Tag: wales

  • چلتی گاڑی کے انجن میں بلی کا بچہ : آگے کیا ہوا؟  ویڈیو دیکھیں

    چلتی گاڑی کے انجن میں بلی کا بچہ : آگے کیا ہوا؟ ویڈیو دیکھیں

    لندن : مشہور کہاوت ہے کہ جسے اللہ رکھے اسے کون چکھے، اسی کے مصداق ایک بلی کا چھوٹا سا بچہ کئی گھنٹوں تک موت کے منہ میں ہونے باوجود خوش قسمتی سےکسی بھی نقصان سے محفوظ رہا۔

    اسی طرز کا ایک واقعہ برطانیہ میں پیش آیا جہاں منا سا بلی کا بچہ چلتی گاڑی کے انجن میں بیٹھا رہا اور معجزاتی طور پر اسے کسی قسم کی کوئی چوٹ یا خراش تک نہیں آئی۔

    ہوا کچھ یوں کہ بلی کا ایک بچہ ویلز سے لیڈز (انگلینڈ) تک 230 میل طویل اور چار گھنٹوں پر محیط سفر کے دوران کار کے انجن کمپارٹمنٹ میں موجود رہا تاہم خوش قسمتی سے اسے کوئی نقصان نہیں پہنچا۔

    جانوروں کے تحفظ کے لیے کام کرنے والی ایک برطانوی تنظیم کا کہنا ہے کہ کار کے ڈرائیور نے لیڈز پہچنے کے بعد بتایا کہ ابتدا ہی سے کار کے انجن کمپارٹمنٹ سے ایک عجیب سی آواز آرہی تھی اور وہ سمجھا کہ انجن میں کچھ مسئلہ ہے جس پر اس نے ہوڈ کھولا تو وہاں ایک بلی کا بچہ پھنسا ہوا تھا۔

    جس پر اس نے تنظیم کو فون کیا، جانوروں کو ریسکیو کرنے والی افسر ریبیکا گولڈنگ کے مطابق انہوں نے اسے بحفاظت باہر نکالا، یہ مکمل طور پر گریس سے لت پت تھا تاہم خوش قسمتی سے نہ تو اسے کوئی گزند پہنچی اور نہ کوئی زخم لگا۔

  • لندن میں گرج چمک کے ساتھ طوفانی بارشیں ، اربن فلڈ کا خطرہ

    لندن میں گرج چمک کے ساتھ طوفانی بارشیں ، اربن فلڈ کا خطرہ

    لندن: جنوبی برطانیہ میں گرج چمک کے ساتھ موسلا دھا ر بارشوں کا سلسلہ جاری ہے، آسمان پر خطرناک بجلیوں نے اپنے ڈیرے ڈال لیے ہیں، پیر کے روز بھی بارش کا سلسلہ جاری رہےگا، اربن فلڈ کی وارننگ جاری کردی گئی۔

    تفصیلات کے مطابق گزشتہ رات چار گھنٹے میں پندرہ ہزار سے زائد خطرناک بجلیوں کا کڑکنا ریکارڈ کیا گیا ہے جس سے جنوبی برطانیہ کا آسمان مسلسل چار گھنٹے تک روشن رہا۔

    طوفان کے سبب اسٹین سٹڈ ایئرپورٹ پر بھی پروازیں تاخیر کا شکار ہوئیں جس کا بنیادی سبب آسمانی بجلی گرنے سے طیاروں کے ری فیولنگ سسٹم کو نقصان پہنچنا بتایا جارہا ہے۔ تاہم اب اس کو درست کرکے فلائٹ آپریشن شروع کیاجاچکا ہے۔

    برطانوی میٹ آفس نے ویلز اور انگلینڈ کے زیادہ علاقوں میں موسلا دھار بارشوں کے سبب پیدا ہونے والی سیلابی صورتحال کے پیش ِ نظر یلو وارننگ جاری کردی ہے ، جس میں شہریوں کو محتاط رہنے کا مشورہ دیا گیا ہے اور کہا گیا ہے کہ بلاسبب گھروں سے باہر نکلنے سے گریز کریں۔

    برطانوی محکمہ موسمیات کی جانب سے یہ بھی کہا گیا ہے کہ یہ سلسلہ پیر تک جاری رہے گا اور ویلز ، وسطی اور جنوبی انگلینڈ اس کا سب سے زیادہ نشانہ بنیں گے

    ایسیکز کے علاقے اسٹین وے میں ایک گھر پر بھی بجلی گرنے کی اطلاعات موصول ہوئی ہیں جس کے بعد فائرفائٹرز نے موقع پر پہنچ کر آگ پر قابو پایا ، کسی جانی نقصان کی اطلاع نہیں ملی ہے۔ بجلی کی سپلائی معطل ہونے اور ٹرین اور بسوں کے تاخیر سے چلنے کا امکان بھی ہے۔

    بی بی سے کے موسم کے براڈ کاسٹر ٹامز نے اسے تمام طوفانوں کی ماں قرار دیا ہے، ان کا کہنا ہے کہ انہوں نے اپنی پوری زندگی میں لندن میں کبھی ایسا طوفان نہیں دیکھا۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں