وزیراعظم شہباز شریف نے کہا ہے کہ ہمارا فرض ہے آئندہ نسلوں کیلئے پانی کی ضرورت کو محفوظ بنائیں، 24 کروڑ عوام کیلیے پانی کی کمی کو پورا کرنا ہے ہمیں پانی کی اسٹوریج کیپسٹی کو بڑھانا ہوگا۔
تفصیلات کے مطابق وزیراعظم شہباز شریف نے آبی ذخائر سے متعلق اہم اجلاس سے خطاب میں کہا کہ بدترین شکست کے بعد بھی بھارت کی دھمکیوں میں کمی نہیں آئی ہے۔
وزیراعظم نے کہا کہ ہندوستان نے سندھ طاس معاہدے کو بطور ہتھیار استعمال کیا لیکن 24 کروڑ عوام کیلیے پانی کی کمی کو پورا کرنا ہے، بطور قوم آئندہ نسلوں کیلیے ہندوستانی دھمکی کیخلاف اقدامات کرنا ہمارا فرض ہے۔
شہباز شریف کا کہنا ہے کہ واحد حل ہےکہ ہمیں پانی اسٹوریج کیپسٹی کو بڑھانا ہوگا، چاروں صوبوں میں واٹر اسٹوریج پر کوئی تنازع نہیں ہے، 1960 کے معاہدے کے تحت دریائے سندھ، جہلم، چناب ہمارے پاس ہیں۔
وزیراعظم کا کہنا تھا کہ جیسے بھارت کو جنگ میں شکست دی ایسے پانی کے گھمنڈ کو بھی خاک میں ملائیں گے، یواین سیکرٹری جنرل نے کنونشن بلایا تھا ہم انٹرنیشنل واٹر ٹریٹی پر کام کرسکتے ہیں۔
وزیراعظم شہبازشریف کہتے ہیں آج ہمارا فرض ہے آئندہ نسلوں کیلیے پانی کی ضرورت کو محفوظ بنائیں، پیٹ کاٹ کر پانی کے ذخائر نہیں بنائیں گے تو آنے والی نسلیں ہمیں معاف نہیں کریں گی۔
