ARYNews.tv | Urdu – Har Lamha Bakhabar

Tag: weather

پاکستان کا موسم
پاکستان ایک ایسا ملک ہے جہاں موسم کی مختلف اقسام پائی جاتی ہیں۔ ملک کے مختلف علاقوں میں کافی فرق ہوتا ہے۔ ملک کے شمالی علاقے سردیوں میں برف سے ڈھکے رہتے ہیں جبکہ جنوبی علاقے گرم اور مرطوب ہوتے ہیں۔ پاکستان میں چار اہم موسم پائے جاتے ہیں: بہار، گرما، خزاں اور سردی۔

 

  • کراچی سمیت سندھ بھر میں آج طوفانی بارش کا امکان

    کراچی سمیت سندھ بھر میں آج طوفانی بارش کا امکان

    کراچی : محکمہ موسمیات نے خطرے کی گھنٹی بجا دی، کراچی سمیت سندھ بھر میں آج سے طوفانی بارش کا امکان ہے جبکہ اربن فلڈ کا خطرہ ظاہر کیا جارہا ہے۔

    کراچی میں مون سون بارشوں کا آغاز آج سے دوبارہ شروع ہونے جا رہا ہے جو دودن تک جاری رہنے کا امکان ہے، محکمہ موسمیات کے مطابق بارش کا سسٹم بھارت سے جنوب مشرقی سندھ میں داخل ہوگا، سسٹم مٹھی ، تھرپارکر اور ننگر پارکر میں بارش برساتا ہوا آج کراچی میں داخل ہوگا، کراچی میں پچاس ملی میٹر تک بارش کا امکان ہے ، کراچی میں بارش کے بعد سسٹم بلوچستان کی سمت چلا جائے گا ۔

    محکمہ موسمیات کا کہنا ہے کہ آج رات کراچی میں تیز ہواوں کے ساتھ بارش کا امکان ہے ،اس سے قبل محکمہ موسمیات نے بارہ جولائی کو تیز بارش کا امکان ظاہر کیا تھا۔

    محکمہ موسمیات نے سندھ کے ساحلی علاقوں میں وارننگ جاری کردی لیکن سندھ حکومت کے انتظامات مکمل نہ ہوسکے، مسلسل بارش کی صورت میں کراچی میں سیلاب کا خدشہ پیدا ہوگیا ہے۔

    temp

    محکمہ موسمیات نے شدید بارش کا الرٹ جاری کردیا ہے لیکن کراچی میں نالوں کی صفائی اب تک نہیں کی گئی اور شدید بارش کی صورت میں شہر کا کیا بنے گا۔

    محکمہ صحت کی جانب سے پہلے ہی ممکنہ بارشوں کے پیش نظر تمام سرکاری اسپتالوں کے ایم ایس اور ڈسڑکٹ ہیلتھ افسران کو ہدایت جاری کردی گئی تھیں کہ وہ اسپتالوں میں پیرا میڈیکل اسٹاف کی فراہمی کو یقینی بنائیں اور رین ایمرجنسی کنٹرول روم بھی قائم ہیں، محکمہ صحت کی جانب سے رین ایمرجنسی کے فوکل پرسن ڈاکٹر سید ظفر مہدی کے مطابق ممکنہ بارشوں کے حوالے سے تمام اسپتالوں میں انتظامات مکمل کرلیے گئے ہیں۔

    آئندہ چوبیس گھنٹوں کے دوران لاہور ، اسلام آباد ، کے پی ، سکھر ، میرپور خاص ، ژوب اور کشمیر سمیت مختلف بالائی علاقوں میں بھی تیز بارش ہوگی ۔ مون سون بارشوں کا نیا سلسلہ جمعرات تک جاری رہے گا ۔

    موسلادھاربارشوں کے باعث ندی نالوں میں طغیانی کا بھی خدشہ ہے، جس کے لیےتمام متعلقہ اداروں کو الرٹ رہنے کی ہداہت کی گئی ہے۔

  • کراچی میں موسم گرما کی پہلی بارش، شہری خوشی سے جھوم اٹھے

    کراچی میں موسم گرما کی پہلی بارش، شہری خوشی سے جھوم اٹھے

    کراچی: مختلف علاقوں میں موسم گرما کی پہلی بارش سے جل تھل ایک ہوگیا، شہری خوشی سے جھوم اٹھے، چھتوں،گلیوں اور سڑکوں پر لوگ بارش کے پانی سے لطف اندوز ہونے لگے۔

    تفصیلات کے مطابق طویل انتظار کے بعد بالآخر بارش ہو ہی گئی، موسم گرما کی یہ افطار کے وقت کے آس پاس ہونے والی پہلی بارش زور دار قسم کی تھی جس سے کراچی کے شہری خوشی سے جھوم اٹھے اور سڑکوں ،گلیوں میں نوجوان نہاتے ہوئے اور بچے ایک دوسرے پر پانی اچھالتے ہوئے نظر آئے جب کہ خواتین بھی گھروں کی چھتوں پر نہانے پہنچ گئیں۔

    5

    شہر قائد کے علاقے سائٹ ایریا، گلستان جوہر، ملیر، ناظم آباد ، سُپر ہائی وے کے علاقوں میں تیز بارش کا سلسلہ جاری ہے، جبکہ بارش کی ابتداء ہوتے ہی کے الیکٹرک کے 220 فیڈر ٹرپ ہونے کے باعث مختلف علاقوں میں بجلی منقطع ہوگئی ہے۔

    3

    گلشن اقبال، حسن اسکوائر، نیو کراچی، لانڈھی، کورنگی، ملیر، سوسائٹی، ڈیفنس، لیاقت آباد، گلشن اقبال سمیت دیگر علاقوں میں بھی بارش کا سلسلہ شروع ہوگیا ہے، بارش شروع ہوتے ہی عوام کے چہرے خوشی سے کھل اٹھے اور بڑی تعداد میں عوام سڑکوں پر آگئے۔


    Rain in different parts of Karachi, weather… by arynews

    واضح رہے محکمہ موسمیات کی جانب سے پیش گوئی کی گئی تھی گزشتہ ہفتے سے ملک بھر میں پری مون سون بارشوں کا سلسلہ شروع ہوجائے گا، جس کے بعد ملک کے مختلف علاقوں میں بارش ریکارڈ کی گئی تھی، کراچی میں بارش نہ ہونے کے سبب گرمی کا زور بڑھ گیا تھا اور شہریوں کی جانب سے باران رحمت کے لئے مسلسل دعائیں کی جارہی تھیں۔

    قبل ازیں اندرون سندھ کے مختلف علاقوں میں موسلادھار بارش کا سلسلہ بھی وقفے وقفے سے جاری ہے۔

    2

  • اندرون سندھ اور کراچی میں بارش کی پیش گوئی

    اندرون سندھ اور کراچی میں بارش کی پیش گوئی

    کراچی: ماہر موسمیات نے اگلے چوبیس گھنٹوں میں اندرون سندھ اور دو روز کے دوران کراچی میں بارش کی پیش گوئی کردی۔

    ماہر موسمیات ڈاکٹر حنیف کا کہنا ہے کہ مون سون کی ہوائیں سندھ میں داخل ہورہی ہیں، حیدرآباد اورمیرپور خاص میں آئندہ چوبیس گھنٹے میں اور کل شام یا رات بدین اور ٹھٹھہ میں بارش ہونے کے قوی امکانات ہیں۔

    ماہرموسمیات کے مطابق اگلے دو روز کے دوران کراچی میں بارش کا امکان ہے.

    دریں اثنا محکمہ موسمیات کی رپورٹ میں امکان ظاہر کیا گیا ہے کہ کراچی میں  پیر اور منگل کو مون سون بارش متوقع ہے، آئندہ 24 گھنٹوں ملک کے بیشتر علاقوں میں موسم گرم اور خشک رہے گا، تاہم میرپور خاص، حیدرآباد، قلات ،مکران ، بہاولپور ، ڈیرغازی خان اور سکھر ڈویژن  کے مختلف مقامات پر گرج چمک کے ساتھ بارش متوقع ہے۔

    یہ بھی پڑھیں‌:آئندہ ہفتے مون سون بارشوں کا سلسلہ شروع ہوگا، محکمہ موسمیات

  • ملک بھر میں بارشیں معمول سے زیادہ ہونگی،محکمہ موسمیات

    ملک بھر میں بارشیں معمول سے زیادہ ہونگی،محکمہ موسمیات

    کراچی: رواں سال ملک کے بیشتر حصوں میں معمول سے زیادہ بارشیں ہونے کا امکان ہے، سندھ اور بلوچستان میں گرمی کی شد ت مزید کم ہوگی۔

    محکمہ موسمیات کے مطابق ملک کے زیادہ تر حصوں میں معمول سے زیادہ بارشیں ہونے کے امکانات زیادہ ہیں، رواں سال سندھ میں بھی برسات زیادہ ہوگی۔

    ڈائریکٹر محکمہ موسمیات نے کہا ہےکہ سندھ اور بلوچستان کے میدانی علاقوں میں گرمی کی شدت میں مزید کمی کا امکان ہے ،جون کے تیسرے ہفتے میں پری مون سون بارشیں ہوں گی۔

    راولپنڈی میں نالہ لئی کی  صفائی نہ ہوسکی، نشیبی علاقے  زیر آب آنے کا خدشہ

    دوسری جانب ملک کے مختلف شہروں میں نالوں کی صفائی نہ ہونے کے سبب آبادیوں میں پانی داخل ہونے اور مالی نقصانات ہونے کے امکانات بڑھ گئے ہیں۔

    راولپنڈی میں نالہ لئی کی صفائی نہ ہونے کے باعث مون سون میں نشیبی علاقے زیر آب آنے کا خدشہ بڑ ھ گیا۔ مون سون سے قبل نالہ لئی کے سروے میں اس بات کا انکشاف کیا گیا ہے۔

    مون سون سے قبل ریسکیو ڈبل ون ڈبل ٹو، سول ڈیفنس اور دیگر متعلقہ اداروں کی جانب سے ہنگامی صورتحال سے نمٹنے کی مشقیں بھی کی گئیں اور فلڈ کنٹرول الارمنگ سسٹم کو چیک کیا گیا تاہم نالہ لئی کی رواں برس صفائی نہ ہونے کے باعث نالہ لئی میں طغیانی اور نشیبی علاقے زیر آب آنے کا خدشہ بڑھ گیا ہے ۔

  • ملک بھر میں شدید گرمی، تربت میں 50، نواب شاہ میں 49 ڈگری ریکارڈ

    ملک بھر میں شدید گرمی، تربت میں 50، نواب شاہ میں 49 ڈگری ریکارڈ

    آج ملک کے مختلف شہروں میں درجہ حرارت انتہائی زیادہ رہا، عوام گرمی سے بلبلا اٹھے، تربت میں 50 اور نواب شاہ میں 49 ڈگری سینٹی گریڈ ریکارڈ کیا گیا۔

    تفصیلات کے مطابق آج مختلف شہروں میں درجہ حرارت معمول سے کہیں زیادہ بلند ہوگیا، گرمی سے عوام بلبلا اٹھے، روزے داروں کو شدید پریشانی کا سامنا کرنا پڑا۔سب سے زیادہ درجہ حرارت تربت میں پچاس ڈگری سینٹی گریڈ اور نواب شاہ میں 49 ڈگری سینٹی گریڈ ریکارڈ کیا گیا۔

    محکمہ موسمیات کے مطابق تربت اور نواب شاہ آج گرم ترین شہر رہے ملک کے دیگر شہروں موہنجو دڑو، جیکب آباد، اوکاڑہ، بھکر، بہاول نگر، دادو، سبی، نوکنڈی، روہڑی اور رحیم یار خان میں درجہ حرارت 45 ڈگری سینٹی گریڈ ریکارڈ کیا گیا۔

    محکمہ موسمیات نے پیش گوئی کی ہے کہ آئندہ 24 گھنٹوں میں ملک بھر کا درجہ حرارت گرم رہے گا۔

  • ملک بھر میں آئندہ 4 دن قیامت خیز گرمی پڑنے کا امکان

    ملک بھر میں آئندہ 4 دن قیامت خیز گرمی پڑنے کا امکان

    اسلام آباد: محکمہ موسمیات نے ملک کے بیشتر میدانی علاقوں میں اگلے 4 روز یعنی پیر سے جمعرات کے دوران شدید گرمی کی پیش گوئی کی ہے۔ بعض جگہوں پر درجہ حرارت 48 سے 50 ڈگری سینٹی گریڈ رہنے کا امکان ہے۔

    محکمہ موسمیات نے خبردار کیا ہے کہ میدانی علاقوں کے شہری اپنا خاص خیال رکھیں کیونکہ 4 دن تک قیامت خیز گرمی پڑنے کا امکان ہے۔ محکمہ موسمیات نے ملک کے بیشتر میدانی علاقوں میں آج سے جمعرات تک موسم شدید گرم اور خشک رہنے کی پیش گوئی کی ہے۔ اس دوران درجہ حرارت 48 سے 50 ڈگری سینٹی گریڈ رہنے کا امکان ہے تاہم اس دوران ہزارہ، راولپنڈی، گوجرانوالہ ڈویژن اور کشمیر میں بعض مقامات پر گرد آلود ہواؤں اور گرج چمک کے ساتھ بارش کا امکان ہے۔

    ہیٹ ویو سے بچاؤ کے طریقے *

    ملک کے وسطی اور جنوبی میدانی علاقے سب سے پہلے شدید گرمی کے زیر اثر آئیں گے۔ ان علاقوں میں ساہیوال، ڈی جی خان، ملتان، بہاولپور، ڈی آئی خان، بنوں، سکھر، لاڑکانہ، شہید بینظیر آباد، حیدرآباد، سبی، نصیر آباد ڈویژن شامل ہیں۔ پیر سے جمعرات کے دوران راولپنڈی، گوجرانوالہ، لاہور، فیصل آباد، سرگودھا، کوہاٹ، پشاور ڈویژن میں موسم گرم اور مرطوب رہنے کی توقع ہے۔

    آئندہ 24 گھنٹوں کے دوران ملک کے بیشتر علاقوں میں موسم شدید گرم اور مرطوب رہے گا۔ پنجاب کے میدانی علاقوں، وسطی اور جنوبی خیبر پختونخوا، بالائی سندھ، سبی اور مکران ڈویژن شدید گرمی کی لپیٹ میں رہیں گے تاہم شام / رات میں کشمیر، ہزارہ، راولپنڈی، گوجرانوالہ ڈویژن اور اسلام آباد میں چند مقامات پر تیز / گرد آلود ہوائیں چلنے اور گرج چمک کے ساتھ بارش کا امکان ہے۔

    کراچی ہیٹ ویو: اسے ہوّا مت بنائیں *

    گزشتہ روز ریکارڈ کیے گئے گرم ترین مقامات کے درجہ حرارت: نور پور تھل، بھکر، رحیم یار خان، سکھر، لاڑکانہ 48، دادو، جیکب آباد، بہاولنگر، سبی، شہید بینظیر آباد 47، لاہور، اوکاڑہ، بہاولپور، جوہر آباد، ساہیوال، سرگودھا، جہلم، پڈعیدن، روہڑی، موہنجودڑو، حیدرآباد 46 ڈگری سینٹی گریڈ۔

  • ملک کے مختلف شہروں میں موسم خشک رہے گا

    ملک کے مختلف شہروں میں موسم خشک رہے گا

    گوجرانوالہ/ راولپنڈی/ کوئٹہ / کشمیر / گلگت / بلتستان : محکمہ موسمیات کے مطابق آئندہ چوبیس گھنٹوں کے دوران ملک کے بیشتر علاقوں میں موسم خشک رہے گا جبکہ بالائی علاقوں میں مطلع جزوی طور پر ابرآلود رہنے کا امکان ہے۔

    بالائی علاقوں میں برف باری کے باعث کاروبار زندگی شدید متاثر ہے جبکہ بارش سے بھی کئی شہر جل تھل ہوگئے، موسم کا احوال بتانے والوں کا کہنا ہے کہ بالائی علاقےمالاکنڈ ڈویژن ،گلگت بلتستان اورکشمیر میں موسم سرد اور مطلع جزوی طور پر ابرآلود رہنے کا امکان ہے ۔

    سردی کی شدت میں اضافہ کے باعث زلزلہ زدگان کی مشکلات میں بھی اضافہ ہوگیا ۔کئی متاثرین آسمان تلے رہنے پر مجبور ہیں۔

    گزشتہ چوبیس گھنٹوں کے دوران ، گوجرانوالہ، راولپنڈی، کوئٹہ ، کشمیر اور گلگت بلتستان سمیت گرد نواح میں چند مقامات پر ہلکی بارش ہوئی جبکہ ملک کے دیگر علاقوں میں موسم خشک رہا۔

    کم سے کم درجہ حرارت پارہ چناراور استور میں منفی چار سینٹی گریڈ ریکارڈ کیا گیا۔

  • آئندہ24گھنٹوں میں ملک کے بیشتر علاقوں میں موسم خشک رہے گا

    آئندہ24گھنٹوں میں ملک کے بیشتر علاقوں میں موسم خشک رہے گا

    اسلام آباد : رواں ہفتے کے دوران ملک میں گندم کی کاشت کے بیشتر میدانی علاقوں میں موسم خشک رہے گا۔

    محکمہ موسمیات کے مطابق آئندہ 24گھنٹوں کے دوران ملک کے بیشتر علاقوں میں موسم خشک رہے گا۔تاہم مالاکنڈ، ہزارہ ڈویژن ،گلگت بلتستان،کشمیر اور اس سے ملحقہ پہاڑی علاقوں میں چند مقامات پرمزید بارش اور پہاڑوں پر ہلکی برفباری کا امکان ہے۔

    زلزلہ سے متاثرہ علاقوں میں آئندہ 36سے48گھنٹوں کے دوران موسم سرد رہےگا اور بعض مقامات پر بارش اور پہاڑوں پر ہلکی برفباری کا امکان ہے۔

    گزشتہ24 گھنٹوں کے دوران: بالائی خیبر پختونخواہ، بالائی فاٹا ،کشمیر،گلگت بلتستان میں کہیں کہیں جبکہ بالائی پنجاب اور کوئٹہ ڈویژن میں چند مقامات پر بارش ہوئی.ملک کے دیگر علاقوں میں موسم خشک رہا۔

    سب سے زیادہ بارش پٹن میں 54 ملی میٹر جبکہ دیر48، مالم جبہ43، چترال 27، مظفرآباد26، سیدوشریف25،کالام،دروش 24، لوئردیر، پارہ چنار21،میرکھانی 20، گوپس19،مری 18،ایپٹ آباد، استور17،سکردو 15، گڑھی دوپٹہ14،گلگت 10، چلاس 08،کوئٹہ، ہنزہ06، راولاکوٹ، رسالپور04، چراٹ، پشاور03، بونجی، اسلام آباد(زیروپوائنٹ،گولڑہ،سیدپور02)، کوٹلی، بنوں، راولپنڈی(چکلالہ،شمس آباد) اورمنگلا میں 01 ملی میٹر ریکارڈ کی گئی۔ آج ملک میں ریکارڈ کیے گئے کم سے کم درجہ حرارت:پاراچنارمنفی 04،کالام منفی 01، جبکہ مالم جبہ اور گوپس میں 00 ڈگری سینٹی گریڈ کیا گیا۔

  • ملک کے بیشتر علاقوں میں موسم خشک رہے گا، محکمہ موسمیات

    ملک کے بیشتر علاقوں میں موسم خشک رہے گا، محکمہ موسمیات

    کراچی / پشاور /لاہور/ اسلام آباد : آئندہ 24گھنٹوں کے دوران ملک کےاکثر علاقوں میں موسم خشک رہے گا۔ تاہم آج رات کوئٹہ اور قلات ڈویژن میں چند مقامات پر گرج چمک کےساتھ بارش کا امکان ہے۔

    محکمہ موسمیات کے مطابق اتوار اورسوموار کے روز ملک کے بالائی علاقوں( خیبرپختونخواہ، اسلام آباد، بالائی پنجاب، فاٹا، گلگت بلتستان اور کشمیر) میں کہیں کہیں جبکہ جنوبی پنجاب میں چند مقامات پر تیز ہواوٗں اور گرج چمک کےساتھ مزید بارش کی پیشنگوئی کی گئی ہے۔

    سوموار کے روز مالاکنڈ ڈویژن، گلگت بلتستان اور کشمیر میں پہاڑوں پر ہلکی برفباری کا امکان ہے، گزشتہ24 گھنٹوں کے دوران ملک کے بیشتر علاقوں میں موسم خشک رہا۔

    تاہم مالاکنڈ ڈویژن اور گلگت بلتستان میں چند ایک مقامات پر بارش ہوئی۔ سب سے زیادہ بارش کالام میں 17 ملی لیٹر جبکہ دروش 08، میرکھنی 06، دیر 03، ہنزہ 02، چترال میں 01 ملی میٹر بارش ریکارڈ کی گئی۔

    گزشتہ روز سب سےزیادہ گرمی مٹھی میں پڑی جہاں درجہ حرارت 40 ڈگری سینٹی گریڈ جبکہ شہیدبینظیرآباد ، چھور، لسبیلا، پڈعیدن اور حیدرآباد میں 39 ڈگری سینٹی گریڈ ریکارڈ کیا گیا.

  • ملک کے بیشترعلاقوں میں موسم خشک رہے گا

    ملک کے بیشترعلاقوں میں موسم خشک رہے گا

    کراچی /لاہور : آئندہ دو سے تین روز کے دوران ملک کے بیشتر علاقوں میں موسم خشک رہے گا۔ محکمہ موسمیات کے مطابق آئندہ 24گھنٹوں کے دوران ملک کے بیشتر علاقوں میں موسم خشک اور گرم رہے گا۔

    تاہم آج رات مالاکنڈ ڈویژن میں ایک دو مقامات پر بارش کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم خشک اور گرم رہا۔

    گزشتہ روز ریکارڈ کیے گئے گرم ترین مقامات میں سب سےزیادہ درجہ حرارت بھکر، نوپورتھل،کوٹ ادو، سبی اور تربت میں 42 ڈگری سینٹی گریڈ جبکہ نوکنڈی،روہڑی، سکھر اور شہید بینظیرآباد میں 41 ڈگری سینٹی گریڈ ریکارڈ کیا گیا۔

    علاوہ ازیں کشمیر اور گلگت بلتستان میں ایک دو مقامات پر ہلکی بارش ہوسکتی ہے ، لاہور میں بھی موسم گرم اور خشک رہے گا۔

    محکمہ موسمیات کی جانب سے راولپنڈی اسلام آباد سمیت ملک کے بیشتر علاقوں میں آئندہ تین روز تک موسم گرم اور خشک رہنے کی پیشگوئی کی گئی ہے۔

    لاہور میں بھی آج دھوپ کا راج ہے، کراچی میں مطلع جزوی ابر آلود رہنے کا امکان ہے۔ بالائی ، جنوب مشرقی اور زیریں سندھ میں موسم گرم رہے گا ۔ کوئٹہ سمیت بلوچستان کےتمام علاقوں میں پارہ گرنے لگا ہے۔