پشاور : خیبر پختونخوا کے شہر پشاور کی سینٹرل جیل میں قید خواتین کی فلاح وبہبود کیلئے انہیں دستکاری اور دیگر امور کی تربیت دی جاتی ہے۔
پشاور سینٹرل جیل میں قیدیوں کی اصلاح کیلئے ایک لائبریری کا قیام بھی عمل میں لایا گیا ہے جس سے قیدیوں کی بڑی تعداد مستفید بھی ہورہی ہے۔
مختلف جرائم کی پاداش میں پشاور سینٹرل جیل آنے والی قیدی خواتین کو سلائی کڑھائی کا کام سکھایا جاتا ہے تاکہ وہ اپنی سزا پوری کرنے کے بعد معاشرے میں عزت اور وقار کے ساتھ زندگی گزار سکیں۔
اس حوالے سے اے آر وائی نیوز کی نمائندہ شازیہ نثار نے جیل میں قید خواتین سے بات چیت کی اور ان کو درپیش مسائل اور سہولیات کی فراہمی سے متعلق معلومات حاصل کیں۔
جیل میں خواتین کو باقاعدہ کپڑوں کی ڈارفٹنگ کے بعد کٹنگ اور سلائی روزانہ کی بنیاد پر سکھائی جارہی ہے اس کے علاوہ خواتین اپنے فارغ اوقات میں رنگ برنگے دھاگوں کے ساتھ نقش نگاری کا ہنر بھی سیکھ رہی ہیں۔
