جنیوا: عالمی ادارہ صحت(ڈبلیو ایچ او) کا کہنا ہے کہ کروناوائرس کے خلاف جنگ کے لیے ورلڈبینک اور آئی ایم ایف نے فنڈ جاری کردیے ہیں، فنڈز صحت کی سہولتیں اقتصادی اثرات سے بچنے پر خرچ ہوں گے۔
اے آر وائی نیوز کے مطابق ڈبلیو ایچ او نے کروناوائرس سے متعلق تشویش کا اظہار کرتے ہوئے کہا ہے کہ افواہیں اور غلط معلومات کے خلاف لڑائی کرونا سے جنگ کا اہم جز ہے، دنیا بھر میں اب تک کرونا کے 95265کیس رپورٹ ہوئے، فنڈ کی مد میں ملی رقم سے سپلائی اور آلات کی فراہمی کو ترجیح دیں گے، فنڈز کرونا سے لڑنے کے لیے ضرورت مند ملکوں کو دیے جارہے ہیں، کروناوائرس تمام ممالک کے لیے خطرہ ہے چاہے امیر ہو یاغریب، کچھ ملکوں کا وائرس کو سنجیدگی سے نہ لینا باعث تشویش ہے۔
عالمی ادارہ صحت کے سربراہ ڈاکٹرٹیڈروس نے بتایا کہ اب تک کروناوائرس سے دنیا بھر میں 3281اموات ہوئیں، چین میں 24گھنٹے کے دوران143کروناکیس رپورٹ ہوئے، زیادہ تر کیس ہوبئی صوبے سے سامنے آئے۔
ڈی جی ڈبلیوایچ اوڈاکٹرٹیڈروس کا کہنا تھا کہ 33ملکوں میں چین سے باہر 2055 کیس رپورٹ ہوئے، جنوبی کوریا سے کرونا کیسز کی تعداد میں کمی حوصلہ بخش ہے۔
کرونا وائرس سے اموات کی تعداد 3286 ہو گئی
خیال رہے کہ کرونا وائرس سے ہونے والی ہلاکتوں کا سلسلہ روکا نہیں جا سکا، نہ ہی اس کے پھیلاؤ کے آگے بندھ باندھا جا سکا ہے، دنیا بھر میں اس وائرس سے 95 ہزار 488 افراد متاثر ہو چکے ہیں، دوسری طرف صحت یابی کا عمل بھی جاری ہے اور اب تک 53689 افراد مہلک وائرس سے صحت یاب ہو چکے ہیں، عالمی سطح پر صحت یابی کے عمل پر خصوصی توجہ دی جا رہی ہے۔
