(26 جولائی 2025): بھارت میں زیادہ تر شوہر کے قتل کی وجہ بیوی کے غیر ازدواجی تعلقات یا دیگر ذاتی تنازعات ہوتے ہیں، میگھالیہ میں ایک ہنی مون کے دوران بیوی پر الزام لگا کہ اس نے کرائے کے قاتلوں کی مدد سے اپنے شوہر کو قتل کیا تھا۔
تاہم اب ایک اور واقعہ پیش آیا ہے جہاں بیوی نے اپنے عاشق کے ساتھ مل کر شوہر کو زہریلی دہی کھلا کر موت کی نیند سلا دیا، یہ واقعہ اترپردیش کے ٹنڈلا پولیس اسٹیشن کے علاقے الاؤ گاؤں میں پیش آیا ہے۔
اترپردیش کے ایس پی سٹی روی شنکر کے مطابق گاؤں کے رہائشی سنیل کمار 14 مئی کو پراسرار حالات میں اپنے گھر میں پائے گئے تھے، پولیس نے جب اس کیس کی تفتیش کی تو حیرت انگیز حقائق سامنے آئے۔
تفتیش کے دوران یہ انکشاف ہوا کہ سنیل کی اہلیہ ششی کا گاؤں کے ایک نوجوان سے تعلق تھا، جب پولیس نے شیشی کو گرفتار کرکے پوچھ گچھ کی تو حقیقت سامنے آگئی۔
گھریلو ناچاقی پر بیوی کے ہاتھوں شوہر قتل
تفتیش کے دوران ششی نے اعتراف کیا کہ اس کے اپنے شوپر سنیل کو زہر دے کر قتل کیا ہے، ملزمہ نے پولیس کو بتایا کہ اس کے عاشق یادوندر نے آن لائن زہر کا آڈر میرےگھر بھیجا تھا۔
تفتیش کے دوران ششی نے پولیس کو بتایا کہ میں نے اپنے شوہر کو زہر ایک بار نہیں بلکہ دو بار دیا تھا اس سے قبل میں 13 مئی کو زہر دیا لیکن معمولی طبعیت خراب ہونے کے بعد وہ بچ گیا جس کے بعد 14 مئی کو میں نے ایک بار پھر دہی میں زہر دیا اور اس بار اس کی موت ہوگئی۔
ایس پی سٹی روی شنکر پرساد نے بتایا کہ ششی اور یادوندرا دونوں کو گرفتار کیا گیا ہے، پولیس نے زہر والی پیالی بھی برآمد کی ہے جس میں زہر ڈال کر دہی پیش کی گئی تھی۔
