ARYNews.tv | Urdu – Har Lamha Bakhabar

Tag: wasay jalil

  • واسع جلیل کا متحدہ چھوڑنے کا اعلان

    واسع جلیل کا متحدہ چھوڑنے کا اعلان

    کراچی: ایم کیو ایم لندن کی رابطہ کمیٹی کے ممبر اور ترجمان واسع جلیل نے بنیادی رکنیت سے استعفیٰ دیتے ہوئے پارٹی چھوڑنے کا اعلان کردیا۔

    سماجی رابطے کی ویب سائٹ پر متحدہ لندن کی رابطہ کمیٹی کے ممبر نے اعلان کیا کہ ’میں ایم کیو ایم کی بنیادی رکنیت سے مستعفیٰ ہورہا ہوں اور آج کے بعد سے میرا کسی سیاسی یا مذہبی جماعت سے کوئی تعلق نہیں ہے‘۔

    اُن کا کہنا تھا کہ ’بانی ایم کیو ایم نے جو ذمہ داریاں اور عوامی عہدے دیے اُس پر اُن کا شکریہ ادا کرتا ہوں اور تنظیمی ذمہ داریوں کی انجام دہی کے دوران جو غلطیاں یا کوتاہیں ہوئیں اُن پر قیادت اور کارکنان سے معافی کا طلب گار بھی ہوں‘۔

    واسع جلیل نے یہ بھی اعلان کیا کہ میں نے سیاست کو خیرباد کہہ دیا اور مستقبل میں بھی کسی سیاسی و مذہبی جماعت میں شامل نہیں ہوں گا بلکہ ایک عام پاکستانی کی طرح غیر سیاسی زندگی گزاروں گا۔

    واضح رہے کہ 22 اگست کی اشتعال انگیز تقریر کے بعد واسع جلیل نے رکن رابطہ کمیٹی اور پارٹی ترجمان کی حیثیت سے لندن سیکریٹریٹ میں تنظیمی امور سرانجام دیے اور  وہ ایم کیو ایم پاکستان پر تنقید بھی کرتے نظر آئے تھے۔

    بانی ایم کیو ایم نے گذشتہ برس لندن میں موجود رابطہ کمیٹی کے کچھ اراکین کو عہدوں سےفارغ کیا جن میں واسع جلیل بھی شامل تھے، پارٹی نے ایم کیو ایم کے سابق ترجمان سے عہدہ واپس لیا تو وہ امریکا چلے گئے اور متحدہ کے معاملات سے بالکل کنارہ کشی اختیار کرلی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • متحدہ لندن قیادت نے نئی رابطہ کمیٹی کا اعلان کردیا

    متحدہ لندن قیادت نے نئی رابطہ کمیٹی کا اعلان کردیا

    لندن: کنوینر ایم کیو ایم ندیم نصرت کی زیر صدارت رابطہ کمیٹی کا اجلاس منعقد کیا گیا جس میں متحدہ قومی موومنٹ نے 12 رکنی عبوری رابطہ کمیٹی کے لیے مختلف ناموں کا اعلان کردیا، بانی تحریک نے کنوینر اور قیادت کے فیصلوں کی توثیق کردی۔

    لندن سے جاری اعلامیے میں کہا گیا ہے کہ کنوینر ایم کیو ایم ندیم نصرت کی زیر صدارت اہم اجلاس منعقد کیا گیا جس میں متحدہ قومی موومنٹ کی پاکستان رابطہ کمیٹی کے حوالے سے مشاورت کے بعد 12 رکنی عبوری کمیٹی تشکیل دینے کا اعلان کیا گیا۔

    لندن کی جانب سے اعلان کردہ کمیٹی میں ڈاکٹر حسن ظفر عارف، ساتھی اسحاق ایڈووکیٹ، مومن خان مومن، امجد اللہ خان، کنور خالد یونس، اشرف نور، اکرم راجپوت، اسماعیل ستارہ اور ادریس علوی شامل ہیں تاہم لندن رابطہ کمیٹی میں واسع جلیل، ڈاکٹر ندیم احسان اور مصطفیٰ عزیز آبادی کو اورسیز کے معاملات دیکھنے کی ذمہ داری دی گئی ہے۔

    پڑھیں:  لندن ایم کیو ایم نے عامرخان،خواجہ اظہار،فیصل سبزواری،کشورزہرا کی بنیادی رکنیت ختم کردی

     اعلامیے میں کہا گیا ہے کہ عبوری رابطہ کمیٹی میں وقت کے ساتھ مزید اراکین کا اضافہ کیا جائے گا اور پارٹی کی سینٹرل ایگزیکٹو کمیٹی، لیبرڈویژن، شعبہ خواتین سمیت دیگر تمام شعبہ جات کے لیے نئے ذمہ داران کے ناموں کا اعلان اگلے مرحلے میں کیا جائے گا۔

    لندن قیادت نے فیصلہ کیا ہے کہ کراچی کی سطح پر قائم 26 سیکٹروں اور حیدرآباد میں نئے تنظیمی سیٹ اپ کا اعلان جلد کیا جائے گا تاہم سندھ کے دیگر زونز کا تنظیمی ڈھانچہ برقرار رکھنے کا فیصلہ کیا گیا۔ بانی ایم کیو ایم نے لندن قیادت اور کنوینر کی جانب سے کیے گئے تمام فیصلوں کی توثیق کردی ہے۔

    mqm-london

    یاد رہے کہ 22 اگست کو متنازع تقریر کے اگلے روز ڈاکٹر فاروق ستار سمیت ایم کیو ایم کے اراکین پارلیمنٹ نے بانی تحریک اور لندن قیادت سے لاتعلقی کا اعلان کیا تھا، بعد ازاں ایم کیو ایم کے پارٹی پرچم سے بانی تحریک کی تصویر اور پارٹی آئین میں ترمیم کی گئی جس کے تحت الطاف حسین سے ویٹو پاور چھین لی گئی تھی۔

    مزید پڑھیں: لندن ایم کیو ایم نےفاروق ستارکی بنیادی رکنیت منسوخ کردی

    علاوہ ازیں ایم کیو ایم نے اسمبلیوں میں بانی تحریک کے خلاف پیش ہونے والی قراردادوں کی حمایت کا اعلان کیا تھا اور اپنے ہی قائد کے خلاف آرٹیکل 6 کے تحت مقدمہ چلانے کی تجویز بھی دی گئی تھی نیز یہ کہ رابطہ کمیٹی کے کنونیر سمیت تمام افراد کو پارٹی سے نکالنے کا بھی اعلان کیا تھا۔

    اسے سے متعلق: اگر متحدہ بانی کو واپس لایا گیا تو میں کام نہیں کروں گا، فاروق ستار

     بعد ازاں بانی ایم کیو ایم نے لندن سے اپنے کارکنوں کے نام آڈیو پیغام جاری کیا جس میں کارکنوں کو پی آئی بی مرکز جانے سے روکنے کی ہدایت کی گئی تھی تاہم اگلے ویڈیو پیغام میں قائد ایم کیو ایم نے ارکین اسمبلی سے مستعفیٰ ہوکر الیکشن لڑنے کا مطالبہ کیا اور سربراہ ایم کیو ایم ڈاکٹر فاروق ستار سمیت چار اہم رہنماؤں کی بنیادی رکنیت ختم کرنے کا اعلان کیا گیا تھا۔

    یہ بھی پڑھیں:  لندن کے بیان سے کوئی تعلق نہیں، ایم کیو ایم پاکستان

     گزشتہ روز اے آر وائی نیوز کے پروگرام آف دی ریکارڈ میں گفتگو کرتے ہوئے لندن میں مقیم ایم کیو ایم کے اہم رہنما واسع جلیل نے انکشاف کیا تھا کہ ’’ہمارے پاس متعدد افراد کے استعفے موجود ہیں تاہم ہم اپنے لوگوں کو مشکلات سے بچانے کے لیے اعلان نہیں کررہے‘‘۔

    واسع جلیل نے مزید کہا تھاکہ ’’لندن کی جانب سے بہت جلد نئی رابطہ کمیٹی کے ناموں سمیت تمام شعبہ جات اور یونٹ و سکیٹر میں تنظیمی ٖڈھانچے کا اعلان کیا جائے گا‘‘۔

  • متعدد اراکین اسمبلی کے استعفے موجود ہیں،جلد منظر عام پر لائیں گے، واسع جلیل

    متعدد اراکین اسمبلی کے استعفے موجود ہیں،جلد منظر عام پر لائیں گے، واسع جلیل

    لندن: متحدہ قومی موومنٹ لندن کی رابطہ کمیٹی کے رکن واسع جلیل نے کہا کہ وہ لوگ جو ایم کیو ایم قائد کے خلاف منفی پروپیگنڈا کرتے رہے ہیں، منی لانڈرنگ کیس ختم ہونے سے انہیں شرمندگی کا سامنا ہے، ایم کیو ایم پاکستان کے متعدد اراکین اسمبلی کے استعفے آگئے جو وقت آنے پر منظر عام پر لائے جائیں گے۔

    اے آر وائی نیوز کے پروگرام آف دی ریکارڈ میں میزبان کاشف عباسی سے لندن سے ویڈیو کانفرنس کے ذریعے بات کرتے ہوئے واسع جلیل نے کہا کہ منی لانڈرنگ کا کیس بے بنیاد تھا اس لیے ختم ہوگیا،یہ کیس برطانیہ کے آئین اور قانون کے مطابق چلا اور الطاف حسین سمیت دیگر رہنما بری ہوگئے۔

    انہوں نے کہا کہ الطاف حسین نے نامعلوم لوگوں کو متعارف کرایا، لوگوں کو رکن اسمبلی تک بنادیا، ہمارے خلاف ریاستی آپریشن جاری ہے جس سے وقتی پریشانی ضرور ہے تاہم ہمارے اوپر لگے الزامات ٓہستہ آہستہ ختم ہورہے ہیں۔

    واسع جلیل نے بتایا کہ الطاف بھائی نے آج ایک ویڈیو لیکچر جاری کیا ہے جلد مزید ویڈیو بھی جاری ہوں گی، ایم کیو ایم ایک آئیڈیالوجی ہے، ایم کیو ایم ایک نظریہ ہے جسے آسانی سے ختم کرنے کی سوچ رکھنے والے احمقوں کی جنت میں رہتے ہیں۔

    انہوں نے کہا کہ فاروق ستار کچھ نہیں ہے، لوگ الطاف حسین کے چاہنے والے ہیں اور ان کے ووٹرز ہیں، وسیم اختر بھی الطاف حسین کے مینڈیٹ کے باعث منتخب ہوئے،سارا مینڈیٹ آج بھی الطاف بھائی کا ہے۔

    میزبان کاشف عباسی کے ایک سوال پر انہوں نے بتایاکہ قائد تحریک کے مطالبے پر ایم کیو ایم کے متعدد رہنمائوں نے استعفیٰ دے دیے ہیں جو کہ ہمارے پاس ہیں،ان میں اراکین قومی اسمبلی اور اراکین سندھ اسمبلی دونوں شامل ہیں تاہم میں ان کا نام لے کر انہیں پریشان کرنا نہیں چاہتا وہ ہمارے ساتھی ہیں۔

    ایک سوال پر انہوں نے کہا کہ صولت مرزا اگر پارٹی کی مصیبتوں پر جیل میں رقص کرتے ہیں تو یہ ان کا ذاتی معاملہ ہے، وہ دنیا سے چلا گیا ان کے نام پر گڑے مردے کیوں اکھاڑے جائیں۔

    رہنما ایم کیو ایم نے کہا کہ ایم کیو ایم کو دیوار سے لگانے اور مائنس ون کا فارمولا ختم کردیا جائے، نئی رابطہ کمیٹی، تحلیل شدہ تنظیمی ڈھانچے اور مستعفی ہونے والے افراد کی نئی ذمہ داریوں کا جلد اعلان کریں گے۔

    انہوں نے کہا کہ جعلی فیس بک اور ٹوئٹر اکائونٹ چل رہے ہیں، بیرسٹر سیف ہوں یا میاں عتیق، یہ سب جلد آپ کو پتا چل جائے گا۔

    واسع جلیل نے کہا کہ مجھے یا دیگر رہنمائوں کو پاکستان آنے سے کوئی نہیں روک سکتا، دھمکیاں دینے کی سیاست ختم کی جائے، کوئی پریشان نہ ہو، جلد متحدہ کی قیادت پھر سے منظر عام پر آئے گی، واضح کردوں کہ ایم کیو ایم کا مطلب بانی ایم کیو ایم ہے۔

    میڈیا ہاؤسز پر حملے اور پاکستان مخالف تقریر کے سوال پر انہوں نے کہا کہ یہ کام صرف الطاف بھائی نے نہیں عمران خان سمیت دیگر رہنمائوں نے بھی کیا، صرف الطاف بھائی ہی کیوں؟؟ ایک شخص کو گزشتہ کئی دہائیوں سے مسلسل ذہنی ٹارچر کا نشانہ بنایا جارہا ہے تو ایسی باتیں تو سنیں کو ملیں گی۔

    سوال پوچھا گیا کہ الطاف حسین تو مزے سے لندن میں زندگی گزار رہے ہیں تو ان پر کیا ذہنی دبائو ہے تو واسع جلیل نے کہا کہ ایک کمرے اور ایک گھر میں مقید ہوکر، گھریلو زندگی تباہ کرکے اور صرف ایک پارٹی لائف اختیار کرکے کوئی زندگی گزار کے دکھا دے تو اپنا نام بدل دوں گا، یہ کہنا غلط ہے کہ وہ آرام دہ زندگی گزار رہے ہیں۔

  • بانی ایم کیو ایم کے آڈیو کو جعلی کہنے والے جلد نادم ہوں گے، واسع جلیل

    بانی ایم کیو ایم کے آڈیو کو جعلی کہنے والے جلد نادم ہوں گے، واسع جلیل

    کراچی: لندن میں مقیم ایم کیو ایم کے رہنماء واسع جلیل نے کہا ہے کہ بانی ایم کیو ایم کے بیان کو  جعلی کہنے والوں پر ہنسی آرہی ہے۔

    ان خیالات کا اظہار انہوں نے سماجی رابطے کی ویب سائٹ پر ٹوئٹ کے ذریعے کیا، واسع جلیل نے مزید کہاکہ ’’اس طرح کی سازشیں مارچ میں بھی کی گئیں تھیں مگر وقت نے انہیں جھوٹا ثابت کردیا، آڈیو پیغام کو جعلی کہنے والوں کو ویڈیو میسج آنے کے بعد ندامت کا سامنا کرنا پڑے گا‘‘۔

    گزشتہ روز لندن قیادت نے بانی ایم کیو ایم کی آواز میں بانی ایم کیو ایم کا پیغام سوشل میڈیا کے توسط کارکنان تک پہنچانے کی کوشش کی تھی، جس میں بانی تحریک نے اپنے کارکنان اور اراکین اسمبلی کو پیغام دیا کہ ’’مینڈیٹ میری وجہ سے حاصل کیا گیا تھا تاہم اب آپ کا اسمبلیوں میں رہنے کا اخلاقی جواز ختم ہوچکا ہے‘‘۔آڈیو پیغام میں بانی ایم کیو ایم نے کارکنان کو پرامن اور صبر سے رہنے کی تلقین کرتے ہوئے لندن میں مقیم ندیم نصرت کے تمام فیصلوں پر اعتماد کا اظہار بھی کیا تھا‘‘۔

    میسج منظر عام پر آنے کے بعد ایم کیو ایم کی منحرف خاتون رکن پارلیمنٹ ارم فاروقی نے اے آر وائی نیوز سے خصوصی گفتگو کرتے ہوئے کہا کہ ’’جن لوگوں نے قائد ایم کیو ایم کی آواز سُنی وہ اچھی طرح سے واقف ہیں کہ یہ آوازاُن کی نہیں ہے۔ ارم فاروقی نے سماجی رابطے کی ویب سائٹ پر آڈیو پیغام کو جعلی قرار دیتے ہوئے لندن رابطہ کمیٹی کے ممبر مصطفیٰ عزیزآبادی کو کہا کہ ’’نہ ہنساؤ کیونکہ آلندن میں گاڑی کا ہارن بجانا جرم ہے اور آڈیو میں واضح طور پر ہارن کی آواز سنائی دے رہی ہے‘‘۔

    دوسری جانب ایم کیو ایم کے رکن قومی اسمبلی سلمان مجاہد بلوچ نے آڈیو پیغام کے حوالے سے سماجی رابطے کی ویب سائٹ پر کہا کہ ’’قائد کا ویڈیو پیغام کہاں ہے‘‘۔

    آڈیو پیغام نشر ہونے کے بعد کئی قیاس آرائیوں نے جنم لیا اور ایم کیوایم سے وابسطہ افراد میں سے کچھ نے اپنے خیال کا اظہار کرتے ہوئے اسے جعلی یا ایڈیٹ آڈیو قرار دیا ہے۔

  • ڈاکٹر فاروق ستار کی گاڑی کو حادثہ، سیاسی رہنماؤں کی نیک خواہشات

    ڈاکٹر فاروق ستار کی گاڑی کو حادثہ، سیاسی رہنماؤں کی نیک خواہشات

    کراچی: سربراہ ایم کیو ایم ڈاکٹر فاروق ستار کی گاڑی کو حادثے کے بعد سیاسی رہنماؤں کی جانب سے نیک خواہشات کا اظہار کیا گیا۔

    تفصیلات کے مطابق حیدرآباد سے کراچی واپس آتے ہوئے نوری آباد پر ٹریفک حادثہ پیش آیا جس میں سربراہ ایم کیو ایم پاکستان ڈاکٹر فاروق ستار  کی گاڑی مکمل طور پر تباہ ہوگئی اور اُس میں موجود حفاظت پر مامور پولیس اہکاروں، ڈرائیور اور پرسنل سیکریٹری میں موجود تھے، حادثے کے نتیجے میں ڈاکٹر فاروق ستار کو چوٹیں آئیں تاہم اُن کے گارڈز اور سیکریٹری سبطین کی حالات تشیویش ناک ہے، تمام زخمیوں کو عباسی شہید اسپتال منتقل کردیا گیا جبکہ ڈاکٹر فاروق ستار کو ناظم آباد میں واقع اے او کلینک منتقل کیا گیا ہے۔

    پڑھیں: نوری آباد پرڈاکٹرفاروق ستار کی گاڑی کو خوفناک حادثہ، شدید چوٹیں آئیں

    اس ضمن میں پاک سرزمین پارٹی کے سربراہ مصطفیٰ کمال نے ڈاکٹر فاروق ستار کی گاڑی کے حادثے پر شدید تشیویش کا اظہار کرتے ہوئے اُن کی جلد صحت یابی کے لیے دعا کی جبکہ تحریک انصاف کے رہنماء عمران اسماعیل نے اپوزیشن لیڈر سندھ خواجہ اظہار الحسن سے رابطہ کر کے تمام زخمیوں کی جلد صحت یابی کے لیے دعا کی۔

    ایم کیو ایم کی رابطہ کمیٹی کے رکن واسع جلیل نے قائد ایم کیو ایم اور کنونیئر ندیم نصرت کی جانب سے ڈاکٹر فاروق ستار کی گاڑی کے حادثے پرافسوس کا اظہار کرتے ہوئے اُن کی جلد صحت یابی کے لیے بھی دعا کی۔

    علاوہ ازیں معروف مذہبی اسکالر ڈاکٹر عامر لیاقت حسین نے بھی ڈاکٹر فاروق ستار کی جلد صحت یابی کے لیے دعا کی اور اُن کی سیاسی زندگی میں جلد واپسی کی خواہش کا اظہار کیا۔

    ایم کیو ایم کی منحرف رکن اسمبلی ارم عظیم فاروقی نے بھی فاروق ستار کی گاڑی کے حادثے پر اُن کے لیے دعائے صحت اور نیک خواہشات کا اظہار کیا ہے۔

    دوسری جانب مسلم لیگ ن کے سینیٹر سلیم ضیاء اے او کلینک پہنچے اور ایم کیو ایم کے پارلیمنٹیرین سے ملاقات کر کے فاروق ستار کی جلد صحت یابی کے لیے دعا کرتے ہوئے پارٹی قیادت کی جانب سے نیک خواہشات کا اظہار کیا۔

    سابق صدر آصف علی زرداری کی صاحبزادی آصفہ بھٹو زرداری ڈاکٹر فاروق ستار اور اُن کے ساتھ زخمی ہونے والوں کے لیے نیک خواہشات کا اظہار کیا ہے اور اُن کی جلد صحت یابی کے لیے بھی دعا کی۔

  • عوام کوایم کیوایم سے بدظن کرنے کی سازش کی جارہی ہے،واسع جلیل

    عوام کوایم کیوایم سے بدظن کرنے کی سازش کی جارہی ہے،واسع جلیل

    کراچی : رابطہ کمیٹی کے رکن واسع جلیل نے کہا ہے ایم کیو ایم کو بدنام اورعوام سے بدظن کرنے کی سازش کی جارہی ہے۔

    ان خیالات کا اظہار  انہوں نے ایم کیوایم (یوکے) یوتھ ونگ کی افطار پارٹی سے خطاب کرتے ہوئے کہی، واسع جلیل کا کہنا تھا کہ تمام تر سازشوں کے باوجود عوام کے دلوں سے الطاف حسین اور ایم کیوایم کی محبت کو ختم نہیں کیا جاسکتا۔

    ان کا کہنا تھا کراچی آپریشن کا رخ ایم کیوایم کی طرف موڑکر سیاسی سرگرمیوں کی راہ میں رکاوٹیں کھڑی کی جارہی ہیں اور کارکنوں کو گرفتار کرکے جھوٹے مقدمات قائم کئے جارہے ہیں۔

    قائد تحریک الطاف حسین کے خطابات کی لائیوٹی وی کوریج پر بھی غیر اعلانیہ پابندی ہے جو کہ نام نہاد جمہوری حکومت کے منہ پر طمانچہ ہے۔

    اس موقع پر خطاب کرتے ہوئے رکن رابطہ کمیٹی اور انچارج ایم کیو ایم (یو کے) ڈاکٹر سلیم دانش نے یوتھ ونگ کو اے پی ایم ایس او کے یوم تاسیس پر کامیاب پروگرام کے انعقاد پر مبارکباد پیش کی۔

  • ایم کیوایم میں جرائم پیشہ افراد کیلئے قطعاً کوئی گنجائش نہیں،واسع جلیل

    ایم کیوایم میں جرائم پیشہ افراد کیلئے قطعاً کوئی گنجائش نہیں،واسع جلیل

    کراچی : متحدہ قومی موومنٹ کے مرکزی رہنماء واسع جلیل نے کہا ہے کہ ہمیں نہیں پتہ کہ اندھیرے میں رینجرز اہلکار کس کو لے گئے اورکس کو چھوڑ کر چلے گئے۔

    انہوں نے کہا کہ وقاص رینجرز کی ہوائی فائرنگ کے دوران گولی لگنے سے جاں بحق ہوئے۔ان خیالات کا اظہار انہوں نے  وقاص شاہ کے گھر پر ان کے اہل خانہ سے  تعزیت کے بعد میڈیا سے گفتگو کرتے ہوئے کیا۔

    واسع جلیل کاکہنا تھا کہ وقاص شاہ  خواتین کی بے عزتی کو روکنا چاہتے تھے، اس دوران رینجرز کی ہوائی فائرنگ سے ایک گولی وقاص شاہ کے سر میں جالگی ، جس کے باعث وہ جاں بحق ہوئے۔

    انہوں نے کہا کہ ایم کیو ایم میں جرائم پیشہ افراد کیلئے قطعاً کوئی گنجائش نہیں ہے ،واسع جلیل کاکہنا تھا کہ اسلحہ لائسنس یافتہ تھا جسے وزارت داخلہ نے جاری کیا تھا۔

    ایک سوال کے جواب میں انہوں نے کہا کہ ہمارے دفاتر کو توڑ پھوڑ کرکے کمیونیکیشن کو نقصان پہنچایا گیا ہے،ایم کیو ایم ذمہ دار سیاسی جماعت ہے۔