Tag: Vietnam

  • یونیسکو کے لوک ورثہ مرکز کی سیاحت کے لیے جانے والے 35 افراد ویتنام میں کشتی الٹنے سے ہلاک

    یونیسکو کے لوک ورثہ مرکز کی سیاحت کے لیے جانے والے 35 افراد ویتنام میں کشتی الٹنے سے ہلاک

    ہنوئی: یونیسکو کے لوک ورثہ مرکز کی سیاحت کے لیے جانے والے 35 افراد ویتنام میں کشتی الٹنے سے ہلاک ہو گئے۔

    غیر ملکی میڈیا رپورٹس کے مطابق ہفتے کے روز ویتنام کے ہالونگ بے میں اچانک گرج چمک کے ساتھ بارش کے باعث سیاحوں کی ایک کشتی الٹنے سے پینتیس سیاح ہلاک ہو گئے، حکام نے ابتدائی طور پر ہلاک ہونے والوں کی تعداد اڑتیس بتائی تھی۔

    حکام کے مطابق امدادی کارکن ڈوبی ہوئی کشتی کو نکالنے میں کامیاب ہو گئے ہیں، کشتی میں سوار افراد کی تعداد 49 تھی، جس میں کشتی کا عملے کے 5 ارکان سمیت 20 بچے بھی شامل تھے۔

    سیاح یونیسکو کے ایک لوک ورثہ مرکز کی سیاحت کے لیے آئے تھے کہ کشتی کو حادثہ پیش آ گیا، ان سیاحوں میں سے اکثر اپنے خاندان کے ساتھ سیاحت کے لیے نکلے ہوئے تھے، جن کا تعلق ویتنامی دارالحکومت ہنوئی سے ہے۔


    سیکڑوں مسافروں کو لے جانیوالے بحری جہاز میں بدترین آگ، کتنے افراد بچ پائے؟


    ریسکیو سرگرمیوں میں درجنوں امدادی کارکن، بارڈر گارڈز، نیوی، پولیس اور پیشہ ور ڈائیورز نے حصہ لیا، حد نگاہ محدود اور موسم خراب ہونے کے باعث امدادی کاموں میں مشکلات کا سامنا ہے۔ ریسکیو اہلکاروں نے دو افراد کو بچایا تاہم باقی لاپتا افراد کی تلاش کے لیے ریسکیو آپریشن جاری ہے۔

    روئٹرز کے مطابق ہنوئی کے شمال مشرق میں تقریباً 200 کلومیٹر شمال مشرق میں چونے کے پتھر کے ہزاروں جزیروں پر مشتمل علاقہ یونیسکو نے عالمی لوک ورثہ قرار دیا ہے، جہاں ہر سال لاکھوں سیاح آتے ہیں، اور یہ حادثہ حالیہ برسوں کا بدترین قرار دیا گیا ہے، گرج چمک کے ساتھ اچانک چند منٹوں میں آسمان سیاہ ہو گیا تھا اور تیز بارش شروع ہو گئی۔

    10 سال کے ایک ویتنامی بچے نے ذہانت کا استعمال کرتے ہوئے الٹنے والی کشتی کے ایئر پاکٹ میں پناہ لے لی تھی، جہاں اسے امداد پہنچنے تک انتظار کرنا پڑا، اور ریسکیو اہلکاروں نے اسے بچا لیا۔

  • آگ لگنے سے 3000 الیکٹرک موٹر سائیکلیں جل کر خاکستر ہو گئیں

    آگ لگنے سے 3000 الیکٹرک موٹر سائیکلیں جل کر خاکستر ہو گئیں

    ہنوئی: ویتنام میں آگ لگنے سے 3 ہزار الیکٹرک موٹر سائیکلیں جل کر خاکستر ہو گئیں۔

    اے ایف پی کے مطابق شمالی ویتنام میں ایک فیکٹری میں زبردست آتش زدگی کے باعث جمعہ 4 اکتوبر کو تین ہزار الیکٹرک بائیکیں اور موٹر سائیکلیں تباہ ہو گئیں۔

    یہ واقعہ لینگ سون سٹی میں واقع ویتنام جاپان الیکٹرک وھیکل کمپنی میں کے گودام میں صبح کے وقت پیش آیا، جب آگ لگنے سے گودام سے گاڑھا دھواں اٹھنے لگا اور یکے بعد دیگرے کئی دھماکے ہوئے۔

    سرکاری میڈیا کے مطابق اس واقعے میں الیکٹرک موٹر سائیکلوں کے 2,000 سے زیادہ پرزے بھی آگ کے شعلوں میں تباہ ہو گئے، سرکاری وی ٹی وی کے مطابق آگ پرزوں کے گودام کی دوسری منزل سے شروع ہوئی اور دیگر منزلوں اور ملحقہ ورکشاپس تک پھیل گئی۔

    DK بائک الیکٹرک وہیکل پروڈکشن کی عمارت 3 ہزار مربع میٹر پر پھیلی ہوئی ہے، جہاں پھیلنے والی آگ پر قابو پا لیا گیا ہے، تاہم آگ لگنے کی وجہ تاحال معلوم نہیں ہو سکی ہے۔

  • چڑیا گھر میں بندر کے سگریٹ پینے کی ویڈیو پر ہنگامہ

    چڑیا گھر میں بندر کے سگریٹ پینے کی ویڈیو پر ہنگامہ

    ویتنام میں ایک چڑیا گھر میں بندر کے سگریٹ پینے کی ویڈیو نے لوگوں میں غم و غصے کی لہر دوڑا دی، لوگوں نے چڑیا گھر انتظامیہ کو سخت تنقید کا نشانہ بنایا ہے۔

    سوشل میڈیا پر وائرل یہ ویڈیو ویتنام کے شہر ہو شی می کے ایک چڑیا گھر کی ہے، ویڈیو میں نایاب نسل کا بندر جسے اورنگٹن کہا جاتا ہے، سگریٹ نوشی کر رہا ہے۔

    بندر نہایت اطمینان سے بالکل انسانوں کے انداز میں سگریٹ کے کش لگاتا اور دھواں چھوڑتا دکھائی دے رہا ہے۔

    سوشل میڈیا پر وائرل ہونے کے بعد اس ویڈیو نے لوگوں کو غم و غصے میں مبتلا کردیا۔

    ایک شخص کا کہنا تھا کہ ایک تو اس مظلوم جانور کو قید کر کے رکھا گیا ہے، پھر اب وہ انسانوں کو دیکھ دیکھ کر ان جیسی عادات اپنا رہا ہے۔ یہ ویڈیو قطعاً مزاحیہ نہیں بلکہ ہماری بے حسی کا ثبوت ہے کہ کس طرح ہم ذہین جانوروں سے غیر انسانی سلوک کر رہے ہیں۔

    اکثر افراد نے مطالبہ کیا کہ چڑیا گھر قید خانے ہیں اور انہیں بند کردیا جائے اور جانوروں کو آزاد کردیا جائے۔

  • شفاف پلاسٹک کی آب دوز میں زیر آب نظارہ 40 ڈالر پر

    شفاف پلاسٹک کی آب دوز میں زیر آب نظارہ 40 ڈالر پر

    ہنوئی: ویتنام میں سمندر میں زیر آب سیاحت نے نئی کروٹ لے لی ہے، عوامی سطح پر مسافروں کو پہلی بار خیر مقدم کرتے ہوئے ایک شفاف آب دوز نے حیرت انگیز نظاروں سے لطف اندوز کرایا۔

    تفصیلات کے مطابق فلوریڈا کی ایک لگژری آب دوز کمپنی ٹرائٹن کی تیار کردہ ‘ٹرائٹن ڈیپ ویو 24’ نامی سب میرین نے ویتنام کے جزیرہ ہونٹری میں کام شروع کر دیا ہے، یہ آب دوز 2 سال پہلے فراہم کی گئی تھی۔

    یہ سمندر کا بہترین نظارہ فراہم کرنے والی ایک ٹرانسپیرنٹ آبدوز ہے، اس میں 24 نشستیں ہیں، اور یہ 100 میٹر (328 فٹ) گہرائی تک پہنچ سکتی ہے، اس کی باڈی ایکریلک یعنی شفاف پلاسٹک مٹیریل سے بنی ہے، جو آب دوز پر سوار افراد کو پانی کے اندر لاجواب نظارہ کرنے کا موقع فراہم کرتی ہے۔

    اس آب دوز میں سفر کرنے کا ٹکٹ بچوں کے لیے 40 جب کہ بالغ افراد کے لیے 60 ڈالرز ہے۔

    سیاح اس آب دوز میں زیر آب مونگے کی چٹانوں اور سمندری حیات کو قریب سے دیکھ سکتے ہیں، یہ آب دوز زیر آب 30 منٹ تک رہتی ہے اور اس سروس کا ایک مقصد ماحولیاتی مسائل کے حوالے سے شعور اجاگر کرنا بھی ہے۔ 5.4 میٹر لمبی اس آب دوز کو کمپنی نے ماحول دوست قرار دیا ہے جس سے ماحول کے لیے نقصان دہ کسی گیس کا اخراج نہیں ہوتا۔

    اس آب دوز کو اپریل 2020 میں ویتنامی ریزورٹ کو فراہم کیا گیا تھا اور اسی سال اسے مسافروں کے لیے متعارف کرایا جانا تھا، مگر کرونا وائرس کی وبا کے باعث ایسا نہ ہو سکا اور 2 سال کی تاخیر کے بعد اس سروس کا آغاز مئی 2022 میں ہوا۔

  • لوگوں کی زندگیاں خطرے میں ڈالنے والے کورونا مریض کوعدالت نے سزا سنا دی

    لوگوں کی زندگیاں خطرے میں ڈالنے والے کورونا مریض کوعدالت نے سزا سنا دی

    ہنوئے : دنیا بھر میں کورونا وائرس پوری طرح پھیل چکا ہے جس کے نتیجے میں مختلف ممالک کی معیشت اور عوامی صحت کے معاملات بری طرح متاثر ہوئے ہیں۔

    وباء کو بڑھنے سے روکنے کیلئے ویتنام کی عدالت نے پھیلاؤ کے ذمہ داران کو سخت سزا دینے کا فیصلہ کرتے ہوئے ایک شخص کو 5 سال قید کی سزا سنا دی ہے۔

    غیر ملکی خبر رساں ادارے کی رپورٹ کے مطابق ویتنام کے شہری 28 سالہ لی وان ٹری نے گھر میں قرنطینہ کرنے کے قانون کی خلاف ورزی کی جس کے بعد اسے لوگوں میں خطرناک بیماریاں پھیلانے کے جرم میں سزا سنائی گئی۔

    رپورٹ کے مطابق لی وان ٹری نے ملک میں کورونا وائرس کے گڑھ ہو چی من سٹی سے اپنے آبائی صوبےکاماؤ گیا، جس کی وجہ سے وہ کورونا وائرس مزید پھیلنے کی وجہ بنا۔

    کاماؤ میں کورونا وائرس کے کیسز کی تعداد ہو چی من سٹی کے مقابلے میں کم ہے اور صوبے میں 21 دن تک گھر میں قرنطینہ کرنا لازمی قرار دیا گیا ہے تاہم مذکورہ شخص نے اس قانون کی خلاف ورزی کی۔ لی وان ٹری میں کورونا وائرس کی تصدیق 7 جولائی کو ہوئی تھی۔

    عدالتی رپورٹ کے مطابق لی وان ٹری نے گھر میں قرنطینہ کرنے کے طبی قانون کی خلاف ورزی کی جس کی وجہ سے کئی لوگ کورونا وائرس کا شکار ہوئے جس کے باعث 7 اگست2021 کو ایک شخص کا انتقال بھی ہوا۔

    سرکاری میڈیا کے مطابق لی وان ٹری کی وجہ سے 8 لوگ کورونا وائرس سے متاثر ہوئے۔ واضح رہے کہ ویتنام میں کورونا کے تیزی سے پھیلاؤ کے باعث دارالحکومت ہنوئے اور ہوچی من سٹی میں گذشتہ کئی مہینوں سے سخت لاک ڈاؤن لگا ہوا ہے۔

  • ویتنام نے چینی ویکسینز میں سے ایک کی منظوری دے دی

    ویتنام نے چینی ویکسینز میں سے ایک کی منظوری دے دی

    ہنوئی: ویتنام نے بھی چین کی سائنوفارم کی تیار کردہ کرونا وائرس ویکسین کے ہنگامی استعمال کی منظوری دے دی۔

    چینی میڈیا کے مطابق وزارت صحت ویتنام نے اعلان کیا ہے کہ اس نے چین کی سائنوفارم ویکسین کے ہنگامی استعمال کی منظوری دے دی ہے، یہ ویتنام میں منظور شدہ تیسری کرونا ویکسین ہے۔

    ویکسین کی منظوری کے لیے ویتنام کے نائب وزیر صحت ٹرونگ چھوک کونگ نے دستخط کیے، اس سے قبل ویتنام میں آسٹرا زیینکا اور روسی ویکسین اسپوتنک V کی منظوری بھی دی جا چکی ہے۔

    ویتنام میں اب تک مجموعی طور پر تین ویکسینز منظور کی جا چکی ہیں۔

    ویتنام: ہوا میں تیزی سے پھیلنے والی کرونا وائرس کی نئی قسم کا انکشاف

    یاد رہے کہ گزشتہ ہفتے ویتنام میں کو وِڈ 19 کی نئی ہائبرڈ قسم کی موجودگی کا انکشاف ہوا تھا، یہ نئی ہائبرڈ قسم برطانوی اور بھارتی اقسام کی خصوصیات کی بھی حامل ہے، جس کی وجہ سے یہ انتہائی متعدی ہے۔

    ویت ناک کے وزیر صحت نگوین تھان لونگ نے ہفتے کو بتایا تھا کہ اس وائرس میں برطانوی اور بھارتی اقسام کی خواص موجود ہیں، اس وائرس کی یہ ہائبرڈ قسم ہوا میں بہت تیزی سے پھیل سکتی ہے، جلد وزارت کی جانب سے ورلڈ جِین میپ پر اس نئی قسم کا اعلان کر دیا جائے گا۔

    انھوں نے کہا کہ کرونا وائرس کے نئے مریضوں میں جین سیکوئسنگ کے دوران اس ہائبرڈ قسم کا انکشاف ہوا، یعنی یہ دراصل بھارتی قسم ہے جس میں تبدیلیاں ہوئی ہیں، اور اس کی اصلی قسم برطانوی تھی۔

  • ویتنام: ہوا میں تیزی سے پھیلنے والی کرونا وائرس کی نئی قسم کا انکشاف

    ویتنام: ہوا میں تیزی سے پھیلنے والی کرونا وائرس کی نئی قسم کا انکشاف

    ہنوئی: ویتنام میں کو وِڈ 19 کی نئی ہائبرڈ قسم کی موجودگی کا انکشاف ہوا ہے۔

    تفصیلات کے مطابق برطانیہ اور بھارت میں پہلی بار سامنے آنے والی کرونا وائرس کی زیادہ متعدی اقسام کے بعد اب ویتنام میں ایک نئی ہائبرڈ قسم کی نشان دہی ہوئی ہے۔

    یہ نئی ہائبرڈ قسم برطانوی اور بھارتی اقسام کی خصوصیات کی بھی حامل ہے، جس کی وجہ سے یہ انتہائی متعدی ہے۔

    ویت ناک کے وزیر صحت نگوین تھان لونگ نے ہفتے کو بتایا کہ اس وائرس میں برطانوی اور بھارتی اقسام کی خواص موجود ہیں، اس وائرس کی یہ ہائبرڈ قسم ہوا میں بہت تیزی سے پھیل سکتی ہے، جلد وزارت کی جانب سے ورلڈ جِین میپ پر اس نئی قسم کا اعلان کر دیا جائے گا۔

    انھوں نے کہا کہ کرونا وائرس کے نئے مریضوں میں جین سیکوئسنگ کے دوران اس ہائبرڈ قسم کا انکشاف ہوا، یعنی یہ دراصل بھارتی قسم ہے جس میں تبدیلیاں ہوئی ہیں، اور اس کی اصلی قسم برطانوی تھی۔

    واضح رہے کہ برطانیہ اور بھارت میں سامنے آنے والی کرونا وائرس کی دو تبدیل شدہ اقسام، ویتنام میں بھی جاری وبا کی موجودہ لہر کے دوران زیادہ تر کیسز کی وجہ ہیں۔

    ویتنام میں اب تک صرف 6 ہزار 713 کرونا کیسز سامنے آئے ہیں، جب کہ گزشتہ چوبیس گھنٹوں میں 143 نئے کیسز کی تصدیق ہوئی، اور اب تک مجموعی طور پر کرونا انفیکشن سے 47 افراد جان سے گئے۔

  • پیٹ کے درد کی شکایت لے کر اسپتال پہنچنے والی خاتون کے جسم سے کیا نکلا؟

    پیٹ کے درد کی شکایت لے کر اسپتال پہنچنے والی خاتون کے جسم سے کیا نکلا؟

    ویتنام میں ایک خاتون پیٹ میں درد کی شکایت لے کر اسپتال پہنچیں لیکن سی ٹی اسکین کے دوران ان کے جسم میں موجود چیز نے لوگوں کو حیران کردیا۔

    غیر ملکی میڈیا کے مطابق ویتنام میں ایک خاتون پیٹ کے درد کی شکایت لے کر ڈاکٹر کے پاس پہنچیں، ڈاکٹرز نے ان کا سی ٹی اسکین کیا تو انہیں پتہ چلا کہ خاتون کے بلیڈر میں 400 گرام سے زائد وزنی پتھر ہے۔

    اس قدر وزنی پتھر کی موجودگی کے انکشاف کے بعد ڈاکٹرز نے فوری طور پر خاتون کی سرجری کی۔

    سماجی رابطے کی ویب سائٹس پر خاتون کے پیٹ سے نکلے تقریباً آدھے کلو کے پتھر کی تصاویر کافی وائرل ہورہی ہیں۔

    ڈاکٹرز کا کہنا ہے کہ خاتون کے جسم میں طویل عرصے سے یہ پتھر موجود تھا تاہم حیرت انگیز بات یہ ہے کہ خاتون کو اس کی موجودگی محسوس نہیں ہوئی۔

    سوشل میڈیا صارفین کا کہنا تھا کہ کسی کے جسم میں اتنا بڑا پتھر ہو اور اس کو اس سے پہلے کوئی درد نہ ہوا ہو، ایسا کیسے ممکن ہے؟

    ایک شخص نے لکھا کہ میرے جسم میں ایک چھوٹا سا پتھر تھا جس کی جسامت نہایت معمولی تھی تب بھی میں درد سے کراہ اٹھتا تھا، ان خاتون کو درد کیسے نہیں ہوا۔

    اس سے قبل چین میں ایک 54 سالہ خاتون کے جسم سے 1 ہزار 48 گرام وزنی پتھری نکالی گئی تھی، چین میں اس کیس کو میڈیکل کی تاریخ کا انوکھا کیس مانا جاتا ہے۔

  • سونے کا ہوٹل: عمارت، برتن اور کھانوں میں بھی سونا، دیکھیے خصوصی تصاویر

    سونے کا ہوٹل: عمارت، برتن اور کھانوں میں بھی سونا، دیکھیے خصوصی تصاویر

    ہنوئی: جنوب مشرقی ایشیائی ملک ویت نام میں سونے کا ایک عجوبہ ہوٹل تیار کیا گیا ہے، جس میں نہ صرف باہر سے عمارت، بلکہ اندر سے بھی فرنیچر میں، برتن اور کھانوں تک میں سونے کا بھاری مقدار میں استعمال کیا گیا ہے۔

    تفصیلات کے مطابق ویت نام کے دارالحکومت ہنوئی میں 20 کروڑ ڈالر کی لاگت سے سونے کا ایک ہوٹل بنایا گیا ہے، ہوٹل کی عمارت کو باہر سے آراستہ کرنے کے لیے سونے کا استعمال کیا گیا ہے۔

    ہوٹل کے اندر ساز و سامان بھی سونے سے تیار کیا گیا ہے، آپ کو یہ جان کر حیرت ہوگی کہ ہوٹل آنے والوں کو جو کھانا پیش کیا جاتا ہے اس میں بھی سونے کا استعمال کیا جاتا ہے۔

    قدیم انسانی تاریخ میں ہم ایسے قصوں سے واقف ہیں جب کہ کوئی بادشاہ زر و جواہر کا اتنا دلدادہ ہوتا کہ عمارتیں اور محل سونے سے بنوا لیتا، جیسا کہ شداد کی جنت بھی مشہور ہے، تاہم جدید دنیا میں ویت نام میں تیار ہونے والا یہ ہوٹل دنیا کا پہلا سونے کا ہوٹل ہے۔

    یہ ہوٹل ویت نام کے ایک ڈویلپر نے تعمیر کیا ہے جو 25 منزلوں پر مشتمل ہے، ہنوئی میں تعمیر شدہ اس پُر تعیش ہوٹل میں گولڈ پلیٹڈ ٹائلز کا بڑے پیمانے پر استعمال ہوا ہے۔

    بتایا جا رہا ہے کہ یہ دنیا کا مہنگا ترین ہوٹل ہے، جہاں ایک رات کا قیام 250 امریکی ڈالر ہے۔

    پہلے سونے کا ذکر صرف زیورات کی حد تک محدود تھا لیکن اب یہ در و دیوار تک بھی پہنچ گیا ہے، ویت نام میں تعمیر کردہ یہ ہوٹل 5 ہزار رقبے پر قائم ہے، جس کی تزئین و آرائش، کھڑکیاں، دروازے اور عمارت کے بیرونی حصوں پر سونے کا پانی چڑھایا گیا ہے، یہ ہوٹل دنیا میں اپنی نوعیت کا پہلا گولڈ پلیٹیڈ ہوٹل ہے۔

    انتظامیہ کا کہنا ہے کہ ہوٹل کے ایکسٹیریئر پر 24 قیراط کے سونے کی پلیٹ چڑھائی گئی ہے، جب کہ 5 ہزار اسکوائر میٹر پر سنہری ٹائلز لگی ہوئی ہیں، 25 منزلہ اس عمارت کے اندرونی حصوں پر بھی سنہری اشیا سے سجاوٹ کی گئی ہے۔

    کموڈ اور باتھ ٹب سے لے کر نلکوں تک اور چمچے، پلیٹ اور پیالیوں سے لے کر عمارت کے سوئمنگ پول ایریا تک ہر چیز سنہری رنگ میں چمک رہی ہوتی ہے۔

  • دنیا کا پہلا 25 منزلہ سونے کا ہوٹل، ایک رات قیام کا کرایہ کتنا؟

    دنیا کا پہلا 25 منزلہ سونے کا ہوٹل، ایک رات قیام کا کرایہ کتنا؟

    ہنوئی: ویت نام کے دارالحکومت میں ایک ڈویلپر نے دنیا کا پہلا سونے کا ہوٹل تعمیر کر لیا ہے جو 25 منزلوں پر مشتمل ہے۔

    غیر ملکی میڈیا کے مطابق ویت نام کے ایک ڈویلپر نے دعویٰ کیا ہے کہ انھوں نے سونے کا پچیس منزل ہوٹل تعمیر کیا ہے جو اپنی نوعیت کا دنیا میں پہلا ہوٹل ہے، ہنوئی میں تعمیر شدہ اس پُر تعیش ہوٹل میں گولڈ پلیٹڈ ٹائلز کا استعمال ہوا ہے۔

    بتایا جا رہا ہے کہ یہ دنیا کا مہنگا ترین ہوٹل ہے، جہاں ایک رات کا قیام 250 امریکی ڈالر ہے، پہلے سونے کا ذکر صرف زیورات کی حد تک محدود تھا لیکن اب یہ در و دیوار تک بھی پہنچ گیا ہے، ویت نام میں تعمیر کردہ یہ ہوٹل 5 ہزار رقبے پر قائم ہے، جس کی تزئین و آرائش، کھڑکیاں، دروازے اور عمارت کے بیرونی حصوں پر سونے کا پانی چڑھایا گیا ہے، یہ ہوٹل دنیا میں اپنی نوعیت کا پہلا گولڈ پلیٹیڈ ہوٹل ہے۔

    انتظامیہ کا کہنا ہے کہ ہوٹل کے ایکسٹیریئر پر 24 قیراط کے سونے کی پلیٹ چڑھائی گئی ہے، جب کہ 5 ہزار اسکوائر میٹر پر سنہری ٹائلز لگی ہوئی ہیں، 25 منزلہ اس عمارت کے اندرونی حصوں پر بھی سنہری اشیا سے سجاوٹ کی گئی ہے۔

    کموڈ اور باتھ ٹب سے لے کر نلکوں تک اور چمچے، پلیٹ اور پیالیوں سے لے کر عمارت کے سوئمنگ پول ایریا تک ہر چیز سنہری رنگ میں چمک رہی ہوتی ہے۔

    ویتنام کا یہ پہلا پرتعیش گولڈ پلیٹڈ ہوٹل وسیع سطح پر لوگوں کی توجہ کا مرکز بن گیا ہے۔