Tag: WOMAN ATTACKS

کراچی: شہر قائد کے سٹی کورٹ میں خاتون نے وکیل کا سر پھاڑ دیا، پولیس نے خاتون کو حراست میں لے لیا۔

تفصیلات کے مطابق کراچی کے سٹی کورٹ میں خاتون نے پیچھا کرنے پر وکیل کا سر پھاڑ دیا، پولیس نے خاتون کو حراست میں لے لیا، وکیل کا کہنا ہے کہ الزام یا بدتمیزی ثابت ہوئی تو معافی مانگ لوں گا۔

ویڈیو میں دیکھا جاسکتا ہے کہ وکیل کے سر سے خون بہہ رہا ہے جبکہ وکیل کا کہنا تھا کہ بدتمیزی دوران وکالت یا کبھی ثابت ہوئی تو معافی مانگ لوں گا۔

خاتون کا موقف تھا کہ وکیل جب میرا پیچھا کررہا تھا تو میں نے کچھ نہیں کہا لیکن جب پیچھے سے میرا دوپٹہ کھینچا گیا اور دوپٹہ گلے میں پھنس گیا تو میں نے وکیل کو تھپڑ مارا۔

پولیس نے وکیل کا سر پھاڑنے پر خاتون کو حراست میں لے لیا، واضح رہے کہ مذکورہ خاتون کئی سال سے جعلی پلاٹ کیس میں عدالت میں پیش ہورہی ہیں۔

مزید پڑھیں: لاہور : نیب عدالت کے باہر دوخاتون وکلا کی مرد وکیل پر تھپڑوں کی بارش

یاد رہے کہ گزشتہ روز احتساب عدالت میں خاتون وکیل نے مخالف مرد وکیل پر تھپڑوں کی بارش کردی تھی دیگر وکلاء ایک دوسرے سے الجھ پڑے تھے احتساب عدالت کا احاطہ اکھاڑا بن گیا تھا۔

دونوں خواتین بہنیں ہیں جنہوں نے تجمل نامی وکیل پر الزام عائد کیا کہ اس نے ان کی کردار کشی اور ہراساں کرنے کی کوشش کی اور ان پر جملے کسے، خاتون وکیل نے مخالف وکیل کی خوب خبر لی تھی۔

اس دوران خاتون وکیل کو دھکے بھی دیئے گئے ساتھی وکیل کو بچاتے بچاتے ایک وکیل خود بھی خاتون وکیل کےحملوں کا شکار ہوتا رہا۔