Tag: Wife murder case

قاہرہ : بیوی کو قتل کرنے والے شوہر کو اس کے نو سالہ بیٹے نے ڈرامائی انداز میں پکڑوادیا، ناقابل تردید ثبوت دیکھ کر شوہر نے اعتراف جرم کرلیا، پولیس نے ملزم کو گرفتار کرلیا۔

تفصیلات کے مطابق مصری ڈیلٹا کے الدقھلیہ صوبے میں اندھے قتل کی واردات ہوئی ہے جس نے پولیس کو چکرا کر رکھ دیا، مصر میں شوہر نے انتہائی چالاکی اور صفائی سے اپنی بیوی کو قتل کرکے واردات کو چھپانے کی کوشش کی، جسے سن کر کسی ٹی وی سیریل کا گمان ہوتا ہے جس میں وہ کسی حد تک کامیاب بھی ہوگیا۔

مصر کے سیکیورٹی اہلکار تمام تر تجربے کے باوجود حیران تھے کہ اس گتھی کو کس طرح سلجھائیں، الدقھلیہ کی پولیس کو طلخا تحصیل کے قصبے کے ایک مکان سے ایک عبیر نامی خاتون کی لاش ملی تھی، جس کی رپورٹ خاتون کے بھائی نے درج کرائی تھی۔

ابتدائی تفتیش میں معلوم ہوا کہ موت طبعی ہے لیکن پوسٹ مارٹم کے بعد انکشاف ہوا کہ خاتون کو قتل کیا گیا ہے کیونکہ مقتولہ کے چہرے اور گردن پر نیلے نشانات تھے اس کے علاوہ نکسیر پھوٹنے کے نشانات بھی واضح نظر آرہے تھے ۔

پولیس کو جائے وقوعہ سے کسی قسم کا کوئی ثبوت بھی نہیں مل رہا تھا گھر کے تمام دروازے اور کھڑکیاں درست حالت میں تھیں، جس سے اس بات کو تقویت مل رہی تھی کہ قاتل باہر سے نہیں آیا گھر کے اندر ہی موجود تھا۔

بعد ازاں پولیس نے قتل کے واقعہ کی گتھی سلجھانے کے لیے ایک ٹیم تشکیل دی جس نے تفتیش کرکے مقتولہ کے شوہر کو قتل کے واقعہ کا ذمہ دار قرار دیا۔

ملزم شوہر کے وہم و گمان میں بھی نہیں تھا کہ قتل کا سارا منظر اس کے نوسالہ بیٹے نے اپنے موبائل کیمرے میں ریکارڈ کیا ہوا تھا۔ بیٹے نے تفتیشی ٹیم کے سامنے یہ کہہ کر سب کو حیران کردیا کہ میرا باپ ہی میری ماں کا قاتل ہے اور اپنے موبائل سے وڈیو کلپ نکال کر پولیس کے سامنے رکھ دی، ناقابل تردید ثبوت دیکھ کر ملزم نے اعتراف جرم کرلیا۔