اپنی شادی کے دن سب سے زیادہ خوبصورت اور منفرد نظر آنا ہر دلہن کی خواہش ہوتی ہے جس کیلئے وہ بہت سارے جتن بھی کرتی ہے۔
عام طور تو ہمارے معاشرے میں شادی کی تقریبات کی تعداد کی کوئی حد مقرر نہیں لیکن روایتی طور پر ایک شادی کم از کم تین تقریبات پر مشتمل ہوتی ہیں جن میں مایوں، بارات اور ولیمہ شامل ہے۔
ان تقریبات کیلئے لباس کا انتخاب کرنا بھی کوئی آسان کام نہیں، خواتین خصوصاً لڑکیاں اس حوالے سے بہت زیادہ حساس ہوتی ہیں۔
اے آر وائی ڈیجیٹل کے پروگرام گڈ مارننگ پاکستان میں فیشن ڈیزائنر عدنان پردیسی نے دلہن کے عروسی لباس سے متعلق اہم مشورے دیئے۔
انہوں نے بتایا کہ ایسی دلہنیں جن کا قد چھوٹا ہے ان کو چاہیے کہ اپنی قمیض کی لمبائی زیادہ رکھیں، ضروری نہیں کہ جو وہ پہننا چاہ رہی ہے اس پر اچھا بھی لگے بہت سی لڑکیاں ہمارے پاس اپنے آئیڈیاز لے کر آتی ہیں جو ان کی شخصیت کے مطابق نہیں ہوتے تو ہم انہیں سمجھاتے اور صحیح مشورہ دیتے ہیں۔
عدنان پردیسی نے کہا کہ لال رنگ کی پہچان بھی سب کو نہیں ہوتی کچھ لوگ میرون کے شیڈز کو بھی لال کہہ دیتے ہیں اور لال ایسا رنگ ہے جو تقریباً سبھی پر جچتا ہے۔ تاہم، آج کل میں گرین اور پرپل کلر پر زیادہ کام کررہا ہوں۔
