لاہور : آئی سی سی ویمنز ٹی ٹوئنٹی ورلڈ کپ کیلئے پندرہ رکنی قومی ٹیم کا اعلان کردیا گیا۔ سابق کپتان اور ٹیم کی سب سے سینئیر کھلاڑی ثناء میر کو حیران کن طور پر ٹیم سے ڈراپ کردیا گیا۔
تفصیلات کے مطابق کرکٹ کے بڑے ایونٹ میں بڑی کھلاڑی کو ڈراپ کردیا گیا، پاکستان کیلئے متعدد ایوارڈ جیتنےوالی سابق کپتان ثناء میرآسٹریلیا نہیں جائیں گی۔
اسپورٹس ذرائع کے مطابق ثناء میر ذاتی پسند ناپسندکی بھینٹ چڑھ گئیں، قومی ویمن کرکٹ ٹیم کی چیف سلیکٹر عروج ممتاز نے کپتان بسمعہ معروف کے ہمراہ قذافی سٹیڈیم میں پریس کانفرنس کرتے ہوئے ویمنز ٹی 20 ورلڈکپ کیلئے 15 رکنی سکواڈ کا اعلان کیا جس میں آل راؤنڈر ثناءمیر کو شامل نہیں کیا گیا ہے۔
چیف سلیکٹر عروج ممتاز نے تجربے اور فٹنس کے باوجود ثناء میر کو اسکواڈ سے باہر کیا۔ اس حوالے سے ذرائع نے بتایا ہے کہ کپتان اور سینئیر کھلاڑی چیف سلیکٹر کے اس فیصلے سے ناخوش ہیں، میگا ایونٹ میں ثناء میرکی غیر موجودگی سے بولنگ لائن کمزور ہوگئی۔
ایونٹ میں پندرہ رکنی قومی ٹیم بسمعہ معروف کریں گی، میگا ایونٹ اکیس فروری سے آسٹریلیا میں شیڈول ہے۔ پاکستان ویمنز کا پہلا مقابلہ چھبیس فروری کو ویسٹ انڈیز کی ٹیم سے ہوگا۔
قومی ویمنز ٹیم کی دیگر کھلاڑیوں میں ایمن انور، عالیہ ریاض، انعم امین، عائشہ نسیم، ڈیانا بیگ، فاطمہ ثناء، ارم جاوید جویریہ ودود، منیبہ علی، ندا ڈار، عمیمہ سہیل، سعدیہ اقبال، سدرہ نواز اور سیدہ عروب شاہ شامل ہیں۔
