ریاض: سعودی عرب کے معتبر ترین کنگ فیصل پرائز 2023 کا اعلان کردیا گیا، اس سال 2 خواتین سائنسدانوں کے لیے بھی میڈیسن اور سائنس کیٹیگریز میں کنگ فیصل پرائز کا اعلان کیا گیا۔
اردو نیوز کے مطابق سعودی عرب میں 2023 کا کنگ فیصل پرائز جیتنے والوں میں ایک اماراتی، مراکشی، جنوبی کوریائی، 2 برطانوی اور 3 امریکی شہری شامل ہیں۔
یہ ایوارڈ کرونا کی ویکسین تیار کرنے والوں، نینو ٹیکنالوجی کے سائنسدانوں، عربی زبان و ادب، اسلامی علوم اور اسلام کے لیے خدمات دینے پر ہر شعبے میں ممتاز شخصیات کو دیا جاتا ہے۔
کنگ فیصل پرائز جنرل سیکریٹریٹ نے فاتحین کا اعلان کرتے ہوئے کہا کہ 2023 کے کنگ فیصل پرائز کی سلیکشن کمیٹیوں نے سوموار سے بدھ تک ہونے والے باریک بینی سے غور و خوض کے بعد انعام کی 5 کیٹیگریز کے لیے فیصلے کیے ہیں جن میں اسلام کی خدمت، اسلامی مطالعہ، عربی زبان و ادب، طب اور سائنس شامل ہیں۔
کنگ فیصل پرائز فارسروس ٹو اسلام 2023 مشترکہ طور پر متحدہ عرب امارات کے شیخ ناصر بن عبد اللہ اور جنوبی کوریا کے پروفیسر چوئی ینگ کل حمد کو دیا گیا ہے۔
اسلامی فن تعمیر کے موضوع پر 2023 کا کنگ فیصل پرائز فار اسلامک اسٹڈیز برطانیہ کے پروفیسر رابرٹ ہلن برینڈ کو دیا گیا ہے۔
اس سال کا کنگ فیصل پرائز برائے عربی زبان و ادب، کلاسیکی عربی بیانیہ اور جدید نظریات کے موضوع پر مراکش کے پروفیسر عبدالفتاح کلیتو کو دیا گیا ہے۔
کنگ فیصل پرائز برائے میڈیسن برائے 2023 جو وبا اور ویکسین کی تیاری پر توجہ مرکوز کرتا ہے، مشترکہ طور پر امریکا سے پروفیسر ڈین ہنگ باروچ اور برطانیہ سے پروفیسر سارہ کیتھرین گلبرٹ کو دیا گیا ہے۔
کنگ فیصل پرائز برائے سائنس اس سال کیمسٹری میں مشترکہ طور پر امریکا سے پروفیسر جیکی یی رو ینگ اور پروفیسر چاڈ الیگزینڈر میرکن کو دیا گیا ہے۔
