سعودی عرب میں 94 ویں یوم وطنی کی تیاریاں زور و شور سے جاری ہیں، سلوگن کے اعلان کے بعد سعودی رائل ایئر فورس نے طیاروں کو خوبصورت ڈیزائن اور رنگوں سے مزین کردیا۔
سعودی عرب کا یوم وطنی ہر سال 23 ستمبر کو منایا جاتا ہے، جنرل انٹرٹینمنٹ اتھارٹی نے تمام سرکاری اور نجی اداروں پر زور دیا ہے کہ وہ 94 ویں یوم وطنی کے موقع پر جذبہ حب الوطنی کا بھرپور مظاہرہ کریں۔
اس موقع پر سعودی رائل ایئر فورس مختلف سرگرمیوں میں حصہ لیں گی، اس کے لیے طیاروں کو خوبصورتی سے سجایا گیا ہے. طیاروں پر’دام عزک یا وطن‘ (اے وطن تیری شان سلامت رہے) کے جملے کو خوبصورت طریقوں سے لکھا گیا ہے۔
وزارت دفاع سے جاری بیان کے مطابق رائل سعودی ایئر فورس کے مختلف قسم کے جیٹ طیارے جن میں ٹائیفون، ایف 15 ایس اے اور ٹورنیڈو شامل ہیں مملکت کے مختلف شہروں میں ایئرشو کریں گے۔ توقع ہے ایئر شو کی تاریخوں اور مقامات کا اعلان جلد کیا جائے گا۔
قبل ازیں سعودی عرب میں جنرل انٹرٹینمنٹ اتھارٹی ( جی ای اے) نے 94 ویں یوم وطنی کے سلوگن کا اعلان کیا تھا۔
رواں سال قومی دن ’ہم خواب دیکھتے ہیں اوراسے حقیقت بناتے ہیں‘ کے سلوگن کے تحت منایا جائے گا۔ گزشتہ برس بھی یوم وطنی اسی تھیم کے تحت منایا گیا تھا، اس سال بھی اسی کو برقرار رکھا گیا ہے۔
اس سلوگن میں ’نحلم ونحق‘ تحریر کیا گیا ہے، جس کا مطلب ہے ہم خواب دیکھتے ہیں اور اسے حقیقت بناتے ہیں، ہے۔ اس سلوگن کو سعودی عرب کے نقشے کی شکل دی گئی ہے جبکہ سبز رنگ قومی پرچم کی علامت ہے۔
