کراچی میں شوہر نے تلخ کلامی کے بعد فائرنگ کرکے بیوی کو قتل کر دیا، پولیس نے ملزم کو اسلحہ سمیت گرفتار کرلیا۔
اے آر وائی نیوز کی رپورٹ کے مطابق کراچی کے علاقے بلدیہ ٹاؤن ساڑھے5نمبر میں خاتون کے بہیمانہ قتل کا واقعہ پیش آیا ہے۔
اس حوالے سے پولیس حکام کا کہنا ہے کہ میاں بیوی کے درمیان گھر میں ہونے والی تلخ کلامی کے بعد شوہر نے فائرنگ کرکے اپنی اہلیہ کو قتل کردیا۔
پولیس کے مطابق ملزم محمد حسین نے فائرنگ کرکے25سالہ اہلیہ مہرالنسا کو قتل کیا،ملزم شوہرکو گرفتارکر کے اسلحہ برآمد کرلیا گیا ہے۔
بلدیہ پولیس حکام کا مزید کہنا ہے کہ مقتولہ مہر النساء کے 2بچے ہیں جن میں ایک بیٹا اور ایک بیٹی شامل ہیں، جبکہ گرفتار ملزم نجی ادارے میں ملازمت کرتا ہے۔
مزید قانونی کارروائی کیلیے مقتولہ خاتون کی لاش اسپتال منتقل کردی گئی ہے، واقعے کا مقدمہ درج کرکے مزید تحقیات کی جارہی ہیں۔
دوسری جانب کراچی ناردرن بائی پاس کے قریب فائرنگ سے ایک شخص کے زخمی ہونے کی اطلاعات ہیں جسے تشویشناک حالت میں عباسی شہید اسپتال منتقل کردیا گیا ہے۔
علاوہ ازیں کراچی کے علاقے ماڈل کالونی میں تیز رفتار موٹر سائیکل فٹ پاتھ سے ٹکرا گئی جس کے نتیجے میں ایک نوجوان موقع پر ہی جاں بحق ہوگیا۔
ریسکیو حکام کا کہنا ہے کہ متوفی کی شناخت 14 سالہ حسن کے نام سے ہوئی ہے جس کی لاش کو مزید قانونی کارروائی کیلیے اسپتال منتقل کیا گیا ہے۔
