ARYNews.tv | Urdu – Har Lamha Bakhabar

Tag: winters

  • سعودی عرب: کس شہر کا درجہ حرارت صفر تک جا پہنچا؟

    سعودی عرب میں موسم سرما کی شدت میں اضافہ دیکھا جارہا ہے، طریف میں درجہ حرارت صفر سینٹی گریڈ تک جا پہنچا۔

    اردو نیوز کے مطابق سعودی عرب میں موسمیات کے قومی مرکز کی پیشن گوئی کے مطابق پورے ملک میں درجہ حرارت کم ہوگیا، سب سے کم طریف میں رہا جہاں درجہ حرارت صفر ہوگیا۔

    جمعرات کو سب سے زیادہ درجہ حرارت 30 سینٹی گریڈ جازان میں ریکارڈ کیا گیا۔

    موسمیات کے قومی مرکز کی رپورٹ کے مطابق نجران میں 28، قنفذہ اور وادی الدواسر میں 26، جدہ، بیشہ اور ینبع میں 24، الوجہ میں 23، مکہ مکرمہ میں 22، دمام، الخرج اور الاحسا میں 20 سینٹی گریڈ رہا۔

    علاوہ ازیں القریات میں درجہ حرارت 2، عرعر اور سکاکا میں 4، حائل میں 5، تبوک میں 6، رفحا میں 7، حفر الباطن میں 8، بریدہ، الباحہ، المجمعہ میں 9، الدوادمی، بیشہ اور العلا میں 10 سینٹی گریڈ درجہ حرارت رہا۔

  • سردیوں میں بالوں کو ٹوٹنے سے بچانے کے طریقے

    سردیوں میں بالوں کو ٹوٹنے سے بچانے کے طریقے

    سرد موسم میں جلد اور بال اپنی قدرتی شادابی کھونے لگتے ہیں اور اضافی توجہ مانگتے ہیں، لہٰذا اس موسم میں جلد اور بالوں کا زیادہ خیال رکھنا چاہیئے۔

    اس موسم میں بالوں میں خشکی ہونے لگتی ہے اور اس وجہ سے بال جھڑنے بھی لگتے ہیں۔

    کچھ طریقے ہیں جنہیں اپنا کر بالوں کی حفاظت کی جاسکتی ہے اور ان کے ٹوٹنے میں کمی کی جاسکتی ہے۔

    کیفین کا استعمال کم سے کم کریں

    سردیوں میں پانی کا استعمال کم اور گرم رہنے کے لیے کیفین زیادہ استعمال ہونے لگتی ہے جس کی وجہ سے بالوں اور سر کی جلد میں خشکی بڑھ جاتی ہے۔

    کوشش کریں کہ چائے کافی کا استعمال بہت کم کیا جائے اور اس کے بجائے سادہ پانی اور موسمی سبزیاں اور پھلوں کا استعمال کیا جائے۔

    تیل لگائیں

    بالوں میں خشکی نہ پیدا ہونے دیں، اس کے لیے سرسوں یا ناریل کا تیل رات میں لگایا جائے اور صبح سر دھولیں اور اس کے بعد کنڈیشنر کا استعمال بھی لازمی کریں۔

    تیل اور پانی کا اسپرے

    کیسٹر آئل اور کوکونٹ آئل کو تھوڑا تھوڑا لے کر اسپرے بوتل میں ڈالیں اور پھر پانی بھر کر ہلائیں، نہانے کے بعد بالوں میں اسپرے کرلیں تو بال ٹوٹیں گے نہیں، مکمل خشک نہیں ہوں گے اور چمکدار بھی ہوجائیں گے۔

    زیتون کا تیل اور انڈا

    ہفتے میں کم سے کم ایک بار انڈا اور زیتون کا تیل ملا کر سر میں لگائیں اور ایک گھنٹے بعد سر دھوئیں، اس سے بالوں میں پروٹین کی کمی نہیں ہوگی۔

    گرم پانی کم استعمال کریں

    کوشش کریں کہ سر سادے پانی سے دھوئیں، اگر سردی بہت زیادہ ہو تو بھی سر دھوتے ہوئے تیز گرم پانی کے بجائے نیم گرم پانی استعمال کریں۔

  • ایلو ویرا: موسم سرما میں تمام مسائل کا حل

    ایلو ویرا: موسم سرما میں تمام مسائل کا حل

    موسم سرما میں جلد اور بالوں کی خشکی عام مسئلہ ہے جس کے لیے مختلف گھریلو ٹوٹکے اور بازاری پروڈکٹس استعمال کی جاتی ہیں۔

    ایلوا ویرا ایک ایسی شے ہے جو ہر موسم میں بہترین نتائج دیتی ہے، یہ خشکی کے لیے بھی نہایت مؤثر ہے۔

    بالوں اور جلد کی خشکی دور کرنے کے لیے ایلو ویرا کو مندرجہ ذیل طریقوں سے استعمال کیا جا سکتا ہے۔

    بالوں کی خشکی کے لیے

    ایلو ویرا کا گودا، کنڈیشنر، زیتون کا تیل اور کھوپرے کا تیل ملا کر گرینڈ کرلیں، اس آمیزے کو بالوں میں لگائیں اور ایک گھنٹے بعد سر دھو لیں۔ بال نہایت صاف ستھرے اور نرم ملائم ہوجائیں گے۔

    جلد کے لیے

    باقاعدگی سے ایلو ویرا چہرے پر لگانا جلد کو شفاف اور نرم کرتا ہے جبکہ جلد کو نمی بھی فراہم کرتا ہے۔ اگر ایلو ویرا کو چاول کے آٹے میں مکس کر کے لگایا جائے تو یہ جھائیوں، سیاہ حلقوں اور خشکی کا قدرتی علاج ہوگا۔

    ہاتھ پاؤں کی خشکی

    ہاتھ پاؤں کو نم رکھنے کے لیے ایلو ویرا کا پتہ شہد کے ساتھ پیس لیں اور اسے ہاتھ پاؤں کی خشک جلد پر لگائیں۔ پہلی ہی بار میں واضح فرق نظر آئے گا۔

  • موسم سرما: وہ عادات جو جلد کو خشکی سے بچائیں

    موسم سرما: وہ عادات جو جلد کو خشکی سے بچائیں

    موسم سرما میں جلد کی خشکی نہایت عام مسئلہ ہے جس کے لیے مختلف ٹوٹکے اور کریمز استعمال کیے جاتے ہیں، تاہم ان کے علاوہ بھی موسم سرما میں کچھ عادات اپنانے کی ضرورت ہے تاکہ جلد کی نمی بحال رہ سکے۔

    ماہرین کا کہنا ہے کہ سرد موسم میں جلد زیادہ توجہ اور وقت مانگتی ہے۔ ایسے موسم میں جلد کے لیے بہترین موائسچرائزر، پانی کا زیادہ استعمال اور متوازن غذا لینی چاہیئے۔

    اس کے علاوہ وہ عادات جو موسم سرما میں اپنائی جانی ضروری ہیں وہ کچھ یہ ہیں۔

    گرم شاور سے پرہیز

    موسم سرما میں غسل کے لیے گرم پانی کا استعمال کیا جاتا ہے لیکن یہ ہماری جلد کو خشک بنانے والی ایک بڑی وجہ ہے، خاص طور پر اگر کوئی شخص بہت زیادہ گرم پانی سے غسل کرے۔

    ماہرین کے مطابق نہاتے ہوئے نیم گرم پانی استعمال کریں، نہانے کا وقت مختصر رکھیں تاکہ زیادہ دیر تک گرم پانی جلد پر نہ پڑے، اور گرم پانی سے نہانے کے فوراً بعد گھر سے باہر نکلنے سے گریز کریں۔

    گرم پانی جلد کی نمی کو خشک کردیتا ہے اور اگر نہانے کے فوراً بعد باہر نکلا جائے گا تو گرد و غبار اور سرد ہوا جلد کو مزید نقصان پہنچا سکتی ہے۔

    پھلوں کا استعمال

    موسم سرما میں پھلوں کا استعمال بڑھا دیں تاکہ جسم میں نمی کی مقدار متوازن رہے، موسمی پھل نہ صرف جسم سے مضر اجزا کی مقدار خارج کرنے میں مدد دیتے ہیں بلکہ جلد کو شفاف اور چمکدار بھی بناتے ہیں۔

    ایلو ویرا کا استعمال

    ایلو ویرا ایسی چیز ہے جو ہر موسم میں انسانی جسم کے لیے بہترین ہے، یہ جلد اور بالوں کے لیے بہترین غذا ہے۔

    موسم سرما میں رات کو سوتے ہوئے شہد میں ایلو ویرا شامل کر کے ہاتھوں اور چہرے پر لگا لیں اور صبح دھو لیں۔ چند ہی دن میں جلد نہایت نرم و ملائم اور چمکدار ہوجائے گی۔

  • اسکول کی چھٹیوں کا دوبارہ اعلان کیا جائے، والدین کا مطالبہ

    اسکول کی چھٹیوں کا دوبارہ اعلان کیا جائے، والدین کا مطالبہ

    کراچی : ملک بھر میں شدید سردی کے باوجود پنجاب سندھ اور خیبرپختونخواہ میں بچے تھرتھراتے ہوئے اسکول جانے پر مجبور ہیں لیکن طالبعلموں کی مشکلات کا کسی نے نوٹس لیا جبکہ والدین نے محکمہ تعلیم سے مزید تعطیلات کا مطالبہ کردیا ہے۔

    تفصیلات کے مطابق ملک بھر میں شدید سردی کی لہر جاری ہے ، جس کے باعث بچوں کا اسکول جانا محال ہوگیا ہے، معصوم بچے اپنے والدین سمیت موسم سرما کی تعطیلات کے شیڈول میں ترمیم کرانے کے لئے سراپا احتجاج ہیں، تاہم انتظامیہ ان کے مطالبے پر کا ن نہیں دھر رہی ہے۔

    والدین کا کہنا ہے کہ شدت سردی میں صبح صبح بچوں کو اسکول کے لئے تیار کرنا ان کے ساتھ ظلم کرنا لگتا ہے۔ شدت سردی کی وجہ سے بچے بیمار ہورہے ہیں، سخت سردی میں بچوں کو صبح صبح جانے میں شدید مشکل ہوتی ہے۔

    والدین نے محکمہ تعلیم کی انتظامیہ سے مطالبہ کیا ہے کہ اسکول کی چھٹیوں کا دوبارہ اعلان کرنا چاہیئے۔

    انہوں نے مزید کہا کہ اگلے سال کی موسم سرما کی تعطیلات کے شیڈول پر رواں سال میں ہی ترمیم کر لینی چا ہیئے کیونکہ اب سردی دسمبر کے بجائے جنوری میں آتی ہے ۔

    والدین کا مزید کہنا تھا کہ سردی نے اپنے شیڈول میں تبدیلی کرلی ہے ، تاہم محکمہ تعلیم اپنے معمولات میں ردوبدل نہیں لا سکی۔

    والدین نے حکومت وقت سے سوال کرتے ہوئے کہا کہ ہمارے بچوں کو بیمار کرنے کا ذمے دار کون ہے ؟

    گذشتہ روز وزیراعلیٰ سندھ مراد علی شاہ نےمعاملے کا نوٹس لیتےہوئے جلدازجلد مسلے کے حل کیلئے احکامات جاری کئے تھے جبکہ اراکین سندھ اسمبلی نے بھی محکمہ تعلیم کو سردیوں اورگرمیوں کی تعطیلات میں تبدیلی کےحوالے سے والدین کے مطالبے کی حمایت کی تھی۔

    یہاں پڑھیں:کراچی :پرائیوٹ اسکول مینجمنٹ ایسوسی ایشن کا سردی کی چھٹیوں میں ترمیم کا مطالبہ

    یاد رہے کہ کراچی میں پرائیوٹ اسکول مینجمنٹ ایسو سی ایشن نے محکمہ تعلیم کے متعلقہ حکام کو خط ارسال کیا ہے ۔ جس میں چیئرمین پسما شرف الزماں کا کہنا ہے کہ محکمہ تعلیم روایتی انداز میں موسم سرما اور گرما کی تعطیلات پر ازسرنو غور کرے۔

    علاوہ ازاں مظفر آباد کے علاقے گوجرہ میں سرد موسم میں کیمپوں میں قائم اسکول میں طالبات یخ بستہ ہواوں کے ساتھ تعلیم حاصل کرنے پر مجبور ہیں۔ کمیپ اسکول انتظامیہ اور طالبات کے مطابق متعدد بارمطالبے کے باوجود حکومت نے یقین دھانی کے علاوہ اور کوئی ایکشن نہیں لیا۔

  • ملک بھر میں گیس کا بحران شدت اختیار کر گیا

    ملک بھر میں گیس کا بحران شدت اختیار کر گیا

    کراچی: ملک بھر میں‌ سردی کی شدت کے ساتھ ہی گیس کی فراہمی بھی متاثر ہوگئی، سردی کی لہر کے آتے ہی صوبہ پنجاب کے مکینوں کے چولہے ٹھنڈے ہوگئے۔

     تفصیلات کے مطابق موسم سرما کے شدت کے ساتھ ملک کے بیشترعلاقوں میں گیس کی فراہمی میں کٹوتی کردی گئی۔

    ذرائع کا کہنا ہے کہ گھریلو صارفین کو گیس کی فراہمی کے لیے پاور سیکٹر اور سی این جی پمپ کو گیس کی فراہم میں کمی کی گئی ہے۔

     صوبے پنجاب میں گیس کے بحران کے باعث گھریلو صارفین سب سے زیادہ متاثر ہو رہے، گھریلو صارفین کا کہنا ہے کہ کی سردی کی شدت میں گیس کا ناپید ہونا پریشان کن ہے جس کے باعث کھانا پکانے میں دقت کا سامنا ہے۔

    گیس کی لوڈ شیڈنگ کے متاثرین کا مزید کہنا تھا کہ امیر لوگوں کے لیے مسئلہ نہیں  ہے، مشکلات تو غریبوں کے لیے کھڑی ہوتی ہیں۔

    صارفین نے مطالبہ کیا کہ بڑ ے منصوبوں پر توجہ دینے والے حکمران عوام کی بنیادی ضروریات کو پور ا کرکے اپنی ذمہ داری کا احساس کریں۔

     دوسری جانب انڈسٹری ذرائع کا کہنا ہے کہ پاور سیکٹر کو گیس کی کمی سے بجلی پیداوار میں بھی چھ سو سے زائد میگاواٹ کمی ہوگئی، ملک کے دیگر علاقوں  کی طرح صوبہ خیبر پختون خواہ میں بھی گھریلو صارفین کو گیس کے پریشر میں کمی کا سامنا ہے۔

    یہ بھی پڑھیں: صنعتوں کیلئے گیس کی قیمتوں میں کمی کا فیصلہ واپس

    صارفین کا کہنا ہے کہ حکومت نہ تو گیس کی قمیتوں میں کمی کرتی ہے اور نہ ہی گیس کی بلا تعطل فراہمی یقینی بناتی ہے۔

  • کراچی: مختلف علاقوں میں ہلکی بوندا باندی، موسم خوشگوار

    کراچی: مختلف علاقوں میں ہلکی بوندا باندی، موسم خوشگوار

    کراچی: شہر قائد کے مختلف علاقوں میں ہلکی بونداباندی سے موسم خوشگوار جبکہ سردی کی شدت میں اضافہ ہوگیا۔

    میٹرولوجیکل ڈیپارٹمنٹ  کے مطابق مون سون کے بادل کراچی کی جانب رواں دواں ہیں، جس کی وجہ سے اگلے گھنٹوں میں گرج چمک کے ساتھ تیز بارشوں کی سلسلہ شروع ہوجائے گا۔

    میٹرولوجیکل ڈیپارٹمنٹ  کے مطابق بارش کا سلسلہ کراچی سمیت سندھ کے سکھر ، لاڑکانہ جبکہ اسلام آباد ، راولپنڈی،فاٹا، پشاور اور مالاکنڈ ڈیوژن کے دیگر شہروں میں بھی تیز بارشوں کا امکان ہے۔

    محکمہ موسمیات کے مطابق کراچی میں تیز بارشوں کی وجہ سے سردی کی شددت میں مزید اضافہ ہوجائے گا۔

  • کراچی: ہلکی بوندا باندی کے بعد موسم خوشگوار اور سرد ہوگیا

    کراچی: ہلکی بوندا باندی کے بعد موسم خوشگوار اور سرد ہوگیا

    کراچی: کراچی کے شہریوں کیلئے بھی آخر کار سردی میں اضافہ ہو ہی گیا۔ شہر کے مختلف علاقوں میں بوندا باندی کے بعد موسم خوشگوار اور سرد ہوگیا ہے۔

    تفصیلات کے مطابق کراچی میں موسم کچھ ایسا ہی ہو گیا ہے کہ ایک تو دسمبر کی سردیاں اور پھر آسمان سے برستی پھوار نے بنا دیا موسم کو کُچھ اور سرد، مگر مزید خوشگوار۔ ایسے میں کس کا دل چاہے گا گرم بستر سے نکلے کا۔

    دنیا کے کام نبھانے کیلئے شہری گھروں سے نکلے تو گیلی سڑکیں اور بارش کی بوندوں سے دھُلے درختوں نے اُن کا استقبال کیا۔ جس سے سب ہی کا دل باغ باغ ہوگیا۔ مگر محکمہ بجلی کی انتظامی نااہلی نے بھی دکھایا اپنا رنگ اور ہلکی سی بارش کے بعد ہی شہر کےمختلف علاقوں میں بجلی کی فراہمی منقطع ہوگئی ہے۔

    سڑکوں پر پھسلن کے باعث کئی موٹرسائیکل سوار پھسل کر زخمی ہوگئے۔ مزید یہ کہ موسم کی سرد ہواوں سے متاثرہ لوگوں نے چائے خانوں میں رش بڑھ گیا ہے۔

    محکمہ موسمیات نے خبر دی ہے کہ شہر میں موسم ابر آلود رہے گا اور پیش گوئی کی ہے کہ شہر میں مزید بارش کا امکان نہیں ہے۔

  • بالائی علاقوں میں ہلکی بارش اور برفباری کا امکان

    بالائی علاقوں میں ہلکی بارش اور برفباری کا امکان

    اسلام آباد: محکمہ موسمیات نے بالائی علاقوں میں مزید ہلکی بارش اور برف باری کی پیش گوئی کردی ہے۔

    محکمہ موسمیات کے مطابق ملاکنڈ، ہزارہ ڈویژن، گلگت بلتستان اور کشمیر اور اس سے ملحقہ پہاڑی علاقوں میں مطلع جزوی طور پر ابر آلود رہےگا۔ چند مقامات پر ہلکی بارش اور پہاڑوں پر ہلکی برفباری کا بھی امکان ہے۔

    محکمہ موسمیات کے مطابق گزشتہ چوبیس گھنٹوں کے دوران سب سے زیادہ بارش بالاکوٹ میں دو ملی میٹر ریکارڈ کی گئی جبکہ کم سے کم درجہ حرارت سکردو میں منفی چھ ڈگری سینٹی گریڈ ریکارڈ کیا گیا ہے۔

  • ملک کے بیشتر علاقوں میں سردی دن بدن بڑھنے لگی

    ملک کے بیشتر علاقوں میں سردی دن بدن بڑھنے لگی

    اسلام آباد: ملک بھر میں سردی نے ڈیرے ڈال لئے اور بالائی علاقوں میں سردی بڑھنے کے بعد میدانی علاقوں میں بھی ٹھنڈی ہوائیں چل پڑی ہیں۔

    تفصیلات کے مطابق بالائی علاقوں میں یخ بستہ ہوائیں چلنے سے سردی بڑھ گئی ہے جس کے بعد پارہ مزید نیچے آگیا۔ ملک بھر میں درجہ حرارت کم ہوتے ہی گرم کپڑوں، میوہ جات ، اور گرم مشروبات کی مانگ میں اضافہ ہوگیا۔

    سندھ اور پنجاب میں بھی سرد ہوائیں چلنے سے موسم میں خنکی پید اہوگئی ہے۔ محکمہ موسمیات کے مطابق آئندہ چوبیس گھنٹوں کے دوران ملک بھر میں موسم سرد اور خشک رہنے کا امکان ہے۔