نئی دہلی : بھارت میں گزشتہ کئی روز سے انصاف کے حصول کیلئے احتجاج کرنے والی خواتین ریسلرز کے سامنے بےبس مودی سرکار نے مذاکرات کی پیشکش کردی۔
بھارتی میڈیا کے مطابق بھارتی حکومت کی جانب سے مذاکرات کی پیشکش کے بعد ریسلنگ فیڈریشن آف انڈیا (ڈبلیو ایف آئی) کے سربراہ کے خلاف احتجاج کرنے والے ریسلرز نے وزیر کھیل انوراگ ٹھاکر سے ملاقات کی ہے۔
رپورٹس کے مطابق احتجاج کرنے والے پہلوانوں نے وزیر داخلہ امیت شاہ سے ملاقات کی تھی جس کے اگلے روز انوراگ ٹھاکر نے بھی پہلوانوں کو بات چیت کے لیے بلایا اور شفاف تحقیقات کی یقین دہانی کرا دی۔
اس حوالے سے وزیر کھیل انو راگ ٹھاکر کا کہنا ہے کہ حکومت پہلوانوں سے ان کے ایشوز پر بات چیت کرنے کے لیے رضامند ہے، میں نے ایک بار پھر پہلوانوں کو اس کے لیے بلایا ہے، ریسلنگ فیڈریشن کے چیف کے خلاف جنسی ہراسانی کے الزامات کی شفاف تحقیقات ہوں گی۔
واضح رہے کہ بھارت کی خواتین ریسلرز نے فیڈریشن کے چیف برج بھوشن شرن سنگھ کے خلاف جنسی ہراسانی کے الزامات لگائے تھے اور اس معاملے پر ریسلرز دہلی میں گزشتہ کئی ہفتوں سے احتجاج کررہے ہیں۔ چند روز قبل دہلی پولیس نے احتجاج کرنے والے پہلوانوں پر تشدد کر کے انہیں گرفتار بھی کیا تھا۔