لاہور: لاہور ہائیکورٹ نے سانحہ یوحنا آباد کے دوران تین افراد کو گاڑی تلے کچلنے کی ملزمہ خاتون کی ضمانت منسوخی کے لیے دائر درخواست مسترد کردی۔
عدالتی کارروائی شروع ہوئی تو درخواست گزار حمید مسیح کے وکیل نے دلائل دیئے کہ مریم صفدر نامی خاتون نے سانحہ یوحنا آباد کے دوران تین افراد کو اپنی گاڑی تلے کچل دیا تھا، جس سے وہ ہلاک ہوگئے، ہلاک ہونے والوں میں درخواست گزار کا بیٹا بھی شامل ہے۔
مریم صفدر کے خلاف ٹھوس شواہد ہونے کے باوجود ماتحت عدالت نے ضمانت منظور کی جسے منسوخ کیا جائے۔
ہائیکورٹ نے قرار دیا کہ ماتحت عدالت نے ضمانت منظور کرلی ہے اب درخواست گزار ٹرائل کورٹ سے رجوع کرے۔ مریم صفدر کی ضمانتِ منسوخی کے لیے درخواست گزار ماتحت عدالت سے اپنا کیس ثابت کرے۔
