مچھلی کے تیل کو آنکھوں کی بینائی کے لیے مفید سمجھا جاتا ہے کیونکہ اس تیل سے بنی گولیوں کا استعمال آنکھوں کو رات کی تاریکی سے مطابقت کے قابل بناتا ہے۔
ماہرین صحت کے مطابق مچھلی کے تیل میں موجود اومیگا 3 فیٹی ایسڈز آنکھوں کی صحت کے لیے ضروری ہیں اور بینائی کو بہتر بنانے میں مدد کر سکتے ہیں۔
آنکھوں کی روشنی تیز کرنے کے لیے ڈاکٹروں کی جانب سے برسوں سے مچھلی کے تیل کی گولیاں یا تیل تجویز کی جاتی رہی ہیں البتہ اس کے مفید اور غیر مفید ہونے پر کافی بحث رہی ہے اور طبی ماہرین ہی کی جانب سے اس کے حق اور مخالفت میں نتائج سامنے آتے رہے ہیں۔
طبی ماہرین کی جانب اب اس بات کی تصدیق کی گئی ہے کہ مچھلی کے تیل اور اس سے بنی گولیوں میں فیٹی ایسڈ، ڈوکوسا ہیکسا نوئک ایسڈ (ڈی ایچ اے) موجود ہوتے ہیں جو سرمئی اور ٹونا سمیت دیگر مچھلیوں سے کشید کیا جاتا ہے۔
مچھلی کے تیل کی گولیاں استعمال کرنے سے یا اس کا تیل استعمال کرنے سے کم ہوتی روشنی میں آنکھیں ماحول کے لحاظ سے خود کو منظم کرلیتی ہیں۔
مچھلی کے تیل سے متعلق برطانیہ کی لوبورو یونیورسٹی کے سائنسدانوں نے ایک مطالعہ بھی کیا ہے ان کا کہنا ہے کہ جسم میں فیٹی ایسڈ کی مقدار بڑھنے سے اندھیرے میں بہتر طور پر دیکھنے کی صلاحیت بڑھ جاتی ہے۔
سائنس دانوں نے اس مطالعے کے دوران 19 رضاکاروں کو 4 ہفتے تک مچھلی کے تیل کی 260 ملی گرام اور 780 ملی گرام کی گولیاں کھلائی اور مدھم روشنی میں دیوار پر لکھے نمبر کو پڑھنے کا کہا تو انہوں نے دھندلاہٹ میں بھی دیوار پر لکھے نمبرز کو پڑھ لیا۔