Tag: Zardari

اسلام آباد: سابق صدر آصف علی زرداری نے کہا ہے کہ فاٹا حقوق کے لیے پارلیمنٹ کے اندر اور باہر بھرپور آواز اٹھائی جائے گی، فاٹا حقوق کے لیے وفاقی دارالحکومت میں دھرنا ہوا تو پی پی بھی شامل ہوگی۔

اسلام آباد میں فاٹا اراکین پارلیمنٹ سے ملاقات کے بعد گفتگو کے دوران آصف علی زرداری نے کہا کہ فاٹا کے حقوق کے لیے چلنے والی ہر تحریک کا غیر مشروط ساتھ دیں گے، انضمام کے معاملے میں کسی گورنر یا پرمٹ راج کو نہیں مانتے۔

انہوں نے کہا کہ فاٹا کے عوام کی خواہش ہے کہ اُن کے علاقے کو خیبرپختونخواہ میں ضم کیا جائے، پیپلزپارٹی نے ہمیشہ عوامی سطح پر اٹھنے والی آواز کا ساتھ دیا لہذا فاٹا کے معاملے پر چلنے والی ہر تحریک میں اپنا بھرپور کردار ادا کریں گے۔

پڑھیں:  فاٹا اصلاحات کا بل کسی صورت منظور نہیں ہونے دینگے، فضل الرحمان

حیدرآباد: پیپلزپارٹی کے رہنماء شرجیل میمن نے کہا ہے کہ سندھ کے عوام پانی کی بوند بوند کو ترس گئے، وفاقی حکومت سندھ حکومت کے حق پر ڈاکہ ڈال رہی ہے، آصف زرداری نے اعلان کیا تو مسلم لیگ کا اقتدار ختم کردیں گے۔

حیدرآباد میں وفاقی حکومت کے خلاف دیے جانے والے دھرنے سے خطاب کرتے ہوئے شرجیل میمن نے کہا کہ سندھ کے ظلم اورناانصافی کا سلسلہ جاری ہے، سندھ میں 20 گھنٹے کی لوڈشیڈنگ ہے اور یہاں کے عوام پانی کی بوند بوند کو ترس رہے ہیں۔

انہوں نے کہا کہ پاکستان نوازشریف کی جاگیر نہیں، اب عوام جاگ گئے اور اب دما دم مست قلندر  ہوگا، جس دن عوام نکل گئے تو حکمراں خاندان رائے ونڈ میں بھی نہیں رہ سکتا،  آصف زرداری نے اسلام آباد جانے کا اعلان کیا تو اقتدار ختم کردیں گے۔

شرجیل میمن نے کہا کہ نوازشریف کے اردگرد موجود لوگ نازیبا زبان استعمال کرتے ہیں اور عمران خان بھی غلط زبان استعمال کرتے ہیں، سب کو متنبہ کرتا ہوں کہ اپنی زبان کو سنبھال کر استعمال کریں ورنہ ہمیں بھی بولنا آتا ہے۔پی پی رہنماء نے کہا کہ مسلم لیگ ن جتنے بھی جھوٹے مقدمات درج کرلے پیپلزپارٹی اُن کا سامنا کرے گی۔

سینیٹر عاجز دھامرا نے خطاب کرتے ہوئے کہا کہ ’’وفاقی وزیر بجلی و پانی عابد شیر علی نے حیدرآباد آکر عوام پر بجلی چوری کا الزام لگایا، اگر 15 لوگ بل نہیں دیں گے تو کیا پورے گاؤں کی بجلی بند کردی جائے گی‘‘۔

سینئر صوبائی وزیر نثار کھوڑو نے کہا کہ ’’کالا باغ ڈیم کے خلاف سب سے پہلے نعرہ ہم نے اسی جگہ پر لگایا کہ جو کالا باغ کا یار ہے غدار ہے  اور آج تک ہم نے اُسے بننے نہیں دیا‘‘۔

انہوں نے کہا کہ ’’ابھی سندھ کے 5 ڈویژن میں حکومت کے خلاف مظاہرے کیے جائیں گے، حکمراں خاندان نے اقتدار نہ چھوڑا تو ہم نے اسلام آباد بھی دیکھا ہوا ہے، جب ججوں نے وزیراعظم کو چور قرار دے دیا تو یہ ہمارا فرض ہے کہ ہم ملک کو چوروں سے نجات دلائیں‘‘۔

کراچی: سابق صدر آصف علی زرداری نے کہا ہے کہ میرے جتنے مرضی لوگ اغوا ہوجائیں کوئی فرق نہیں پڑتا، میرے زمانے میں کسی اور قسم کی من مانی نہیں ہوتی تھی مگر کسی سویلین کو ہاتھ نہیں لگایا گیا۔

نجی ٹیلی ویژن سے گفتگو کرتے ہوئے آصف علی زرداری نے کہا کہ میاں صاحب جب تک مشکل میں نہیں آتے رابطہ نہیں کرتے اُن کی ہمیشہ کوشش رہی کہ وہ سندھ سے سیٹیں حاصل کریں مگر ناکام رہے، حکومت نے ناکامی کے خوف سے پری پول ریگنگ شروع کردی مگر میں نوازشریف کو تھکا کر شکست دینا چاہتا ہوں۔

آصف زرداری نے کہا کہ میرے زمانے میں کسی اور قسم کی من مانی نہیں ہوتی تھی، اسٹیبلشمنٹ کے لوگ میری رائے کا احترام کرتے تھے اور اُس دوران کسی سویلین کو ہاتھ نہیں لگایا گیا، میرے جتنے لوگ اغوا ہوجائیں کوئی فرق نہیں پڑے گا کیونکہ یہ میرے قریب آنے والوں کو خوفزدہ کرنا چاہ رہے ہیں۔

انہوں نے کہا کہ  نوازشریف سی پیک معاہدے کا کریڈٹ لیتے ہیں مگر وہ میں نے سائن کیا اسی طرح حکومت نیوکلیئر ٹیکنالوجی کا کریڈٹ بھی خود لیتی ہے جبکہ انہوں نے اس کے لیے کوئی کام نہیں کیا۔

پیپلزپارٹی کے شریک چیئرمین نے کہا کہ اے ڈی خواجہ کو ہٹانے کا فیصلہ سندھ حکومت کا ہے اگر وہ اچھے افسر ہیں تو کیا دوسرے افسران برے ہیں؟ ، ہم جمہوری لوگ ہیں اس لیے میں نے 13 سال جیل کاٹی اور کوئی ڈیل نہیں کی، حراست کے دوران بہت کچھ سیکھنے کو ملا جس کا فائدہ اپنی صدارت کے دوران اٹھایا۔

آصف رزداری نے کہا کہ جنرل(ر) کیانی اور پاشا کو پالیسیوں پر اعتماد میں لیتا تھا، اُس وقت کی اسٹیبلشمنٹ میری اوپر اعتماد کرتے ہوئے رائے کا احترام کرتی تھی جبکہ اس دور میں صورتحال بہت مختلف ہے۔

سابق صدر نے کہا کہ بلاول بھٹو کی جان کی فکر ہے اس لیے انہیں گاڑی سے باہر نکلنے سے روکتا ہوں مگر وہ میری بات پر عمل نہیں کرتے، جلد ہی اپنے جلسوں میں گو نواز گو کے نعرے ضرور لگائیں گے کیونکہ ہم دھرنے نہیں دیتے اور حکومت کی کارکردگی ایسی نہیں کہ اُن کے ساتھ کام کیا جائے۔

اُن کامزید کہنا تھا کہ پیپلزپارٹی نے بے نظیر بھٹو کی وصیت کے مطابق بلاول کو چیئرمین نامزد کیا اور پارٹی کی ساری باگ دوڑ اُن کے حوالے کردی، وزیر اعظم کے امیدوار کا فیصلہ بھی بلاول بھٹو کے ہاتھ میں دے دیا گیا۔ بھٹو اور بی بی شہید کے وژن کو مدنظر رکھتے ہوئے  تھر میں پانی پہنچایا اور ائیرپورٹ بنارہے ہیں ۔

مسلم لیگ ن پر تنقید کرتے ہوئے سابق صدر نے کہا کہ وفاقی حکومت نے سندھ کو کچھ نہیں دیا بلکہ اپنے ہی صوبے سے کچرا صاف نہیں کرسکی، لاہور کے موچی دروازے پر کچرے کا انبار حکومتی کارکردگی کی غمازی کرتا ہے ، لوڈشیڈنگ کے خاتمے کے حوالے سے حکومت نے صرف اعلانات کیے۔