ARYNews.tv | Urdu – Har Lamha Bakhabar

Tag: visit

  • ایرانی وزیر خارجہ آج سرکاری دورے پر پاکستان پہنچیں گے

    ایرانی وزیر خارجہ آج سرکاری دورے پر پاکستان پہنچیں گے

    اسلام آباد: ایرانی وزیر خارجہ جواد ظریف آج سرکاری دورے پر پاکستان پہنچیں گے، اس دوران اہم ملاقاتیں کی جائیں گی۔

    تفصیلات کے مطابق ایران کے وزیر خارجہ جواد ظریف اپنے دورہ پاکستان کے موقع پر شاہ محمود قریشی کے علاوہ وزیر اعظم عمران خان سے بھی ملاقات کریں گے۔

    جواد ظریف کی پاکستانی ہم منصب شاہ محمود سے اہم ملاقات ہوگی، پی ٹی آئی حکومت میں آنے کے بعد ایرانی وزیرخارجہ کا دوسرا دورہ پاکستان ہوگا۔

    خیال رہے کہ رواں سال اگست میں ایرانی وزیر خارجہ جواد ظریف نے پاکستان کا دورہ کیا تھا۔

    وزیر خارجہ کی ایرانی ہم منصب سے ملاقات

    پاکستان اور ایران کے وزرائے خارجہ کے درمیان ملاقات کے دوران دونوں ممالک کے دیرینہ تعلقات کو فروغ دینے کے عزم کا اعادہ کیا گیا تھا۔

    واضح رہے کہ اس موقع پر شاہ محمود قریشی نے کہا تھا کہ نئی حکومت کے قیام کے بعد کسی بھی وزیر خارجہ کا یہ پہلا دورہ ہے۔ ایرانی وزیر خارجہ کی پاکستان آمد پر شکر گزار ہیں۔

    ایرانی وزیر خارجہ کا کہنا تھا کہ خطے میں امن و خوشحالی کے لیے مل کر کام کریں گے، پاکستان کے ساتھ برادرانہ تعلقات ہیں، خاص ہمسایہ ملک ہے۔

  • داتا دربار پر دعا کرنے سے مجھے طاقت ملتی ہے، باکسرعامر خان

    داتا دربار پر دعا کرنے سے مجھے طاقت ملتی ہے، باکسرعامر خان

    لاہور : پاکستانی نژاد برطانوی باکسرعامر خان نے داتا دربار پر حاضری دی اور کہا یہاں دعائیں مانگنے سے مجھے طاقت ملتی ہے، دعا ہے کہ وزیراعظم عمران خان ملک کی ترقی میں اہم کردار ادا کریں۔

    تفصیلات کے مطابق پاکستانی نژاد برطانوی باکسرعامر خان نے لاہور میں حضرت داتا گنج بخش کے مزار پر حاضری اور فاتحہ خوانی کی۔

    اس موقع پر میڈیا سے گفتگو کرتے ہوئے باکسر عامر خان کا کہنا تھا کہ انہیں یہاں دعائیں مانگنے سے رنگ میں طاقت ملتی ہے، آج خصوصی طور پر پاکستان کے استحکام کے لیے دعا کی ہے۔

    باکسر عامر خان نے کہا دعا ہے کہ وزیر اعظم عمران خان ملک کی ترقی میں اہم کردار ادا کریں،   پاکستان میں باکسنگ کا فروغ چاہتے ہیں، جلد اس سلسلے میں وزیر اعظم عمران خان سے ملاقات کریں گے۔

    ان کا کہنا تھا کہ مارچ میں ان کی فائٹ انگلینڈ میں ہوگی، دو فائٹس کی وجہ سے سپر باکسنگ لیگ ملتوی کی گئی، مارچ میں ان کی فائٹ کے بعد سپر باکسنگ لیگ کا انعقاد ہوگا، پاکستان سمیت دنیا بھر میں سپر باکسنگ لیگ منفرد ہو گی۔

    مزید پڑھیں : باکسر عامر خان کی واہگہ بارڈر آمد 

    گذشتہ روز  واہگہ بارڈر آمد کے موقع عالمی شہرت یافتہ باکسر عامر خان نے  بھارتی باکسرز کو چیلنج کرتے ہوئے کہا تھا نون لیگ کی حکومت نے وعدہ کرنے کے باوجود باکسنگ رنگ کے لیے جگہ نہیں دی، عمران خان سے بہت توقعات ہیں۔

      اے آر وائی نیوز سے گفتگو کرتے ہوئےانھوں نے عمران خان کو بہترین سیاست دان قرار دیتے ہوئے کہا  تھا میں پاکستان کی خوب صورتی دیکھنے کے لیے آیا ہوں اور میری خواہش ہے کہ وزیرِ اعظم سے ملوں۔

    خیال رہے کہ بین الاقوامی شہرت یافتہ پاکستانی نژاد باکسر غیر ملکی پرواز سے  لاہور پہنچے، انھوں نے پرواز میں موجود پاکستانی کرکٹر اظہر علی کے ساتھ تصویر بھی بنوائی۔

  • ابوظہبی: اسرائیلی وزیر کا اہم ترین دورہ امارات

    ابوظہبی: اسرائیلی وزیر کا اہم ترین دورہ امارات

    ابوظہبی : اسرائیل کی خاتون وزیر برائے کھیل و ثقافت مری ریگیف نے دورہ متحدہ عرب امارات کے موقع پر ابوظہبی کی تاریخی مسجد شیخ زید کا دورہ کیا، تاریخ میں پہلی مرتبہ کسی اسرائیلی وزیر نے امارات کا دورہ کیا ہے۔

    تفصیلات کے مطابق غٖاصب صیہونی ریاست اسرائیل کے وزیر اعظم بنجامن نیتن یاہو کی جانب سے سلطنت عمان کا سرکاری دورہ کرنے کے بعد تاریخ میں پہلی مرتبہ فلسطین پر قابض اسرائیل کی وزیر برائے کھیل و ثقافت نے متحدہ عرب امارات کا دورہ کیا۔

    غیر ملکی خبر رساں ادارے کا کہنا تھا کہ اسرائیل کی خاتون وزیر ثقافت و کھیل مری ریگیف نے دورہ امارات کے دوران دارالحکومت ابوظہبی میں مشور و معروف مسجد شیخ زید کا بھی دورہ کیا۔

    سیاسی ماہرین کا کہنا ہے کہ اسرائیلی وزیر اعظم کے دورہ عمان کے بعد اسرائیل وزیر کا متحدہ عرب امارات کا دورہ مشرق وسطیٰ میں ڈرامائی تبدیلی کا پیغام دیتا ہے۔

    سیاسی ماہرین کا کہنا ہے کہ وزیر کھیل و ثقافت مری ریگیف کا دورہ امارات اسرائیل اور متحدہ عرب امارات کے درمیان تعلقات کے نئے باب کا آغاز معلوم ہوتا ہے۔

    اسرائیل کی خاتون کا شیخ مسجد کے دورے کے موقع شیخ زید مسجد میں رکھی کتاب میں اپنے تاثرات درج کرتے ہوئے کہا کہ مسجد میں آکر دوستی اور امن کا احساس ہوتا ہے، میری خواہش ہے کہ ابو ظہبی کے شہری کے سب کے لیے امن اور نیک تمناؤں کا اظہار کریں‘۔

    خیال رہے کہ ابوظہبی میں جاری عالمی جوڈو ٹورنارمنٹ میں اسرائیلی کھلاڑی کی جانب سے سونے کا میڈل جیتنے پر غاصب صیہونی ریاست اسرائیل کا قومی ترانہ پیش کیا گیا۔

    غیر ملکی خبر رساں ادارے کا کہنا تھا کہ انہی دنوں اسرائیلی جمناسٹکز کا ایک وفد قطر کے دورے پر دوحہ میں موجود ہے۔

    مزید پڑھیں : عمان نے اسرائیل کو ریاست تسلیم کرنے کا اعلان کردیا

    واضح رہے کہ غاصب صیہونی ریاست اسرائیل کے انتہا پسند وزیر اعظم نیتن یاہو نے جمعے کے روز خلیجی سلطنت عمان کا خفیہ دورہ کیا تھا جس بعد سلطنت عمان نے اسرائیل کے وجود کو تسلیم کرنے کا اعلان کرتے ہوئے کہا تھا کہ اب وقت آگیا ہے کہ اسرائیل کو مشرق وسطیٰ میں ریاست تسلیم کیا جائے۔

  • باکسر عامرخان برطانیہ سے براستہ دبئی پاکستان پہنچ گئے

    باکسر عامرخان برطانیہ سے براستہ دبئی پاکستان پہنچ گئے

    لاہور: پاکستانی نژاد باکسر عامرخان برطانیہ سے براستہ دبئی پاکستان پہنچ گئے، وہ آج داتا دربار پر حاضری دیں گے۔

    تفصیلات کے مطابق بین الاقوامی شہرت یافتہ پاکستانی نژاد باکسر غیر ملکی پرواز سے لاہور پہنچے، وہ آج داتا دربار پر حاضری دیں گے۔

    باکسر عامر خان نے پرواز میں موجود پاکستانی کرکٹر اظہر علی کے ساتھ تصویر بھی بنوائی، آسٹریلیا کے خلاف سیریز کے بعد اظہرعلی بھی اسی پرواز سے لاہور ایئرپورٹ پہنچے۔

    عامر خان اکثر پاکستان کا دورہ کرتے ہیں اور ملک میں موجود باکسنگ کے ٹیلنٖٹ کو بھی سراہتے ہیں۔

    رواں سال جون میں ایک پریس کانفرنس میں انہوں نے پاکستان میں باکسنگ مقاملے کے انعقاد پر منتظمین کو مبارکباد دی اور کھلاڑیوں کی تعریف بھی کی تھی۔

    باکسر عامر خان رنگ میں اترنے کے لیے تیار

    واضح رہے کہ پاکستان کے باکسنگ کے فروغ کے لیے عامر خان کا کہنا تھا کہ پاکستان میں باکسنگ کے انعقاد کے انعقاد پر پرجوش ہوں، پاکستان میں باکسنگ کا بے پناہ ٹیلنٹ موجود ہے۔

    انہوں نے کہا تھا کہ پاکستان میں پروفیشنل باکسنگ لارہے ہیں، ورلڈ باکسنگ کونسل سب سے بڑا باکسنگ ادارہ ہے، ہر کوئی کرکٹ کو فروغ دیتا ہے، باکسنگ کو آگے بڑھانے والے کم ہیں۔

  • سرمایہ کاری کانفرنس: وزیراعظم 23 اکتوبر کو ریاض جائیں گے

    سرمایہ کاری کانفرنس: وزیراعظم 23 اکتوبر کو ریاض جائیں گے

    اسلام آباد : وزیراعظم عمران خان سعودی عرب میں ہونے والی مستقبل کے سرمایہ کاری اقدامات پر کانفرنس میں شرکت کے لیے 23 اکتوبر کو ریاض پہنچیں گے۔

    تفصیلات کے مطابق ترجمان دفتر خارجہ کا کہنا ہے کہ سعودی عرب میں 23 اکتوبر سے مستقبل کے سرمایہ کاری اقدامات پر کانفرنس کا آغاز ہوگا، جس میں شرکت کے لیے وزیراعظم عمران خان 23 اکتوبر کو ریاض پہنچیں گے۔

    دفتر خارجہ نے کہا وزیراعظم کانفرنس میں پاکستان میں سرمایہ کاری اورمعاشی مواقع پرروشنی ڈالیں گے اور اپنے آئندہ5 سالہ وژن سے دنیا کو آگاہ کریں گے۔

    ترجمان نے بتایا کہ وزیراعظم کو دورے کی دعوت شاہ سلمان بن عبدالعزیزنے دی، وہ پاکستان میں سرمایہ کاری کی خواہشمند کاروباری شخصیات سےبھی ملیں گے۔

    دفتر خارجہ کے ترجمان کے مطابق وزیراعظم شاہ سلمان ،ولی عہد شہزادہ محمدبن سلمان سے ملاقاتیں کریں گے اور باہمی دلچسپی کے امور پر تبادلہ خیال کریں گے۔

    ترجمان کا کہنا تھا کہ سرمایہ کاری کانفرنس میں90 ممالک سے 3ہزار 800 مندوب شرکت کررہے ہیں۔

    یاد رہے کہ وزیرِ اعظم عمران خان 18 ستمبر کو دو روزہ سرکاری دورے پر سعودی عرب گئے تھے جو ان کا پہلا غیر ملکی دورہ تھا، ان کے لیے خصوصی طور پر روضہ رسولﷺ کے دروازے کھولے گئے تھے۔

    مزید  پڑھیں:  وزیراعظم دو روزہ دورے پر سعودی عرب پہنچ گئے، روضہ رسولﷺپر حاضری

    وزیرِ اعظم عمران خان نے مکہ مکرمہ میں عمرہ بھی ادا کیا، بیت اللہ پہنچنے پر ان کے لیے خصوصی طور پر خانۂ کعبہ کا دروازہ بھی کھولا گیا، جہاں وہ وفد کے ساتھ بیت اللہ شریف میں داخل ہوئے، نوافل ادا کیے اور پاکستان اور عالم اسلام کی سلامتی کے لیے دعائیں کیں۔

  • تاجر خواتین کا وفد دس روزہ دورے پر بیلجیم اور فرانس روانہ، کاروباری امکانات کا جائزہ لیا جائے گا

    تاجر خواتین کا وفد دس روزہ دورے پر بیلجیم اور فرانس روانہ، کاروباری امکانات کا جائزہ لیا جائے گا

    برسلز: اسلام آباد ویمن چیمبر آف کامرس کا ایک وفد کاروباری امکانات کا جائزہ لینے بیلجیم اور فرانس کے دس روزہ دورے پر راونہ ہوگیا۔

    تفصیلات کے مطابق تاجر خواتین پر مشتمل دس رکنی وفد ایف پی سی سی آئی کے سابق نائب صدر نائمہ انصاری کی قیادت میں برسلز کا دورے کرنے اور نجی و سرکاری شعبہ کی اہم شخصیات سے ملاقاتوں کے بعد پیرس بھی جائے گا۔

    پیرس میں فیشن اور بیوٹی انڈسٹری کا تفصیلی مطالعہ کیا جائے گا جبکہ دونوں ممالک میں پاکستان کے سفیروں سے ملاقات بھی شیڈول کا حصہ ہے۔

    اسلام آباد ویمن چیمبر کے جاری بیان کے مطابق ویمن چیمبر کا وفد دونوں ممالک میں مختلف تجارتی تنظیموں اور تجارتی حکام سے تفصیلی ملاقاتیں کرے گا جبکہ کئی نمائشوں میں بھی شرکت کر کے درامدات اور برامدات کے امکانات کا جائزہ لیا جائے گا۔

    چینی تاجروں کے وفد کا اسلام آباد چیمبر آف کامرس کا دورہ

    اس دورے میں دونوں ممالک میں موجود پاکستان سرمایہ کاروں سے بھی تبادلہ خیال کیا جائے گا جبکہ وہاں کے سرمایہ کاروں کو پاکستان میں سرمایہ کاری اور سی پیک کے پوٹینشل سے آگاہ کیا جائے گا۔

    ملک میں سی پیک کی وجہ سے پاکستان اس خطہ میں ایک اہم تجارتی مرکز کی حیثیت سے ابھر رہا ہے، ان ممالک میں ٹیکسٹائل، چاول اور حلال اشیاء کی برامدات میں اضافہ کی کوشش کی جائے گی جبکہ پاکستانی مصنوعات بھی متعارف کروائی جائیں گی۔

  • گزشتہ حکومت کے 6بڑے منصوبوں کا آڈٹ کرایا جائے گا، مراد سعید

    گزشتہ حکومت کے 6بڑے منصوبوں کا آڈٹ کرایا جائے گا، مراد سعید

    کراچی : وزیر مملکت برائے مواصلات مراد سعید نے کہا ہے کہ پاکستان سے کرپشن کا خاتمہ ہمارا عزم ہے، گزشتہ حکومت کے 6 بڑے منصوبوں کا آڈٹ کرایا جائے گا، کراچی کاایک منصوبہ5ارب سے22ارب تک پہنچ گیا ہے۔

    تفصیلات کے مطابق کراچی میں وزیر مملکت برائے مواصلات مراد سعید نے مزار قائد پر حاضری دی اور پھولوں کی چادر چڑھائی اور فاتحہ خوانی کی، اس موقع پر انھیں گارڈ آف آنر بھی پیش کیا گیا۔

    وزیر مملکت برائے مواصلات مراد سعید کا مزار قائد پر میڈیا سے گفتگو میں کہا کہ سندھ میں دو دن کا دورہ ہے، چور اور ڈاکووٴں کے احتساب پر اپوزیشن خوف کاشکارہوجاتی ہے،، اپوزیشن کی جانب سے بہت شورشرابہ کیا جارہا ہے۔

    مراد سعید کا کہنا تھا کہ 28 ہزارارب روپے کا قرضہ کہاں خرچ کیا گیا ہم نے اپنی وزارت کے 6 بڑے منصوبوں کا آڈٹ شروع کردیاہے سندھ میں پیپلز پارٹی کی حکمرانی خستہ حالی کا شکار ہے۔

    انھوں نے مزید کہا ہم پورے پاکستان کو گرین بنائیں گے، گرین لائن پر جلد کام مکمل ہوجائے گا، میرے پروٹوکول میں محکمے کے افسران کی بھی گاڑیاں شامل ہیں۔

    وزیر مملکت برائے مواصلات کا کہنا تھا کہ کراچی کا ایک منصوبہ5 ارب سے 22ارب تک پہنچ گیا ہے، گزشتہ حکومت کے 6 بڑے منصوبوں کا آڈٹ کرایا جائے گا، پاکستان سے کرپشن کا خاتمہ ہمارا عزم ہے۔

    مراد سعید نے کہا کہ جب سرمایہ کاری آئے گی تو پاکستان خو شحال ہوگا، کراچی کے دورےکامقصد یہاں پرترقیاتی کام ہیں، اپنی وزارت میں بھی احتساب کا عمل شر وع کیا ہے۔

    سندھ حکومت سے مل کر نیشنل ہائی وے سے تجاوزات ہٹائیں گے، بڑ ے بڑ ے مافیا کےخلاف آپریشن کیا جائے گا اور نیشنل اور سپرہائی ویز کی صفائی کی جائے گی۔

  • جرمن صدر کا دورہ یونان، اپنے ہم منصب سے ملاقات کریں گے

    جرمن صدر کا دورہ یونان، اپنے ہم منصب سے ملاقات کریں گے

    برلن: جرمنی کے صدر فرانک والٹر اپنے غیر ملکی سرکاری دورے پر آج یونان جائیں گے، وہ اپنے ہم منصب سمیت اعلیٰ عہدیداروں سے بھی ملاقات کریں گے۔

    تفصیلات کے مطابق جرمن صدر اپنی اہلیہ بیوڈن بینڈر کے ہمراہ یونان کا دو روزہ دورہ کریں گے، یونان میں ان کے استقبال کے لیے تیاریاں کی جارہی ہیں۔

    غیر ملکی خبر رساں ادارے کے مطابق جرمن صدر یونانی صدر پاؤلو پولس کی دعوت پر یونان پہنچے گے، اس دوران وہ یورپی نوجوانوں سے متعلق ایک تقریب میں بھی شرکت کریں گے۔

    اس دورے کے دوران یونان ميں نوجوانوں کے ليے ملازمت کے مواقع اور مالياتی بحران سے يونان کے اخراج پر تبادلہ خيال ہوگا۔

    فرانک والٹر اپنے يونانی ہم منصب کے علاوہ ميزبان ملک کے وزير اعظم، وزير خارجہ اور مرکزی اپوزيشن رہنما سے بھی ملاقاتيں کریں گے۔

    ترک صدر نے اپنے دورہ جرمنی کو کامیاب قرار دے دیا

    اس سے قبل گذشتہ سال اکتوبر میں جرمن صدر نے اٹلی کا دورہ کیا تھا اس دوران انہوں نے یورپ میں مہاجرین کے مسائل پر گفتگو کی تھی۔

    یورپ کو درپیش متعدد بحرانوں کے تناظر میں جرمن صدر فرانک والٹر نے اپنی ایک تقریر میں عوام کی جذبات و احساسات کی اہمیت کو اجاگر کیا تھا۔

    انہوں نے کہا تھا کہ برطانیہ سے لے کر کاتالونیہ تک اور پولینڈ سے لے کر یونان تک، یہ واضح ہے کہ عوام کی جذبات کس حد تک معاملات کو متاثر کرسکتے ہیں۔

  • وزیراعظم عمران خان کل لاہور کا ایک روزہ دورہ کریں گے

    وزیراعظم عمران خان کل لاہور کا ایک روزہ دورہ کریں گے

    اسلام آباد: وزیراعظم عمران خان کل ایک روزہ دورے پر لاہور پہنچیں گے ، جہاں وزیراعظم صوبائی کابینہ اور پارٹی رہنماؤں کے اجلاس کی صدارت کریں گے۔

    تفصیلات کے مطابق وزیراعظم عمران خان کل لاہور کا ایک روزہ دورے کریں گے، جہاں وزیراعظم صوبائی کابینہ اورپارٹی رہنماؤں کے اجلاس کی صدارت کریں گے، جس میں 100 روزہ پلان اور تجاوزات کے خلاف آپریشن کا جائزہ لیا جائے گا۔

    وزیرعظم صوبے کی صورتحال پر گورنر اور وزیراعلیٰ سے بریفنگ بھی لیں گے جبکہ پارٹی رہنما ضمنی انتخابات سے متعلق بھی وزیراعظم کو آگاہ کریں گے۔

    خیال رہے وزیراعظم عمران خان کا عہدہ سنبھالنے کے بعد لاہور کا تیسرا دورہ ہے۔

    یاد رہے 23 ستمبر کو بھی وزیراعظم عمران خان نے لاہور کا ایک روزہ دورہ کیا تھا اور پنجاب کابینہ کے اجلاس کی صدارت کرتے ہوئے کہا تھا کہ نچلی سطح پر اختیارات منتقل کر کے عوام کو با اختیار بنایا جا رہا ہے، وزیرِ اعلیٰ آفس میں عوام کی سہولت کے لیے شکایتی سیل قائم کیا جائے تاکہ عوام اور عوامی نمائندوں کی شکایات کا ازالہ کیا جا سکے۔

    مزید پڑھیں : سرکاری ملازمین پر غلط کام کے لیے کوئی دباؤ نہیں ڈالا جائے گا، وزیرِ اعظم عمران خان

    دورے کے دوران وزیرِ اعظم عمران خان نے سرکاری ملازمین سے خطاب کرتے ہوئے کہاتھا کہ ان پر غلط کام کے لیے کوئی دباؤ نہیں ڈالا جائے گا، ہم پالیسی بنا سکتے ہیں لیکن گورننس کی بہتری سرکاری ملازمین پر ہے۔

    اس سے قبل یکم ستمبر کو وزیراعظم عمران خان نے اپنے پہلے دورہ لاہور میں وزیراعلیٰ ہاؤس لاہور میں پنجاب کابینہ کے اہم اجلاس سے خطاب کرتے ہوئے پنجاب میں لاگو بلدیاتی نظام کی تبدیلی اور اورنج میٹرو ٹرین منصوبے سمیت تمام میگا پراجیکٹس کے آڈٹ کرانے کی ہدایت کرنے کے علاوہ سو دن کے منصوبے پر تیزی سے عملدرآمد جاری رکھنے کی ہدایت کی تھی۔

    عمران خان کا کہنا تھا کہ پنجاب ملک کا سب سے بڑا صوبہ ہے، آپ کے کندھوں پہ بھاری ذمہ داری عائد ہوتی ہے، پنجاب کابینہ کی کارکردگی بھی قابل تقلید و مثال ہونی چاہئے، صوبے سے بدعنوانیوں کا خاتمہ سب سے بڑا چیلنج ہے۔

    لاہور میں وزیر اعظم عمران خان سے سابق کرکٹرز اور دوستوں نے ملاقات کی تھی ، ملاقات میں ٹیسٹ کرکٹر ذاکر خان اور جاوید زمان خان سمیت دیگر کرکٹرز شریک ہوئے تھے۔

  • وزیر اعظم عمران خان کل 2 روزہ دورے پر کوئٹہ جائیں گے

    وزیر اعظم عمران خان کل 2 روزہ دورے پر کوئٹہ جائیں گے

    اسلام آباد : وزیر اعظم عمران خان کل 2روزہ دورے پر کوئٹہ جائیں گے، جہا‌ں وزیر اعظم گورنر ہاؤس میں امن و امان سے متعلق اجلاس کی صدارت کریں گے اور گورنر اور وزیر اعلیٰ بلوچستان سے ملاقاتیں کریں گے۔

    تفصیلات کے مطابق وزیراعظم عمران خان کل دو روزہ دورے پر کوئٹہ پہنچیں گے، جہاں وزیر اعلیٰ اور گورنر بلوچستان وزیر اعظم کا استقبال کریں گے۔۔

    اپنے دورے کے دوران وزیر اعظم  صوبائی کابینہ کے اجلاس اور گورنر ہاؤس میں امن و امان سے متعلق اجلاس کی صدارت کریں گے اور گورنر اور وزیر اعلیٰ بلوچستان سے ملاقاتیں بھی کریں گے۔

    دورہ کوئٹہ میں وزیراعظم عمران خان قومی،صوبائی اور سینیٹ ارکان سے خطاب بھی کریں گے۔

    خیال رہے عمران خان کا وزارت عظمیٰ کا عہدہ سنبھالنے کے بعد پہلا دورہ بلوچستان ہوگا۔

    مزید پڑھیں : وزیراعظم کا دورہ پشاور، وزیراعلیٰ سے ملاقات

    یاد رہے گذشتہ ہفتے وزیراعظم پاکستان عمران خان ایک روزہ دورے پر پشاور گئے تھے ، جہاں گورنر خیبرپختونخواہ شاہ فرمان اور وزیراعلیٰ محمود خان نے ایئرپورٹ پر وزیراعظم کا استقبال کیا تھا۔

    وزیراعظم نے وزیراعلیٰ‌ محمود خان سے ملاقات کی تھی، اس ملاقات میں وزیراعظم کو صوبائی حکومت کے100روزہ پلان سے آگاہ کیا گیا تھا۔