متحدہ اپوزیشن کے ایم کیو ایم سے ہونیوالے معاہدے کے تحت ایڈمنسٹریٹر کراچی مرتضیٰ وہاب چند دنوں میں اپنا عہدہ چھوڑ دینگے۔
ایم کیو ایم کے حکومت چھوڑ کر متحدہ اپوزیشن میں شامل ہونے اور عدم اعتماد کے حق میں ووٹ دینے کے فیصلے کے بعد اپوزیشن اور ایم کیو ایم کے درمیان معاہدے پر عملدرآمد پر پیش رفت کا آغاز ہوگیا ہے۔
ذرائع نے بتایا ہے کہ طے شدہ معاہدے کے تحت ایڈمنسٹریٹر کراچی مرتضیٰ وہاب آئندہ چند روز میں عہدہ چھوڑ دینگے اور مستعفی ہوجائیں گے۔
ذرائع نے بتایا کہ مرتضیٰ وہاب کے عہدہ چھوڑنے کے بعد نئے ایڈمنسٹریٹر کی تعیناتی ایم کیو ایم سے طے شدہ معاہدے کے تحت ہوگی جب کہ حیدرآباد کا ایڈمنسٹریٹر بھی ایم کیو ایم کی مشاورت سے لگایا جائیگا۔
واضح رہے کہ اس سے قبل پاکستان پیپلز پارٹی ایم کیو ایم کو سندھ کابینہ اور پبلک سروس کمیشن میں نمائندگی دینے پر بھی رضامند ہوچکی ہے۔
پیپلزپارٹی نے بلدیاتی نظام میں ترمیم اور میئر کے اختیارات میں اضافے سمیت صوبےکےشہری معاملات میں مشاورت سے اتفاق رائے پیدا کرنے سے متعلق بھی توثیق کردی۔
