استنبول : ترکیہ میں عام نلکے کے پانی کو زم زم کے مقدس نام سے مہنگے داموں فروخت کرنے والا دھوکہ باز قانون کی گرفت میں آگیا۔
ملزم نے پکڑے جانے پر انتہائی ڈھٹائی سے اپنے جرم کا اعتراف کرتے ہوئے کہا کہ میرے گاہکوں کو ملاوٹ شدہ پانی پینے سے کوئی شکایت نہیں ہے۔
غیر ملکی میڈیا رپورٹ کے مطابق پولیس نے ایک ایسے شخص کو گرفتار کیا ہے جو عام نلکے کے پانی کو زم زم کے نام سے لوگوں کو فروخت کرکے ان سے پیسے بٹورنے کا دھندہ چلا رہا تھا۔
اس دھوکہ باز اور فراڈیے شخص کی گرفتاری کی خبر پر لوگوں نے اطمینان کا اظہار کیا اور سوشل میڈیا پر بھی بہت سے لوگوں نے خوشی کا اظہار کیا۔
یہ واقعہ اس وقت سامنے آیا جب اضنہ شہر کی پولیس کو ایک ایک خفیہ اطلاع پر واٹر فیکٹری میں کی جانے والی دھوکہ دہی کا علم ہوا۔
ملزم علاقے میں لوگوں کی بہت بڑی تعداد کو نلکے کے پانی کی بوتلیں زمزم کے پانی کے طور پر بیچ رہا تھا اور یہ دعویٰ کررہا تھا کہ اس پانی کو مکہ مکرمہ سے درآمد کیا گیا ہے۔
رپورٹ کے مطابق ابتدائی تحقیقات سے یہ بھی معلوم ہوا ہے کہ اس نے روزانہ تقریباً 6لاکھ لیرے (64,000 ریال کے برابر) "ملاوٹ شدہ” پانی فروخت کرکے کمائے۔
پولیس نے جب فیکٹری مالک سے اس بارے میں باز پرس کی تو اس نے جرم کا اعتراف کرنے میں کوئی عار محسوس نہیں کی بلکہ ڈھٹائی کا مظاہرہ کرتے ہوئے کہا کہ اس پانی سے میرے گاہک بہت مطمئن ہیں۔
ملزم نے اپنے بیان میں مزید کہا کہ اسے ان لوگوں کی طرف سے کوئی شکایت موصول نہیں ہوئی جنہوں نے اس کا "ملاوٹ شدہ” پانی خریدا تھا۔
