا تھا کہ ان سے معیشت نہیں سنبھالی جائے گی۔ آج صورتحال سب کے سامنے ہے، ملکی معیشت کی کیا حالت ہے، عمران خان

    ہمارے سامنے دو ہی راستے تھے

    انہوں نے کہا کہ ہمارے سامنے دو ہی راستے تھے ایک تشدد اور پتھراؤ کا دوسراجیل بھرو تحریک کا، جیل بھرو تحریک پرامن احتجاج ہے آئین ہمیں اس کی مکمل اجازت دیتا ہے۔

  • کراچی کے عوام کرپشن اور تعصب کی سیاست کو دفن کردیں گے، سراج الحق کا ویڈیو پیغام

    لاہور : امیر جماعت اسلامی سراج الحق نے کہا ہے کہ کراچی کے عوام اتوار کو کرپشن اور تعصبات کی سیاست کو دفن کردیں گے۔

    یہ بات انہوں نے سماجی رابطے کی ویب سائٹ فیس بک پر شہریوں کے نام اپنے ویڈیو پیغام میں کہی، انہوں نے کہا کہ کراچی میں امن اور ترقی کیلئے لوگ جماعت اسلامی کا ساتھ دیں۔

    سراج الحق کا کہنا تھا کہ پی ٹی آئی نے خیبرپختونخوا کے عوام کے دس سال ضائع کیے،کے پی اسمبلی کی تحلیل سے عوام کا بوجھ ہلکا ہوگا۔

    امیر جماعت اسلامی نے کہا کہ پی ٹی آئی دور حکومت میں صوبہ خیبرپختونخوا میں کرپشن اور بدامنی میں مزید اضافہ ہوا۔

    انہوں نے کہا کہ کے پی حکومت نے غریب عوام کو آٹے کی قطاروں میں لگایا، پی ڈی ایم، پیپلزپارٹی اور پی ٹی آئی بری طرح ایکسپوز ہوچکے ہیں۔

    انہوں نے کہا کہ حافظ نعیم الرحمن میئر کےلیے ہمارے امیدوار ہیں۔ انھوں نے اپنی ٹیم کے ساتھ کراچی کے لیے بہت محنت کی ہے۔ اہل کراچی جماعت اسلامی کو ووٹ دیں، ترازو پر مہر لگائیں، ترازو کراچی کےلیے ترقی، امن اور خوشحالی کا پیغام ہے۔

    اپنے ویڈیو پیغام میں سراج الحق کا مزید کہنا تھا کہ نئی صبح اور روشن مستقبل کیلئے جماعت اسلامی امید کی کرن ہے۔

  • چیئرمین پی ٹی آئی عمران خان کا عوام کیلئے خصوصی ویڈیو پیغام

    چیئرمین پی ٹی آئی عمران خان کا عوام کیلئے خصوصی ویڈیو پیغام

    چیئرمین پی ٹی آئی عمران خان نے کہا ہے کہ کل وزیرآباد سے حقیقی آزادی مارچ کا دوبارہ آغاز ہوگا، یہ بات انہوں نے خصوصی ویڈیو پیغام میں کہی۔

    سماجی رابطے کی ویب سائٹ ٹوئٹر پر اپنے پیغام میں ان کا کہنا تھا کہ لانگ مارچ وہیں سے شروع ہوگاجہاں 13لوگوں کو گولیاں لگی تھیں۔

    انہوں نے کہا کہ ہم کل حقیقی آزادی مارچ وہیں سے شروع کریں گے جہاں ہمارا ساتھی معظم گوندل شہید ہوا،کل وزیرآباد میں شام ساڑھے چار بجے شرکاء سے آن لائن خطاب کروں گا۔

    عمران خان کا مزید کہنا تھا کہ پاکستان بننے کے بعد ہمارا حقیقی آزادی مارچ سب سے بڑی تحریک ہے جو قوم آزاد نہیں ہوتی اس کی پرواز نہیں ہوتی۔

    واضح رہے کہ اس سے قبل عمران خان نے اپنے ایک ٹوئٹر پیغام میں کہا تھا کہ مجھے اپنے خلاف قتل کے منصوبے کا تقریباً 2 ماہ پہلے علم ہوچکا تھا۔

    انہوں نے بتایا کہ میں نے 24 ستمبر کو رحیم یار خان اور 7 اکتوبر کو میانوالی کے عوامی اجتماعات میں اس منصوبے کا پردہ بھی چاک کیا تھا۔ وزیرآباد میں کی جانے والی قتل کی کوشش اسکرپٹ کے عین مطابق تھی۔

     

  • حکمرانوں نے 3ماہ میں معیشت کا بیڑہ غرق کردیا، شوکت ترین کا ویڈیو پیغام

    حکمرانوں نے 3ماہ میں معیشت کا بیڑہ غرق کردیا، شوکت ترین کا ویڈیو پیغام

    اسلام آباد : سابق وزیر خزانہ شوکت ترین نے کہا ہے کہ موجودہ حکومت ایک ٹرن اراؤنڈ پاکستان پروگرام دے رہی ہے جو پہلے بھی دوبار دیا جاچکا ہے۔

    سماجی رابطے کی ویب سائٹ ٹوئٹر پر اپنے ایک ویڈیو پیغام میں انہوں نے کہا کہ پلاننگ کے وزیر احسن اقبال ایک ٹرن اراؤنڈ پاکستان پروگرام دے رہے ہیں، یہ پروگرام اسی طرز کا ہے جو پہلے بھی دوبار دیا جا چکا ہے۔

    انہوں نے بتایا کہ پہلا پروگرام 2010کا دوسرا2025کا وژن تھا، پروگرام کے تحت برآمدات نے5سال میں 50 ارب ڈالر پر ہونا تھا، اور 10سال میں برآمدات 100ارب ڈالر ہوجائیں گی۔

    شوکت ترین کا کہنا تھا کہ 5سال کے اختتام پر برآمدات 50ارب ڈالر نہیں ہوسکیں، برآمدات 25ارب ڈالر سے21ارب ہوئیں اورآخری سال میں ساڑھے24ارب ڈالر ہوئیں۔

    ان کا کہنا تھا کہ پی ٹی آئی حکومت نے محنت کی،2سال میں جی ڈی پی گروتھ17سال میں سب سے بلند سطح پر تھی، پی ٹی آئی دور میں زراعت اور صنعتی پیدوار کی پیداوارکی شرح سب سے زیادہ تھی۔

    سابق وزیر خزانہ نے بتایا کہ پی ٹی آئی دور میں سروسز کی شرح اور برآمدات بلند ترین سطح پر ترسیلات اور ٹیکس وصولی بھی سب سے زیادہ تھی۔

    شوکت ترین نے کہا کہ تین ماہ میں انہوں نے معیشت کا بیڑہ غرق اور ڈاؤن ٹرن پیدا کیا، تجویز ہے کانفرنس میں بیٹھیں دیکھیں معیشت کو ترقی کی طرف کیسے واپس لے کر جانا ہے، یہ بھی دیکھیں کہ معیشت کو کیسے آگے لے کر چلنا ہے۔

  • لانگ مارچ : اداکارہ مریم نفیس نے شرکاء کو اہم پیغام پہنچا دیا، ویڈیو وائرل

    لانگ مارچ : اداکارہ مریم نفیس نے شرکاء کو اہم پیغام پہنچا دیا، ویڈیو وائرل

    کراچی : پاکستان شوبز کی معروف اداکارہ مریم نفیس بھی لانگ مارچ میں جانے کیلئے تیار ہیں، اپنی ایک ویڈیو میں انہوں نے شرکاء اور عوام کے نام پیغام جاری کیا ہے۔

    سماجی رابطے کی ویب سائٹ ٹوئٹر پر ایک خصوصی ویڈیو میں مریم نفیس نے کہا کہ وہ اپنے دوستوں اور دیگر خاندان والوں کے ساتھ 25 مئی کو سری نگر ہائی وے پر پہنچیں گی۔

    ویڈیو میں ان کا کہنا تھا کہ میں امید کرتی ہوں کہ آپ بھی پاکستان کے لیے اپنے گھروں سے نکلیں گے۔

    مریم نفیس نے کہا کہ اگر آپ اسلام آباد کے شہری ہیں تو پلیز اپنے گھروں سے دوسرے شہروں سے آنے والے شرکاء کے لیے پانی ضرور لے کر آئیے گا، بہت گرمی ہے۔

    واضح رہے کہ موجودہ حکومت کے خلاف پاکستان تحریک انصاف کا ” حقیقی آزادی مارچ” پشاور سے شروع ہوگیا ہے، چیئرمین پی ٹی آئی عمران خان کی قیادت میں تاریخی مارچ آج اسلام آباد کے لئے روانہ ہوگا۔

    چیئرمین پی ٹی آئی کا اہم پیغام

    چیئرمین پی ٹی آئی عمران خان نے اپنے ویڈیو پیغام میں کہا ہے کہ ہمارا ایک مقصد ہے الیکشن کرائیں اور اسمبلی تحلیل کریں، ہم اگر اب نہیں نکلیں گے تو ہماری آئندہ نسلیں ہمیں معاف نہیں کریں گی، قوم سے اپیل ہے کل ہمیں موقع مل رہا ہے اس کو ضائع نہ ہونے دیں۔