ARYNews.tv | Urdu – Har Lamha Bakhabar

Tag: WOMEN

  • امریکا میں تعینات پہلی خاتون سعودی سفیر نے عہدے کا حلف اٹھالیا

    امریکا میں تعینات پہلی خاتون سعودی سفیر نے عہدے کا حلف اٹھالیا

    ریاض: امریکا میں تعینات پہلی سعودی خاتون سفیر شہزادی ریما بنت بندر نے اپنے عہدے کا حلف اٹھا لیا۔

    تفصیلات کے مطابق سعودی فرمانروا شاہ سلمان بن عبدالعزیز نے شاہی خاندان کی شہزادی ریما بنت بندر کو امریکا میں سفیر مقرر کیا اور آج انہوں نے اپنے عہدے کا حلف اٹھایا۔

    عرب میڈیا کے مطابق شہزادی ریما بنت بندر کو امریکا میں تعینات شہزادہ خالد بن سلمان کی جگہ سفیر مقرر کیا گیا ہے، شہزادہ خالد بن سلمان سعودی عرب میں نائب وزیر دفاع مقرر ہوگئے ہیں۔

    سعودی دارالحکومت ریاض میں حلف برداری کی تقریب منعقد ہوئی جہاں شاہ سلمان بن عبدالعزیز نے ریما بنت بندر سے حلف لیا۔

    حلف برداری کی تقریب کے موقع پر آسٹریا، کیمرون اور قبرص میں مقرر کیے گئے سعودی عرب کے نئے سفیروں نے بھی شاہ سلمان کے روبرو اپنے عہدوں کا حلف اٹھایا۔

    سعودی عرب کی پہلی خاتون سفیر امریکا میں سعودی عرب کے سابق سفیر شہزادہ بندر بن سلطان کی بیٹی ہیں، ان کے والد امریکا میں 1983ء سے 2005ء تک سفیر رہے تھے۔

    خیال رہے کہ شہزادی ریما 24 اکتوبر 1983 کو امریکا میں اپنے والد شہزادہ بندر بن سلطان کے ہمراہ واشنگٹن میں سعودی سفارت خانے میں داخل ہوئیں، شہزادی ریما کے والد نے 22 سال تک دونوں ملکوں کے اہم تاریخی ادوار میں سفارت کاری کے فرائض انجام دئیے۔

    سعودی عرب میں مثبت تبدیلی آرہی ہے، شہزادی ریما بندر السعود

    امریکا میں قیام کے دوران شہزادی ریما نے سفارتی آداب و رموز اپنے والد شہزادہ بندر سلطان سے سیکھے یہی وجہ ہے کہ انہوں نے مختلف شعبہ ہائے زندگی میں کامیابی کے ساتھ خدمات انجام دیں، ان کی جرأت ہمت اور سفارتی رموز سے آگاہی کی بنا پر امریکا جیسے طاقت ور ملک میں انہیں سفیر مقرر کیا گیا۔

  • افغان امن عمل: طالبان کے مذاکراتی وفد میں خواتین بھی شامل

    افغان امن عمل: طالبان کے مذاکراتی وفد میں خواتین بھی شامل

    کابل: افغان طالبان نے قطری دارالحکومت دوحہ میں ہونے والے مذاکرات کے لیے اپنے وفد میں خواتین کو بھی شامل کرلیا۔

    تفصیلات کے مطابق افغانستان میں قیام امن کے لیے کی جانے والی کوششوں میں خواتین کے کردار پر زور دیا جارہا تھا، طالبان کے مذاکراتی وفد میں اب خواتین بھی شامل ہوں گی۔

    غیر ملکی خبر رساں ادارے کا کہنا ہے کہ ترجمان افغان طالبان ذبیح اللہ مجاہد نے تصدیق کرتے ہوئے کہا ہے کہ دوحہ میں 19 تا 21 اپریل کو منعقدہ افغان امن مذاکرات میں طالبان کے وفد میں خواتین بھی شامل ہوں گی۔

    ان کا کہنا تھا کہ مذاکراتی وفد میں شامل ہونے والی خواتین کا تعلق افغان طالبان سے نہیں بلکہ وہ عام شہری ہیں جن کا مقصد خطے میں قیام امن کے لیے اپنا کردار ادا کرنا ہے۔

    ترجمان طالبان کا مزید کہنا تھا کہ ان میں سے کچھ خواتین افغانستان سے اور کچھ غیرممالک میں مقیم ہیں، لیکن وہ دوحہ میں ہونے والی افغان حکام سے ملاقات میں شریک ہوں گی۔

    خیال رہے کہ دوحہ میں افغان امن مذاکرات کا نیا دور شروع ہو رہا ہے، جس میں افغان وفد میں سیاست دانوں اور سول سوسائٹی سمیت 150 ارکان شامل ہوں گے۔

    افغان امن مذاکرات، انجلینا جولی نے خواتین کی نمائندگی ناگزیر قرار دے دیا

    یاد رہے کہ گذشتہ دنوں ہالی ووڈ کی معروف اداکارہ اور اقوام متحدہ کی خصوصی نمائندہ برائے پناہ گزین انجلینا جولی نے افغان امن مذاکرات میں خواتین کے کردار کو ایک بار پھر ناگزیر قرار دیا تھا۔

    انہوں نے یہ بھی کہا تھا کہ ہزاروں افغان خواتین امن مذاکرات میں اپنی عدم شمولیت پر گہری تشویش کا اظہار کرچکی ہیں کہ طالبان سے مذاکرات میں اُن کے اور اُن کے بچوں کے حقوق کے تحفظ کا ضامن کون ہوگا۔

  • امریکا میں ٹریفک حادثے کی ذمے دار مکڑی قرار

    امریکا میں ٹریفک حادثے کی ذمے دار مکڑی قرار

    واشنگٹن: یوں تو ٹریفک حادثے کی وجہ زیادہ تر ڈرائیور کی غفلت یا پھر نشے کی حالت میں گاڑی چلانا بنتی ہے، لیکن امریکا میں ٹریفک حادثے کی وجہ جان کر لوگ حیران رہ گئے۔

    تفصیلات کے مطابق امریکی شہر نیویار میں ایک ایسا ٹریفک حادثہ پیش آیا جس کی وجہ جان کر شہری ورطہ حیرت میں مبتلا ہوگئے، اور پولیس اہلکار بھی چونک گئے۔

    غیر ملکی خبر رساں ادارے کے مطابق پولیس کا کہنا ہے کہ وائر لیس ڈیوائس پر کسی کار حادثے کی خبر موصول ہوئی جس میں کہا گیا کہ ایک گاڑی بے قابو ہوکر درخت سے جاٹکرائی ہے۔

    پولیس جاعے وقوعہ پر پہنچی تو خاتون ڈرائیور حیران وپریشان تھیں، پولیس کے سوالات کرنے پر خاتون نے بتایا کہ ان کی گاڑی میں ایک مکڑی گھس آئی تھی جس کے باعث وہ گھبرا گئیں اور گاڑی حادثے کی وجہ بن گئی۔

    اس حادثے میں گاڑی کو شدید نقصان پہنچا، کار کے شیشے ٹوٹ گئے جبکہ خاتون ڈرائیور کو بھی شدید چوٹے آئیں، ڈرائیور مکڑی کو اپنے چہرے کے بالکل قریب دیکھ کر حواس باختہ ہوگئی تھیں۔

    پولیس کا کہنا ہے کہ ایسی صورت حال سے نمٹنے کے لیے ڈرائیورز کو خصوصی طور پر ٹریننگ لینی چاہیئے تاکہ کسی بھی ناگہانی صورت حال سے فوری طور پر نمٹا جاسکے۔

    اماراتی ریاست راس الخیمہ میں خوفناک ٹریفک حادثہ، چار نوجوان ہلاک

    پولیس کے مطابق گاڑی چلانا سب کے لیے آسان نہیں ہوتا لیکن نئے ڈرائیوروں کو اپنے خوف پر قابو پاتے ہوئے محفوظ طریقے سے گاڑی چلانا سیکھنا چاہیے۔

  • افغان امن مذاکرات، انجلینا جولی نے خواتین کی نمائندگی ناگزیر قرار دے دیا

    افغان امن مذاکرات، انجلینا جولی نے خواتین کی نمائندگی ناگزیر قرار دے دیا

    نیویارک: ہالی ووڈ کی معروف اداکارہ اور اقوام متحدہ کی خصوصی نمائندہ برائے پناہ گزین انجلینا جولی نے افغان امن مذاکرات میں خواتین کے کردار کو ایک بار پھر ناگزیر قرار دے دیا۔

    تفصیلات کے مطابق اپنے ایک بیان میں اداکارہ کا کہنا تھا کہ خواتین کو چاہیے کہ وہ اپنے حقوق کے لیے آواز بلند کریں، افغان امن عمل میں خواتین نمایاں کردار ادا کرسکتی ہیں۔

    انہوں نے کہا کہ افغان حکومتی وفد عنقریب طالبان سے دوحہ میں مذاکرات کرے گا، اس وفد میں خواتین کی شمولیت بھی ہونا چاہیے تھی۔

    انجلینا جولی کا کہنا تھا کہ خواتین پر مظالم، جبر اور ناانصافی کے اس نئے دور میں اگر امن معاہدہ نہیں ہوگا تو استحکام بھی نہیں آئے گا۔

    اسٹار اداکارہ مہاجرین سمیت دنیا بھر میں خواتین کے حقوق کے لیے آواز بلند کرتی آئی ہیں، ماضی میں افغان خواتین کے ساتھ ہونے والے ظلم کو بھی بے نقاب کیا۔

    خیال رہے کہ گذشتہ ماہ اقوام متحدہ کی جنرل اسمبلی سے خطاب میں انجلینا جولی کا کہنا تھا کہ خواتین کی شمولیت کے بغیر افغان امن مذاکرات نتیجہ خیز ثابت نہیں ہوں گے۔

    افغان امن مذاکرات میں خواتین کی نمائندگی ناگزیر ہے: انجلینا جولی

    انہوں نے یہ بھی کہا تھا کہ ہزاروں افغان خواتین امن مذاکرات میں اپنی عدم شمولیت پر گہری تشویش کا اظہار کرچکی ہیں کہ طالبان سے مذاکرات میں اُن کے اور اُن کے بچوں کے حقوق کے تحفظ کا ضامن کون ہوگا۔

  • احتساب عدالت کے باہر سے پیپلز پارٹی کی 2 خواتین کارکن گرفتار

    احتساب عدالت کے باہر سے پیپلز پارٹی کی 2 خواتین کارکن گرفتار

    اسلام آباد: پیپلز پارٹی قیادت کی احتساب عدالت میں پیشی کے موقع پر عدالت کے باہر پیپلز پارٹی کی 2 خواتین کارکنوں کو ہلڑ بازی کرنے اور زبردستی عدالت کے اندر جانے کی کوشش کرنے پر گرفتار کرلیا گیا۔

    تفصیلات کے مطابق سابق صدر آصف علی زرداری اور ان کی ہمشیرہ فریال تالپور کی احتساب عدالت میں پیشی کے موقع پر عدالت کے باہر سے پیپلز پارٹی کی 2 خواتین کارکنوں کو گرفتار کرلیا گیا۔

    دونوں کو زبردستی عدالت جانے کی کوشش اور ہلڑ بازی کرنے پر خواتین پولیس اہلکاروں نے حراست میں لیا اور پولیس کی گاڑی میں بٹھا دیا۔

    خیال رہے کہ سابق صدر آصف علی زرداری اور ان کی ہمشیرہ فریال تالپور جلعی بینک اکاؤنٹس کیس میں دائر کردہ ریفرنس کی پہلی سماعت کے لیے احتساب عدالت میں پیش ہوئے۔

    جعلی بینک اکاؤنٹس کیس کو کراچی کی بینکنگ کورٹ سے اسلام آباد کی احتساب عدالت منتقل کیا گیا تھا، یہ مقدمہ اسی عدالت میں جاری ہے جہاں سے سابق وزیر اعظم نواز شریف کو العزیزیہ ریفرنس میں سزا ہوئی تھی۔

    پیپلز پارٹی قیادت کی پیشی کے موقع پر امن و امان کی صورتحال کو قابو میں رکھنے کے لیے 200 رینجرز اہلکار طلب کیے گئے، اس دوران غیر متعلقہ شخص کو عدالت میں جانے کی اجازت نہیں تھی جبکہ متعلقہ راستوں پر بھی نفری تعینات کی گئی۔

    پیپلز پارٹی کے کارکنان بھی بڑی تعداد میں وہاں موجود تھے جو نعرے بازی کرتے رہے۔

  • غربت میں کمی کے لیے خواتین کو با اختیار بنانا ضروری ہے: اسلام آباد ویمن چیمبر

    غربت میں کمی کے لیے خواتین کو با اختیار بنانا ضروری ہے: اسلام آباد ویمن چیمبر

    اسلام آباد: ویمن چیمبر کی بانی صدر ثمینہ فاضل کا کہنا ہے کہ غربت میں کمی کے لئے خواتین کو با اختیار بنانا ضروری ہے۔

    تفصیلات کے مطابق ویمن چیمبر کے تحت منعقدہ سالانہ نمائش کے شرکاء سے خطاب کرتے ہوئے ویمن چیمبر کی بانی صدرثمینہ فاضل نے ملک میں خواتین کے کردار پر روشنی ڈالی۔

    انہوں نے کہا کہ ملک بھر کی تاجر خواتین وزیر اعظم کے اعلان کردہ غربت مٹاؤ پراگرام کی بھرپور اور غیر مشروط حمایت کرتی ہیں۔

    ان کا کہنا تھا کہ اس منصوبہ میں غریب خواتین کی ترقی کو توجہ دی گئی ہے اور یہ بڑی تعداد میں عوام کو خط غربت سے اوپر لے آئے گا۔

    ویمن چیمبر کی بانی صدر نے بتایا کہ غربت میں کمی کے لیے خواتین کو با اختیار بنانا اور ان کی معاشی سرگرمیوں میں بھرپور شمولیت یقینی بنائی جائے۔

    ان کا مزید کہنا تھا کہ بنگلا دیش نے خواتین کی مدد سے سرعت سے ترقی کی ہے اور پاکستان کو پیچھے چھوڑ دیا ہے، خواتین کو نظر انداز کر کے غربت کے خاتمہ کے لئے تین گنا زیادہ وسائل درکار ہوں گے جو ہمارے پاس نہیں ہیں۔

  • کاروبار اور قومی معیشت میں خواتین کا کردار اہمیت کا حامل ہے: پال جونز

    کاروبار اور قومی معیشت میں خواتین کا کردار اہمیت کا حامل ہے: پال جونز

    اسلام آباد: امریکی قائم مقام سفیر پال جونز کا کہنا ہے کہ کاروبار اورقومی معیشت میں خواتین کا کردار اہمیت کاحامل ہے۔

    تفصیلات کے مطابق پاک امریکا ویمنزکونسل کی جانب سے تربیتی پروگرام کا افتتاح کر دیا گیا، امریکی قونصل خانہ میں افتتاحی تقریب سے خطاب میں پال جونز کا کہنا تھا کہ کونسل کا قیام کا مقصد خواتین کو افرادی قوت کا حصہ بنانا ہے، کونسل کے اراکین پروگرام کی کامیابی میں پیش پیش رہے ہیں۔

    انہوں نے کہا کہ اب تک دنیا بھر میں بیس لاکھ سے زائد افراد سے تربیتی تعلقات قائم کرنے میں مدد فراہم کر چکے ہیں، پروگرام کامقصد پاکستان میں خواتین تعلیم صحت اور معشیت کے شعبوں میں با اختیار بنانا ہے، پاکستان میں مقامی صنعتوں کا تعاون بھی خوش آیند ہے۔

    پال جونز کا کہنا تھا کہ امریکی حکومت اور ٹیکساس کی اے اینڈ ایم یونیورسٹی سمیت پاکستان و امریکا کی نجی کمپنوں کے مابین منفرد سرکاری ونجی اشتراک کار ہے۔

    اس موقع پر امریکی قائم مقام سفیر پال جونز نے کونسل کے دو نئے پروگراموں کا اعلان بھی کیا جن میں وویمن مینٹر انیشیٹواور وویمن بزنس انیشیٹو شامل ہیں۔

    تقریب میں قائم مقام امریکی سفیر پال جونز کی اہلیہ کیتھرین جونز، کراچی میں تعینات امریکی قونصل جنرل جوائن ویگنز، وویمن کونسل کی ایگزیکٹو ڈایریکٹر رادھیکا پرابھو کے علاوہ کراچی کی کاروباری برادری اور سول سوسائٹی کے نمائندوں نے بھی شرکت جبکہ پینل ڈسکشن میں اب تک کی صورت حال کا جائزہ لیا گیا۔

  • افغان امن مذاکرات میں خواتین کی نمائندگی ناگزیر ہے: انجلینا جولی

    افغان امن مذاکرات میں خواتین کی نمائندگی ناگزیر ہے: انجلینا جولی

    نیویارک: ہالی ووڈ کی معروف اداکارہ اور اقوام متحدہ کی خصوصی نمائندہ برائے پناہ گزین انجلینا جولی نے کہا ہے کہ افغان امن مذاکرات میں خواتین کی نمائندگی ناگزیر ہے۔

    تفصیلات کے مطابق اقوام متحدہ کی جنرل اسمبلی سے خطاب میں انجلینا جولی کا کہنا تھا کہ خواتین کی شمولیت کے بغیر افغان امن مذاکرات نتیجہ خیز ثابت نہیں ہوں گے۔

    انہوں نے کہا کہ ہزاروں افغان خواتین امن مذاکرات میں اپنی عدم شمولیت پر گہری تشویش کا اظہار کرچکی ہیں کہ طالبان سے مذاکرات میں اُن کے اور اُن کے بچوں کے حقوق کے تحفظ کا ضامن کون ہوگا۔

    اداکارہ کا کہنا تھا کہ عالمی برادری کی امن مذاکرات میں افغان خواتین کی عدم شمولیت پر خاموشی خطرے کی علامت ہے۔

    یاد رہے کہ حالیہ امریکا طالبان مذاکرات دوحہ قطر میں 25 فروری کو شروع ہوئے، جس کے لیے پاکستان نے اپنا کلیدی کردار ادا کیا۔ دو دن قبل افغان میڈیا نے دعویٰ کیا تھا کہ فریقین میں کچھ معاملات پر اتفاق ہو گیا ہے اور چند معاملات پر ابھی بھی رکاوٹ موجود ہے۔

    امریکا اور طالبان کا 2 اہم نکات پر اتفاق، افغانستان سے افواج کی واپسی زیرغور

    امریکی خبر رساں ادارے کا کہنا تھا کہ مذاکرات کار کوشش کر رہے ہیں کہ درپیش رکاوٹوں پر قابو پایا جائے، طالبان نمائندے ذبیح اللہ مجاہد کا کہنا تھا کہ مذاکرات میں ان کا صرف اس بات پر اصرار ہے کہ تمام قابض افواج افغانستان سے نکل جائیں۔

  • پارلیمنٹ میں 68 فیصد خواتین کا ورلڈ ریکارڈ

    پارلیمنٹ میں 68 فیصد خواتین کا ورلڈ ریکارڈ

    ایک عرصے سے خواتین کی خود مختاری کے ساتھ ساتھ اس بات پر بھی زور دیا جارہا ہے کہ خواتین کو فیصلہ سازی کے عمل میں شامل کیا جائے اور حکومتی ایوانوں میں ان کی تعداد بڑھائی جائے۔

    تاہم ترقی یافتہ ممالک کے برعکس مشرقی افریقہ کے ملک روانڈا نے اس بات کی اہمیت کو سمجھا جہاں کی پارلیمنٹ میں اب دنیا میں سب سے زیادہ خواتین موجود ہیں۔

    روانڈا ایک عرصے سے پارلیمنٹ میں خواتین کی تعداد کے حوالے سے ورلڈ ریکارڈ کا حامل رہا ہے جہاں ارکان پارلیمنٹ میں 64 فیصد خواتین تھیں۔ گزشتہ برس ستمبر کے پارلیمانی انتخابات میں روانڈا نے اپنا ہی ریکارڈ توڑ دیا اور اب وہاں کی پارلیمنٹ میں 67.5 فیصد خواتین ہیں۔

    80 نشستوں کے ایوان میں 54 نشستیں خواتین کے پاس ہیں، ان خواتین کو روانڈا کی تعمیر نو کا معمار بھی کہا جاتا ہے۔

    گو کہ روانڈا میں پارلیمانی اکثریت خواتین کے پاس ہے تاہم روانڈا خواتین کے حقوق اور خود مختاری کے حوالے سے کسی مثالی پوزیشن پر نہیں ہے، اس کے باوجود پالیسی سازی میں خواتین کی شمولیت کے حوالے سے روانڈا دیگر ممالک کے لیے ایک مثال ہے۔

    اس حوالے سے اگر پاکستان کو دیکھا جائے تو یہاں بھی صورتحال پہلے سے بدتر نظر آتی ہے۔ دنیا بھر کی پارلیمان اور ایوانوں کا ریکارڈ مرتب کرنے والے ادارے انٹر پارلیمنٹری یونین کی ویب سائٹ کے مطابق سنہ 2017 میں پارلیمنٹ میں خواتین کی تعداد کی فہرست میں پاکستان 89 ویں نمبر پر تھا۔

    مذکورہ فہرست کے مطابق پاکستانی پارلیمنٹ میں خواتین کی نمائندگی صرف 20.6 فیصد تھی۔ یعنی 342 نشستوں پر مشتمل پارلیمان میں صرف 70 خواتین موجود تھیں جو ملک بھر کی 10 کروڑ 13 لاکھ سے زائد (مردم شماری کے غیر سرکاری نتائج کے مطابق) خواتین کی نمائندگی کر رہی تھیں۔

    اب 2019 میں پاکستان اس درجہ بندی میں مزید نیچے 101 ویں نمبر پر آگیا ہے۔ صنفی ماہرین کا کہنا ہے کہ پالیسی سازی کے عمل اور قومی اداروں میں خواتین کی شمولیت ضروری ہے تاکہ وہ ملک کی ان خواتین کی نمائندگی کرسکیں جو کمزور اور بے سہارا ہیں۔

  • پتھروں پر فن پارے تخلیق کرنے والی باصلاحیت سعودی خاتون

    پتھروں پر فن پارے تخلیق کرنے والی باصلاحیت سعودی خاتون

    ریاض: سعودی عرب میں ایک ایسی باصلاحیت خاتون ہیں جو اپنی صلاحیتوں کے جوہر دکھاتے ہوئے پتھروں پر فن پارے تخلیق کرتی ہیں۔

    آپ نے اس سے پہلے کاغذ یا کینوس شیٹ پر فن پارے دیکھے ہوں گے لیکن سعودی شہر الخبر کی رہائشی آرٹسٹ اپنے فن کے ذریعے پتھروں پر فن پارے بناتی ہیں۔

    عرب میڈیا کے مطابق سعودی مصورہ منی نے فن پاروں کی تخلیق میں نئی جہت پیدا کی اور چٹانوں کے ٹکڑوں کو رنگوں کے ذریعے زبان دے کر سب کو حیران کردیا۔

    مصورہ کی تخلیق جو بھی دیکھتا ہے وہ داد دیے بغیر نہیں رہتا، منی کا چٹانوں کے ٹکڑے اور چھوٹے چھوٹے پتھروں پر چہرہ اور دیگر تصاویر بنانے کا خصوصی مشغلہ ہے۔

    انہوں نے اپنے گھر کے ایک کمرے کو اسی کام کے لیے مختص کردیا ہے جہاں وہ پتھروں پر فن کا مظاہرہ کرکے اسے سجادیتی ہیں، بعض اوقات موضوع پتھروں کی تلاش میں ملک کے مختلف شہروں کو دورہ بھی کرتی ہیں۔

    مقامی میڈیا کو انٹرویو دیتے ہوئے مصورہ کا کہنا تھا کہ یہ میرا شوق نہیں بلکہ جنون ہے جس کے ذریعے اپنے افکار اور نظریات کا اظہار کرتی ہوں۔

    انہوں نے بتایا کہ شروع میں کاغذ پر فن پارے بناتی تھی بعد ازاں مجھے پتھروں کا خیال آیا اور پھر اس پر رنگوں سے کھیلنے لگی، گھر والے میری قابلیت کو خوب سراہتے ہیں۔

    منی کا کہنا تھا کہ کبھی کبھی فن پارے تخلیق کرنے میں کئی روز بھی لگ جاتے ہیں، سوشل میڈیا پر بہت سے صارفین میری قابلیب اور کاوشوں کے معترف ہیں، کئی لوگوں نے میری پینٹنگ کو خریدنے کی خواہش ظاہر کی ہے۔