لاہور : وزیر مملکت برائے ماحولیات زرتاج گل نے کہا ہے کہ وزیراعظم عمران خان کےوژن کوآگے بڑھانا ہے، سابقہ حکومت نے پام ٹری لگا کر لاہور کو دبئی بنانا چاہا مگر لاہور لاہور ہے دبئی نہیں۔
تفصیلات کے مطابق لاہور کی فاطمہ جناح میڈیکل یونیورسٹی میں وزیراعظم کی کلین گرین پاکستان مہم کا آغاز کرتے ہوئے وزیرمملکت برائےماحولیات زرتاج گل نے کہا کہ ملک کو ماحولیاتی تبدیلیوں سے نکالنے کے لیے نوجوانوں کو کردار ادا کرنا ہو گا، پالیسیاں موجود ہیں بس عملدرآمد کی ضرورت ہے۔
زرتاج گل کا کہنا تھا کہ ایک گھر میں ایک درخت 4 انسانوں کو آکسیجن فراہم کرےگا، چھتوں پر پودے رکھنے سے 4 ڈگری تک درجہ حرارت میں کمی آئے گی اور درخت وہ لگائیں جوآپ کے علاقوں میں اگ سکتے ہیں۔
وزیرمملکت برائےماحولیات نے کہا وزیراعظم عمران خان کے وژن کو آگے بڑھانا ہے، پالیسیاں صرف کتابوں، فائلوں کا حصہ بن کر رہ گئی ہیں، پالیسیوں کولاگو کرنے کی اشد ضرورت ہے۔
مخالفین پر تنقید کرتے ہوئے ان کا کہنا تھا کہ سابقہ حکومت نے پام ٹری لگا کر لاہور کو دبئی بنانا چاہا مگر لاہور لاہور ہے دبئی نہیں۔
تقریب کے اختتام پر وائس چانسلر پروفیسر ڈاکٹر عامر زمان نے مہم کے تحت تمام فیکلٹی کی طرف سے پودا لگانے کا اعلان کیا، اس موقع پر وزیر مملکت نے بھی پودا لگایا۔
یاد رہے دو روز قبل وزیر مملکت موسمیاتی تبدیلی زرتاج گل نے تقریب سے خطاب میں کہا تھا ن لیگ کے کئی لوگوں کی نوکری عمران خان پر جملے کسنے اور تنقید کرنے سے ہی پکی ہوئی ہے، قوم اپنی لوٹی ہوئی دولت کاحساب چاہتی ہے۔
ان کا کہنا تھا کہ اپوزیشن کے ترجمان اپنی صلاحیتیں بدعنوان رہنماؤں کی ترجمانی میں ضائع نہ کریں، قوم اچھی طرح جانتی ہے کہ آپ کے قائدین کرپٹ ہیں، چاہے جتنا مرضی ان کا دفاع کرلیں لیکن کرپشن کا کبھی دفاع نہیں ہوتا، اس کا صرف اعتراف کیا جاتا ہے، ابھی بھی وقت ہے کہ ملکی خزانے کو لوٹنے والے قوم کی لوٹی ہوئی دولت واپس کردیں۔
