ابو ظہبی: متحدہ عرب امارات کے شہر دبئی میں 58 ارب پاکستانی روپے کا ولا فروخت کے لیے پیش کردیا، ولا کو خریدنے کے لیے ایک بھارتی اور ایک روسی شہری آپس میں مدمقابل ہیں۔
اردو نیوز کے مطابق دبئی کے طلال الامارات محلے میں فرسائی محل کی طرز پر تیار کردہ پرآسائش ولا کی نیلامی میں ایک بھارتی اور ایک روسی کے درمیان ٹھن گئی، ولا کی ابتدائی قیمت 750 ملین درہم (58 ارب پاکستانی روپے) رکھی گئی ہے۔
دبئی میں ریئل اسٹیٹ بروکریج فرم نے ایک روز قبل ہی ولا 750 ملین درہم میں فروخت کرنے کی پیشکش کی تھی۔
ولا کا اندرونی رقبہ 60 ہزار مربع فٹ ہے جو صرف 5 بیڈ رومز پر مشتمل ہے، ماسٹر بیڈروم 4 ہزار مربع فٹ پر بنا ہوا ہے، اتنا بڑا رقبہ بیشتر مکانات سے زیادہ ہے۔ ولا میں زمینی منزل، ڈائننگ ہال اور پلے روم ہیں۔
ذرائع کا کہنا ہے کہ نیلامی میں ممکنہ طور پر حصہ لینے والا انڈین طلال الامارات ہی میں رہائش پذیر ہے، اس علاقے میں اس کے 3 ولاز ہیں۔
سنگ مرمر سے بنے ولا کے ایک مربع فٹ کی قیمت 12 ہزار 500 درہم تک ہے، یہ طلال الامارات میں رجسٹرڈ دیگر ولاز کی قیمت کے حوالے سے دگنی ہے۔ یہاں اگست 2022 میں مہنگا ترین مکان 210 ملین درہم میں فروخت ہوا تھا۔
