گِدھ مردار اجسام کو کھانے والا پرندہ ہے جس کا پیٹ تو بھر جاتا ہے لیکن اس کی بھوک ختم نہیں ہوتی، اس کا معدہ انتہائی مضبوط اور مدافعتی نظام غیر معمولی ہوتا ہے جو ہڈیاں تک ہضم کرجاتا ہے۔
لاشوں کو کھانے والے گدھ خود کوئی شکار نہیں کرتے بلکہ دوسرے شکاری جانوروں کا بچا کھچا کھاتے ہیں۔ انہیں قدرت کا خاکروب بھی کہا جاتا ہے جو مرجانے والے جانوروں کے اجسام کھا کر اس جگہ کی صفائی کردیتے ہیں۔
اویئر انٹرنیشنل کی رپورٹ کے مطابق ان گِدھوں کی ایک قسم ایسی بھی ہے جسے ’بیئرڈڈ ولچر‘ یا داڑھی والے گدھ کہا جاتا ہے جو صرف مردار ہڈیاں کھاتے ہیں۔
اس حوالے سے سوشل میڈیا پر پوسٹ کی گئی ایک ویڈیو میں گدھ اور بھیڑیے کے تعلق کو دکھایا گیا ہے کہ کس طرح یہ دونوں جانور اپنے شکار کا صفایا کرتے ہیں۔
ویڈیو میں دکھایا گیا ویران برفانی علاقوں میں ایک گدھ بھیڑیے کا پیچھا کرتا ہے، بھیڑیا عموماً شکار کرنے کے بعد یا مردہ پڑے جسم کو کھاتا ہے۔ اس وقت تک گدھ انتظار کرتا ہے کہ بھیڑیا اچھی طرح اپنا پیٹ بھرلے۔
بھیڑیے کے وہاں سے ہٹ جانے کے بعد گدھ لاش پر اترتا ہے اور اس کی بقایا ہڈیوں کو ٹکڑوں میں تقسیم کردیتا ہے۔
اس کے بعد وہ اپنی پسند کی ہڈی کا ٹکڑا اٹھا کر فضا میں اڑ جاتا ہے اور اپنے ٹھکانے پر پہنچ کر اسے کھالیتا ہے۔
گدھ کے اندر دنیا کے تمام جانداروں میں سب سے زیادہ تیز ڈائجسٹو ایسڈ پایا جاتا ہے جو اسے سخت سے سخت غذا ہضم کرنے میں مدد دیتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا رپورٹ کے بارے میں اپنی رائے کا اظہار کمنٹس میں ضرور کریں‘مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر بھی کریں۔
