ماسکو: برازیل کے اسٹار کھلاڑی نیمار ڈی سلوا اور مصری کے ہر دل عزیز فٹ بالر محمد صلاح کے ان فٹ ہونے سے ان کی ٹیموں پر مشکلات کے بادل منڈلانے لگے۔

تفصیلات کے مطابق جوں جوں روس میں ہونے والا ورلڈ کپ قریب آرہا ہے، شائقین کا جوش و خروش بڑھتا جارہا ہے، البتہ یہ خدشہ بھی بڑھ رہا ہے کہ چند اسٹار کھلاڑی شاید ایکشن میں دکھائی نہ دیں۔

سب سے زیادہ فکر مند مصری مداح ہیں۔ یاد رہے کہ چیمپیئنز لیگ کے فائنل میں ریال میڈرڈ کے ڈیفینڈر راموس نے محمد صلاح کو زخمی کرکے میچ سے باہر کر دیا تھا، جس کے بعد یہ اندیشے ظاہر کیے جانے لگے کہ شاید وہ ورلڈ کپ بھی نہ کھیل سکیں۔

لیورپول انتظامیہ کی جانب سے جاری ہونے والے بیان میں موقف اختیار کیا گیا ہے کہ ان کی میڈیکل ٹیم صلاح کی فٹنس پر کام کر رہی ہے۔ البتہ اندیشہ ہے کہ وہ عالمی مقابلے میں یوروگوائے کے خلاف پہلا میچ نہ کھیل سکیں۔

برازیل کے اسٹار اسٹرائیکر نیمار بھی پوری طرح فٹ نہیں۔ فرانسیسی کلب پی ایس جی کی طرف سے کھیلنے والے نیمار تین ماہ مقابلوں سے دور رہنے کے بعد کروئیشیا کے خلاف میدان میں ضرور اترے، مگر21 منٹ بعد انھیں میدان سے باہر جانا پڑا۔

نیمار نے اپنے بیان میں کہا تھا کہ ابھی وہ 80 فیصد فٹ ہیں۔ تجزیہ کار اندیشے ظاہر کر رہے ہیں کہ اس فٹنس کے ساتھ وہ ارجنٹینا، جرمنی اور فرانس جیسی بڑی ٹیموں کے مدمقابل پرفارم نہیں کرسکیں گے۔

سویڈن کے مداح زلاٹان ابراہمووچ اور فرانسیسی شائقین کریم بینزیما کو بھی ایکشن میں نہیں دیکھ سکیں گے، کیوں کہ دونوں کھلاڑی اپنے کوچز کو متاثر کرن میں ناکام رہے ہیں۔

فلسطین: ارجنٹینا نے اسرائیل سے دوستانہ فٹبال میچ منسوخ کردیا

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔