کراچی: متحدہ قومی موومنٹ کے ڈپٹی کنوینر فاروق ستار نے کہا ہے کہ ہمارا امیدوار بھاری اکثریت سے فتح حاصل کرے گا، ملیر کے عوام کو خراج تحسین پیش کرتا ہوں۔
صوبائی اسمبلی کے حلقہ پی ایس 127 کے ضمنی انتخاب کے دوران ڈگری کالج ملیر کے دورے میں اےآر وائی نیوز سے خصوصی بات چیت میں فاروق ستار کا کہنا تھا کہ ایم کیو ایم نے پرامن انداز میں انتخابات میں حصہ لیا،ہمیں امید ہے کہ ہمارا امیدوار بھاری اکثریت سے کامیابی حاصل کرے گا۔
دریں اثنا پی ایس 127 میں ضمنی انتخاب کا وقت ختم ہوگیا، پولنگ عملے کی جانب سے ووٹوں کی گنتی کا عمل جاری ہے، چھ بجے کے بعد انتخابی نتائج نشر ہوں گے۔
نمائندہ اے آر وائی نیوز کے مطابق حلقہ انتخاب میں رائے شماری کا تناسب انتہائی کم رہا، صرف 15فیصد ٹرن اوور سامنے آیا۔
قبل ازیں ایم کیو ایم پاکستان کے رہنما خواجہ اظہار الحسن اور سینیٹر نسرین جلیل نے سندھ اسمبلی کے حلقہ 127 ملیر کے الیکشن میں دھاندلی کےالزامات عائد کر دیئے جبکہ پیپلز پارٹی کے نجمی عالم نے دھاندلی کی تردید کر دی۔