کراچی: حبیب گرلز اسکول نے عمدہ کارکردگی کا مظاہرہ کرتے ہوئے کراچی نیٹ بال کپ کے دونوں ٹائٹل انڈر 15 اور 17 اپنے نام کرلیے۔
تفصیلات کے مطابق انڈر 15 ایونٹ کے فائنل میچ حبیب گرلز اسکول اور سٹی اسکول پی اے ایف کے مابین کھیلا گیا جسے حبیب گرلز اسکول نے سخت مقابلے کے بعد ایکسٹرا ٹائم میں 6 کے مقابلے 7 گولوں سے جیت کر ٹائٹل اپنے نام کر لیا۔
تیسری پوزیشن کا میچ سٹی اسکول گلشن اور کراچی گرامر اسکول کے مابین کھیلا گیا، جسے سٹی اسکول گلشن نے 4 کے مقابلے 15 گولوں سے جیت کر تیسری پوزیشن حاصل کرلی۔
انڈر 17 ایونٹ کے فائنل بھی میچ حبیب گرلز اسکول اور سٹی اسکول پی اے ایف کے مابین کھیلا گیا جسے حبیب گرلز اسکول نے 7 کے مقابلے 9 گولوں سے جیت کر ٹائٹل اپنے نام کر لیا، تیسری پوزیشن سینٹ جوزف اسکول نے حاصل کی۔
اس ایونٹ میں بہترین ڈسیپلین کی ٹرافی سٹی اسکول یونیورسٹی روڈ نے جیتی، جبکہ ایمرجنگ ٹیم کی ٹرافی کراچی گرامر اسکول اور کونونٹ جیسس میری اسکول نے اپنے نام کی۔
انڈر 15 کیٹگری میں آل اسٹار پلیئر کے سات کھلاڑیوں کو ایوارڈ دیئے گئے جن میں رمشا، شیزین فاطمہ، علیشاہ بشیر، زہرہ عسکری، عبیہ، مومل اور ردا شامل ہیں۔
انڈر17 کیٹگری میں آل اسٹار پلیئر کے سات کھلاڑیوں کو ایوارڈ دیئے گئے جن میں حفہ، حمنہ، رقیہ مودی، مریم رحمن، ہایا زوبیر اور حمنہ کاشف شامل ہیں۔
ان میچوں کو خالد پرویز، شازیہ یوسف، عدنان غوری، قرتہ العین، صمد مسعود، نایاب رضیہ، سکینہ شبیر، فہد علی پیرزادہ اور عریب حسین نے سپروائز کیا۔
اختتامی تقریب کے مہمان خصوصی اسامہ قادری، ممبر قومی اسمبلی اور نائب صدر پاکستان نیٹ بال فیڈریشن تھے جنہوں نے کھلاڑیوں میں انعامات تقسیم کیے, اس موقع پر پاکستان نیٹ بال فیڈریشن صدر مدثر آرائیں، سیکرٹری محمدریاض، سندہ نیٹ بال کے سیکرٹری اعجازالحق اور سٹی اسکول کے ریجنل اسپورٹس کوڈینٹر انتظار حیدر بھی موجود تھے۔
