کوئٹہ : بلوچستان کے علاقے قمبرانی روڈ سے 2 بچیوں کی بوری بند لاشیں ملی ہیں، جس کی عمریں 3 اور 7 سال ہیں۔
اے آر وائی نیوز کوئٹہ کے نمائندے عزیز الرحمان کی رپورٹ کے مطابق قمبرانی روڈ سے 2 بچیوں کی بوری بند لاشیں ملی ہیں، بچیوں کو گلاگھونٹ کر قتل کیا گیا اور لاشیں بوری میں بند کرکے پھینکی گئیں۔
پولیس کے مطابق دونوں بچیوں کی لاشیں ایک زیر تعمیر مکان سے ملی ہیں، بچیوں کی شناخت3ساله میرب اور7سالہ یسرا کےنام سے ہوئی ہیں۔
ڈاکٹرز نے بتایا کہ دونوں بچیوں کی بوری بند لاشیں اسپتال لائی گئی ہیں، ایک بچی کے منہ میں چوسنی بھی تھی۔ بچیوں کی لاشوں کا پوسٹ مارٹم پولیس سرجن ڈاکٹر عائشہ فیض نے کیا۔
پولیس کے مطابق مرنے والی دونوں بچیاں آپس میں سگی بہنیں ہیں اور ان کے والدین کے درمیان طلاق ہوچکی ہے۔
دونوں بچیاں اپنی والدہ کے ساتھ نانا کے گھر مقیم تھیں فیصلے کے تحت بچیوں کے باپ کو ہفتے میں ایک دن بچیوں کو اپنے ساتھ لے جانے کی اجازت تھی۔
چار روز قبل بچیوں کا چھوٹا چچا یہ کہہ کر بچیوں کو اپنے ساتھ لے گیا کہ گھر میں شادی ہے بچیاں کچھ روز پاب کے گھر میں ہی رہیں گی۔
پولیس حکام کا کہنا ہے کہ واقعے کا مقدمہ بچیوں کے والد کیخلاف درج کرلیا گیا ہے تاہم تاحال کوئی گرفتاری عمل میں نہیں آئی ہے، واقعے کی مزید تحقیقات کی جارہی ہیں۔
سریاب پولیس نے جرم کی سنگینی کی نوعیت کے پیش نظر مقدمہ سیریس کرائم انوسٹی گیشن ونگ منتقل کر دیا ہے۔