کوئٹہ: بلوچستان میں آخر کار وندر ڈیم کی تعمیر کا سنگِ بنیاد رکھ دیا گیا، اس منصوبے پر تختی 15 سال قبل لگائی گئی تھی۔
تفصیلات کے مطابق وزیر اعلیٰ بلوچستان جام کمال نے وندر ڈیم منصوبے کا باقاعدہ سنگ بنیاد رکھ دیا، منعقدہ تقریب میں وزیر اعلیٰ کو محکمہ آب پاشی کے حکام کی جانب سے وندر ڈیم پروجیکٹ سے متعلق تفصیلی بریفنگ بھی دی گئی۔
بریفنگ میں بتایا گیا کہ یہ منصوبہ 15230.76 ملین روپے کی لاگت سے تعمیر کیا جا رہا ہے، وندر ڈیم پراجیکٹ 4 سال کی مدت میں مکمل کیا جائے گا، اور اس ڈیم کی تعمیر سے دس ہزار ایکڑ زرعی رقبے کی آب پاشی ہوگی۔
وزیر اعلیٰ بلوچستان نے وندر ڈیم کے سنگ بنیاد کی تقریب کے شرکا سے خطاب میں کہا وندر ڈیم کی تعمیر سے 10 ہزار ایکڑ رقبے کو پانی دستیاب ہوگا، اور علاقے کی سماجی و معاشی ترقی میں اضافہ ہوگا۔
انفرا اسٹرکچر اور ڈیموں کے بڑے منصوبے منظور
یاد رہے کہ گزشتہ ماہ وزیر اعلیٰ بلوچستان جام کمال خان نے سبزل روڈ توسیع منصوبے کے فیز ون کا باقاعدہ افتتاح کرتے ہوئے کہا تھا بلوچستان میں کئی کئی سال پہلے تختیاں لگیں، لیکن منصوبوں پر کوئی کام نہیں ہوا۔
ڈیم کی تعمیر کا تنازع، عدالت نے حکومت کے حق میں فیصلہ سنا دیا
انھوں نے کہا تھا ویسٹرن روٹ پر 7 سال اور وندر ڈیم پر 15 سال قبل تختیاں لگائی گئی تھیں، لیکن ہم کام پہلے اور تختیاں بعد میں لگائیں گے۔