نئی دہلی: بھارتی ریاست تلنگانہ میں گھر میں سوئے افراد پر قیامت ٹوٹ پڑی۔
بھارتی میڈیا رپورٹ کے مطابق تلنگانہ کے ضلع گولمبا گڈوال میں ایک دردناک حادثہ پیش آیا ہے، جہاں دیوار گرنے سے تین بچوں سمیت پانچ افراد ہلاک ہوگئے۔
مقامی افراد کے مطابق ضلع بھر میں رات گئے شدید بارشوں کا سلسلہ جاری تھا کہ اسی دوران خستہ حال گھر کی چھت سوئے ہوئے مکینوں پر آن گری، جس کے باعث تین بچوں سمیت پانچ افراد ملبے تلے دب کر ابدی نیند سوگئے۔
رپورٹ کے مطابق جس وقت یہ دلخراش واقعہ رونما ہوا اس وقت گھر میں سات افراد موجود تھے، جن میں سے دو افراد کو زخمی حالت میں ملبے سے نکال کر طبی امداد کے لئے اسپتال منتقل کیا گیا۔
واضح رہے کہ بھارتی ریاست تلنگانہ کچھ دنوں سے بارشوں کے شدید سسٹم کے زیر اثر ہے، جس کے باعث یہاں موسلادھار بارشوں کو سلسلہ وقفے وقفے سے جاری ہے۔
چار روز قبل شدید بارش کے سبب تلنگانہ کے جنگاوں میں قدیم قلعہ کی دیوار گرپڑی تھی یہ تاریخی قلعہ 17ویں صدی میں تعمیر کردہ سردار سروائی پاپنا قلعہ کے نام سے مشہور ہے۔
