واشنگٹن : امریکی خاتون نے اپنے ہی کمسن بچے کو گاڑی کی ڈگی میں بند کرکے سفاکیت کی انتہا کردی۔
غیر ملکی میڈیا کے مطابق پانچ سالہ بچے کو ڈگی میں بند کرنے کا افسوسناک واقعہ امریکی ریاست کولوراڈو کی ایک سپر مارکیٹ کے پارکنگ ایریا میں پیش آیا، جس کی ویڈیو بھی سوشل میڈیا پر وائرل ہوگئی۔
ویڈیو پارکنگ ایریا میں دیگر شہریوں نے بنائی اور خاتون کو مجبور کیا کہ وہ بچے کو ڈگی سے باہر نکالنے، لوگوں کی مداخلت کے باعث خاتون نے بچے کو ڈگی سے باہر نکالا۔
سوشل میڈیا پر شیئر ہونے والی ویڈیو میں دیکھا جاسکتا ہے کہ ایک خاتون سن 2000 ماڈل کی شیورلیٹ کار کی ڈگی میں ایک بچے کو بند کررہی ہے۔
ڈگی میں بند بچے مدد کےلیے چیخ و پکار بھی واضح طور پر سنی جاسکتی ہے، بچے کی مدد کی پکار سن کر وہاں موجود دیگر افراد نے بچے کو ڈگی سے نکلوایا اور ویڈیو انٹرنیٹ پر شیئر کردی۔
ویڈیو سوشل میڈیا پر وائرل ہوتے ہی پولیس حرکت میں آئی اور 33 سالہ خاتون چیلیسا تروجیلو اور پانچ سالہ بچے کی تلاش شروع کردی ہے۔
میڈیا رپورٹس کے مطابق خاتون اور بچہ دونوں بے گھر ہیں، جس کے باعث پولیس اہلکار انہیں مختلف جگہوں پر ڈھونڈنے کے باوجود پکڑنے میں ناکام رہے۔